လံၚ်လုၚ်၊ ဨပရဴ ၂၅
ကောန်ဒပ်ကံၚ်ဇြဳပၞာန် ဖျေံလဝ်ဒပ် ဂတမုက်ဗ္ဒိုပ်ဗၠာဲသၟိၚ်ၝောံဍုၚ် ပွိုၚ်ဍုၚ်လံၚ်လုၚ် ရးတၞၚ်သဳဂှ် ဒပ်စဵုဒၞါညးဍုၚ်ကွာန်တံ လုပ်စိုပ်ဗ္တိုက်လဝ်တုဲ ဇီုကပိုက်ချိုတ်တံလေဝ် နွံဒၟံၚ်ရောၚ် ဂွံတီကေတ် ဇရေၚ်ညးဒေသတံရ။
ပ္ဍဲဂိတုဨပရဴ ၂၄ အခိၚ်နူဂယး ၜိုတ် ၇ နာဍဳဂှ် ဒပ်ဒမၠုက်နွေဥူ လုပ်စိုပ်ဗ္တိုက်လဝ် ကောန်ဒပ်ကံၚ်ဇြဳပၞာန် စၟဳတ်ဒၟံၚ် မၞိဟ်အာကၠုၚ် ပ္ဍဲဂတမုက်ဗ္ဒိုပ်ဗၠာဲသၟိၚ်ၝောံဍုၚ် နကဵုဇြဟတ် ၜိုတ် ၇ တၠ နကဵုသၞောတ်ဒမၠုက်ရ။
ဟိုတ်နူလုပ်ကၠတ်ဗ္တိုက်လဝ်တုဲ ပရေၚ်ပန်ပှော်ၜါလ္ပာ် က္တဵုဒှ်လအ်အာလဝ်မိနေတ်ညိညတုဲ လ္ပာ်ကံၚ်ဇြဳပၞာန် ဇီုကပိုက်ချိုတ်တံ နွံကီုလေဝ် ဂၠိုက်ဂၠါဲဒၟံၚ် လၟိဟ်ချိုတ်တ်ပၠိုတ်တ်ဖိုဟ်ဂှ် ညးဒုၚ်တာလျိုၚ် လလောၚ်ပရိုၚ် ဂကောံဒပ်ဒမၠုက်နွေဥူ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အတိုၚ်ဂလာန် ညးဒေသဍုၚ်လံၚ်လုၚ်တံဂှ်မ္ဂး ဒပ်ကံၚ်ဇြဳပၞာန် စၟဳတ်ဒၟံၚ် ဂတမုက်ဗ္ဒိုပ်ဗၠာဲသၟိၚ်ၝောံဍုၚ် ဒးဒုၚ်ဗ္တိုက်တုဲ ကောန်ဒပ်ကံၚ်ဇြဳပၞာန် ဟွံအောန်နူကဵု ၂ တၠ ချိုတ်အာလဝ်ရောၚ် ဟီုလဝ်ကီုလေဝ် နကဵုသြၚ်လောန်တိုၚ်(မ်) သ္ပဒတန်တၞဟ်ခြာဟွံမာန်ဏီရ။
သ္အာၚ်နူဂှ်ပၠန် ဒပ်ကံၚ်ဇြဳပၞာန် စၟဳတ်ဒၟံၚ် ဂတမုက်ဗ္ဒိုပ်ဗၠာဲသၟိၚ် ဒးဒုၚ်ဗ္တိုက်တုဲဂှ် ကောန်ဒပ်ကံၚ်ဇြဳပၞာန်တံ ကော်စၟဳတ်လဝ် ညးဍုၚ်ကွာန်ကောန်အရာပ် ပွဳပွူဗ္ဒါဲဗ္ဒါဲဗ္ဒိုပ်ဗၠာဲသၟိၚ်တံဂှ်တုဲ ကလေၚ်ဗလးကဵုလဝ်ရောၚ် ညးဒေသလ္တူဍုၚ်မွဲတၠ သ္ဂးရ။
တုဲကၠုၚ် ပ္ဍဲဂိတုဨပရဴ ၈ တေံဂှ်လေဝ် ကောန်ဒပ်ကံၚ်ဇြဳပၞာန် ဖျေံလဝ်ဒပ် ပ္ဍဲရုၚ်ကောပ်ကာဲပရေၚ်မၞိဟ်လုပ် လ္တူဍုၚ်လံၚ်လုၚ်တံ ဒးဒုၚ်ကၠတ်ဗ္တိုက်တုဲ ကောန်ဒပ်ကံၚ်ဇြဳပၞာန် ၅ တၠ ချိုတ်အာလဝ်ရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−Social Media