ဝါသဝ်၊ ဨပရဴ ၂၄
သ္ကိုပ်ဝန်ဇၞော်ဗျိတိၚ် သောန်နက် ထပ်ရီုဗၚ်အာကဵု ယူကရုၚ် သြန်ဗွဝ် ၅၀၀ ပြကောဋိကိုဋ် သတာလေန်ပံၚ်ပၠန်ဏောၚ်တုဲ သၠုၚ်ပ္တိုန်အာ ခရိတ်အရပ်စပ်ပရေၚ်စဵုဒၞါဗျိတိၚ်တံဏောၚ်ဂှ်လေဝ် ကဵုလဝ်ကတိရ။
သ္ကိုပ်ဝန်ဇၞော်ပဝ်လာန် ဒဝ်နေဝ် တက်(သ်) ၊ ဇၞော်သ္ကိုပ်ဂကောံနေတိုဝ် သတိုလ်တာန်ဗက်တံ အခိၚ်ဆဵုဂဗသဳကၠဳဂှ် နကဵုဗျိတိၚ် သွက်အလဵုအသဳယူကရုၚ်ဂှ် ထပ်ကဵုအာ အရီုဗၚ်ပရေၚ်ပၞာန်တံဏောၚ် ဟီုလဝ်ရ။
သောန်နက်ဂှ် သၠုၚ်ပ္တိုန်အာ ခရိတ်အရပ်စပ်ကာစဵုဒၞါတံတုဲ စိုပ် ၂၀၃၀ မ္ဂး ၚုဟ်မးဗၞိက်ကၠောန်ပ္တိတ်အပ္ဍဲဍုၚ် သၠုၚ်ပ္တိုန်အာ စဵုကဵု ၂ ဒဿမ ၅ တၟံကၠံဏောၚ်ဂှ် သ္ဂးရ။
ခရိတ်အရပ်စပ်ပရေၚ်ပၞာန်ဗျိတိၚ် ရပ်စပ်ဒၟံၚ်လၟုဟ် ၂ ဒဿမ ၃ တၟံကၠံဂှ် ယဝ်ရထပ်ပပဵုပ္တိုန်မ္ဂး ဗျိတိၚ်ဝွံ ပ္ဍဲကဵုဂကောံနေတိုဝ်ဂှ် ဒှ်ကၠုၚ်ဍုၚ် ခရိတ်အရပ်စပ်ပရေၚ်ပၞာန်ဂၠိုၚ်အိုတ်မွဲဏောၚ် မဒှ်ရ။
အန္တရာယ်ရုယှာ ကေုာံ ပရေၚ်ဘပဠ စပ်ကဵုဂၠးတိ၊ ပဋိပက္ခ သ္ကုတ်ဗၟံက်လဒေါဝ်တံ သာလှဲလးကၠုၚ်မာန်ဂှ်ရ ကောန်ဂကောံနေတိုဝ် ၃၂ ဍုၚ်ဝွံ သွက်ဂွံသၠုၚ်ပ္တိုန်ခရိတ်အရပ်စပ်ကာစဵုဒၞါဂှ် ဟွံဒေါအ်ဟွံဂွံ သ္ဒးကၠောန်ဏောၚ်ဂှ် သ္ၚဳဂၠိပ်ဒၟံၚ်တံ နွံဒၟံၚ်ရ။
ကြဴနူပေါဲဗ္တိုက်ပၞာန်ဂံက်တုဲ ဂၠးတိဝွံ ဒးဂဗဒၟံၚ်ကဵု အကာဲအရာအန္တရာယ်ဂၠိုၚ်အိုတ်တုဲ ပိုယ်တံ တရိုပ်ဒၟံၚ်စိုတ်ဟွံဂွံပုဟ်ဂှ် သောန်နက် ဟီုလဝ်ကဵု အ္စာပရိုၚ်ဂမၠိုၚ်ရ။
အတိုၚ်ဂလာန်သောန်နက်ဂှ်မ္ဂး ခရိတ်အရပ်စပ် ကာစဵုဒၞါဗျိတိၚ်ဂှ်ဝွံ နူသၞာံ ၂၀၃၀ ကဵု ၂၀၃၁ ဂှ် ဒှ်ကၠုၚ် ၈၇ ဗဳလျာန်ပံၚ်မာန်ရောၚ် ဂွံတီကေတ်ရ။
ပ္ဍဲဒပ်ယူကရုၚ် မ္ဒးပ္တိတ်ဒၟံၚ်ဇြဟတ် သ္ဂောံတဝ်စၞေဟ်စဵုဒၞါ ဒပ်ရုယှာ ထ္ပက်ဒၟံၚ်ပၞာန်တံဂှ် လွဟ်လက်နက်မကမ်တံ ပိုတ်ဒၟံၚ် ကဵုဂိတုယျတုဲ ယူရောပ် ဒးဆေၚ်ဒၟံၚ်မုက်ကဵု အခက်အခုဲပရေၚ်ထံက်ပၚ် မကမ်ဂမၠိုၚ်ရ။
အမေရိကာန်ဂှ်လေဝ် သွက်ဂွံထပ်ကဵုအရီုဗၚ်ပရေၚ်ပၞာန် ကုယူကရုၚ်ဂှ် သဳကၠဳလဝ် ပ္ဍဲကၠတ်ထဝ် ပွိုၚ် ၆ ဂိတုတုဲ အစဳဇန်ကဵုအာ ၆၁ ဗဳလျာန်ဒဝ်ဠာဂှ် အမာတ်ကၠတ်ထဝ်တံ တုပ်လဝ်စိုတ်ယျဂှ် ဂွံတီကေတ်ရ။
နကဵုယူရောပ် သၠုၚ်ပ္တိုန်အသိၚ် ဒးပလံၚ်ဗစိုပ်အာအရီုဗၚ်ပရေၚ်ပၞာန် ကုယူကရုၚ်ဏောၚ်ဂှ် ဝန်ဇၞော်ကာဍုၚ်သ္အာၚ်တံကဵု ကာစဵုဒၞါအဳယူတံ ဖ္တိုက်ဖ္အောဝ်လဝ်ရ။
Ref: AFP