ဗြဝတဳ၊ ဨပရဴ ၂၅
ကရောၚ်ပၞာန်ကဵုအရီုဗၚ် ကံၚ်ဇြဳပၞာန် ဝေၚ်လဝ်ပရေၚ်ပၞာန် ကဆံၚ်ကၟိန်ဍုၚ် နကဵုယၟုအံၚ်ဇေယျဂှ် ဒပ်ပံၚ်ကောံ KNLA တံ ဝးပ္ကဝ်ထပိုတ်ကၠေံ ပိုတ်တ်သ္ကုတ်တ်တုဲ ဗ္တိုက်သရိုဟ်အာဏောၚ် ညးမၞုံအခေါၚ်ဟီုဂး KNU ပဒိုဝ်သဝ်တဝ်နဳ ဟီုရ။
ပ္ဍဲဂိတုဨပရဴ ၁၁ တုဲကၠုၚ်တေံ ဒပ်ပံၚ်ကောံ KNLA တံ ကြဴနူဗ္တိုက်သီဂွံ ဗ္ဒိုပ်တမ်ဒပ် ခလရ ၂၇၅ နူဍုၚ်ဗြဝတဳ တွဵုရးကရေၚ်တုဲဂှ် သွက်ဂွံကလေၚ်ကေတ် ဍုၚ်ဗြဝတဳဂှ် ကံၚ်ဇြဳပၞာန် ဝေၚ်ဒၟံၚ်ပၞာန် ကဆံၚ်ကၟိန်ဍုၚ်မွဲ နကဵုယၟုအံၚ်ဇေယျရ။
နဒဒှ်ပရေၚ်ပၞာန်ကဆံၚ်ကၟိန်ဍုၚ်တုဲ ဒပ်ကံၚ်ဇြဳပၞာန် ဗလးလဝ် ဒပ်အရီုဗၚ် ၝောံဒပ် ၅၅ ပါလုပ်သီုကဵုကွဳစၚ်ခြပ်ပသဲ ကေုာံ ရေၚ်ယာန်ပၞာန်တံ ဗွဲမဂၠိုၚ်ဂၠေၚ်ဂှ်တုဲ ဒပ်ပံၚ်ကောံ KNLA တံ ကြတ်ဗ္တိုက်လဝ် ကရောၚ်ပၞာန်အရီုဗၚ်ဏံ ဟိုတ်ပိုတ်သ္ကုတ်ရ။
တုဲကၠုၚ် ပ္ဍဲဂိတုဨပရဴ ၂၁ တေံဂှ်လေဝ် ဒပ်ပံၚ်ကောံ KNLA ကြတ်ဗ္တိုက်လဝ် ကရောၚ်ပၞာန်ဏံတုဲ လ္ပာ်ကံၚ်ဇြဳပၞာန် သီုကဵုဗိုလ်ဇၞော်မွဲတၠ မပါလုပ် ၆ တၠ ချိုတ်အာလဝ်တုဲ ကွဳစၚ်ခြပ်ပသဲ ၁ ဖ္ဍိုက်၊ ကွဳစက်ပၞာန် ၂ ဖ္ဍိုက် ကေုာံ ပွိုက်ဖိုက် ၁ ဇကိုအ် မပါလုပ် သီဂွံလဝ် လွဟ်လက်နက် ၁၁ ဇကိုအ်ကဵု လွဟ်လက်နက်မကမ် ဂကူစုၚ်ဂှ် KNU လလောၚ်ပ္တိတ်လဝ်ရ။
ညးမၞုံအခေါၚ်ဟီုဂး KNU ပဒိုဝ်သဝ်တဝ်နဳဂှ် ကုကရောၚ်ပၞာန် ကြီုလဝ် ကလေၚ်သီအာ ဍုၚ်ဗြဝတဳဏောၚ်ဂှ် ဒပ်ပံၚ်ကောံ ဂကောံဇြဟတ်ပၠန်ဂတး သၟဝ်ပၠတရဴ KNLA တံ ဒၞါဲလဵုဆဵုဆဵု လ္ပရန်ဓညတုဲ ဗ္တိုက်သရိုဟ်အာ ပိုတ်တ်သ္ကုတ်တ်ဏောၚ်ဂှ် ဟီုရ။
“ဟီုကြီုလဝ် ကလေၚ်သီကေတ် ဍုၚ်ဗြဝတဳ နကဵုလဝေၚ်ပၞာန်အံၚ်ဇေယျ ကဆံၚ်ကၟိန်ဍုၚ်တုဲ ပၞာန်ကၠဵု မိစ္ဆာသၠဲတိ ထ္ပက်ကၠုၚ်ပၞာန်တံကဵု ကောန်ဒပ်ဍေံတံသီုဖအိုတ်ဂှ် ဒၞါဲလဵုဆဵုဆဵု ဟွံရန်ဓညမွဲသာ် နူကဵုဒပ်ပံၚ်ကောံ သၟဝ်ပၠတရဴ KNLA ပိုယ်တံသီုဖအိုတ် ဝးပ္ကဝ်ထပိုတ်အာ ဒပ်ကဵုအရီုဗၚ်ဏံ ပိုတ်တ်သ္ကုတ်တ်တုဲ ဗ္တိုက်သရိုဟ်အာဏောၚ်” သာ်ဝွံ သ္ဂးရ။
တုဲကၠုၚ် ပ္ဍဲဂိတုဨပရဴ ၂၃ တေံ ပ္ဍဲကဵုတမ်ဒပ် ခလရ ၂၇၅ ဒပ်မၚ်ဍုၚ်ဗြဝတဳ ဒပ်ပံၚ်ကောံ KNLA တံ ဗ္တိုက်သီဂွံလဝ်ဂှ် ဒပ်ကံၚ်ဇြဳပၞာန် ကၠုၚ်စိုပ်ပစူလဝ်အလာံ နကဵုအရီုဗၚ် ဒပ်မၚ်ပယျဵု BGF ရ။
စပ်ကဵုလၟေၚ်ဒဒှ်ဏံတုဲ ပဒိုဝ်သဝ်တဝ်နဳ ညးမၞုံအခေါၚ်ဟီုဂး KNU ဂှ် ညံၚ်ဂွိုအ်ဒတုံစှ်ေ ပ္ဍဲဒၞက်သၞတံဂှ် ဒပ်ပံၚ်ကောံ KNLA တံ ဆုတ်ကလေၚ်ကဵုလဝ် နူဍုၚ်ဗြဝတဳယာယဳရောၚ် ဟီုရ။
“ဍာံဍာံဂှ် နူဒပ်မၚ်ပယျဵု BGF ကော်ကၠုၚ် ကံၚ်ဇြဳပၞာန်တုဲ ကၠုၚ်ပ္တိုန်လဝ်အလာံကံၚ်ဇြဳပၞာန် ပ္ဍဲ ၂၇၅ ဏံဂှ်ရ။ ဒှ်အာသာ်ဏံတုဲ ဗွဲတၟေၚ် အခါပၟိက်ဇၞော်ဗီုဏံဂှ် ညံၚ်ဂွိုအ်စှ်ေအာ အပ္ဍဲဂွန်သၞတံဂှ် ဒပ်ပံၚ်ကောံ KNLA ပိုယ်တံ ဆုတ်ကလေၚ်ကဵုလဝ် နူဍုၚ်ဗြဝတဳ ယာယဳရ” သာ်ဝွံ ပဒိုဝ်သဝ်တဝ်နဳ သ္ဂးရ။
သ္အာၚ်နူဂှ်ပၠန် နကဵုဗ္ၜတ်အလုံဍုၚ်မွဲ ဟိုတ်နူကၠောန်ဒၟံၚ် ညံၚ်သၞောတ်တၠအဝဵုပၞာန် ဂွံသရိုဟ်စှ်ေဂှ်တုဲ ဍုၚ်ဗြဝတဳမွဲဓဝ်ဟွံသေၚ် သွက်တရဴပၠန်ဂတး ဟွံတုဲဒှ်ဏီတံဂှ် ဆက်လုပ်အာပေါဲဗ္တိုက် ကရောံညးဍုၚ်ကွာန်တံဏောၚ်ဂှ် ညးမၞုံအခေါၚ်ဟီုဂး KNU ကဵုသမ္တီဟီုလဝ်ရ။
အခိၚ်လၟုဟ် ကရောၚ်ပၞာန်ဒပ်ကံၚ်ဇြဳပၞာန် ကၠုၚ်စိုပ်ကဵုအရီုဗၚ်ပၞာန်ဂှ်ဝွံ စိုပ်ဒၟံၚ် ဇိုၚ်ဒဵုဒဝ်ဏ ပွိုၚ်ဍုၚ်ကအ်ကြိက်တုဲ ဟိုတ်နူဒပ်ပံၚ်ကောံ KNLA ကြတ်ဗ္တိုက်လဝ်တုဲ ဒပ်ကံၚ်ဇြဳပၞာန် ဒးဂိဒၟံၚ်ရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−KNU