မတ်မလီု၊ ဨပရဴ ၂၅
ဗော်ဍုၚ်မန်တၟိ ဗ္တိုက်သရိုဟ်တၠအဝဵုပၞာန် NMSP AD ကဵု ကံၚ်ဇြဳဖေဝ်ဒရာဍုၚ်မန် MSFC တံ သွက်ဂွံပံၚ်တောဲရေၚ်တၠုၚ်အာ ပ္ဍဲပရေၚ်ဍုၚ်ကွာန်၊ ပရေၚ်ပၞာန် ကေုာံ ကဏ္ဍတၞဟ်ဟ်တံဂှ် ကလိဂွံလဝ်တၚ်တုပ်စိုတ်ရောၚ် ပ္ဍဲဂိတုဨပရဴ ၂၃ တေံ ၜါဂကောံ ပံၚ်တောဲလလောၚ်တြးလဝ်ရ။
ၜါဂကောံဏံဝွံ ပ္ဍဲဂိတုဨပရဴ ၂၂ ဂှ် ဆဵုဂဗလဝ်ညးသ္ကအ် အလန်ပထမတုဲ လ္ပာ်ကံၚ်ဇြဳဖေဝ်ဒရာဍုၚ်မန် MSFC ဂှ် ကံၚ်ဇြဳ ၉ တၠ၊ လ္ပာ်ဗော်ဍုၚ်မန်တၟိ NMSP-AD ဂှ် ဂကောံအာက္ဍိုက်ပ်ပရေၚ်ပၞာန်၊ ပရေၚ်ဍုၚ်ကွာန် ၆ တၠ တိုန်စိုပ်လဝ်ရ။
ဥက္ကဌ ကမ္မတဳအုပ်ဓုပ် ကံၚ်ဇြဳဖေဝ်ဒရာဍုၚ်မန် နာဲမန်သာၚ်ဂှ် ပရေၚ်ဆဵုဂဗဏံဝွံ ဗီုပြၚ်ဖျေံစၟတ်မူဝါဒတံ ဟွံသေၚ်ဏီတုဲ သာ်လဵုဂွဴပံၚ်တောဲအာ ပ္ဍဲပရေၚ်ပၞာန် ပရေၚ်ဍုၚ်ကွာန် ကေုာံ ကိစ္စတၞဟ်ဟ်တံဟီုဂှ် ဆဵုဂဗလဝ်ကၠာတဲရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ပိုယ်တံ ဆဵုဂဗပြဟ်ဟ်ဏံဂှ်တှ်ေ ဗီုပြၚ်ဖျေံစၟတ်မူဝါဒတံ ဟွံသေၚ်ဏီပုဟ်။ နူကဵုဂကောံပၠန်ဂတးၜါဂကောံပိုယ်တံ ပ္ဍဲကဵုပရေၚ်ဍုၚ်ကွာန်၊ ပရေၚ်ပၞာန် ပ္ဍဲကိစ္စတၞဟ်ဟ်တံဂှ် သာ်လဵုဂွံပံၚ်တောဲရေၚ်တၠုၚ်ရောဟီုဂှ် ဒှ်ပရေၚ်ဆဵုဂဗ ကၠာတဲရ။ တၚ်တုပ်စိုတ်ဂှ်တှ်ေ ဟွံဂၠိုၚ်ပုဟ်။ ပ္ဍဲဒၞါဲထ္မံက်ရုပ်ရဴ ကမၠောန်ဂတဂှ်တှ်ေ မွဲလ္ပာ်ကဵုမွဲလ္ပာ် သ္ဂောံဆက်စၠောံညးသ္ကအ်ဂှ် ဒှ်ဒက်လဝ် ဂကောံပညဳပညပ်ပရေၚ်ကမၠောန်ရောၚ်” သ္ဂးရ။
နူကဵုပေါဲဆဵုဂဗ အလန်ပထမဂှ် NMSP AD ကေုာံ MSFC တံဝွံ မပ္တံကဵုကဏ္ဍပရေၚ်ဍုၚ်ကွာန်၊ ပရေၚ်ပၞာန်၊ ပရေၚ်ရီုဗၚ်ညးဍုၚ်ကွာန် ကေုာံ ကဏ္ဍနာနာတံဂှ် ကဏ္ဍညးကုညး ကမၠောန်ထေက်ကြိုက် ဒးပံၚ်တောဲကၠောန်အာ ညးသ္ကအ်နွံတံဂှ် ကၠောန်ၜိုတ်အာဏောၚ် မဒှ်ရ။
သ္အာၚ်နူဂှ်ပၠန် ကမၠောန်ဒးပံၚ်တောဲထ္မံက်အာရုပ်ရဴဂမၠိုၚ်ဂှ် အကြာဂကောံၜါလ္ပာ် ဂွံပ္ညဳပ္ညပ်ပရေၚ်ကမၠောန်မာန် သဳကၠဳမာန်ဂှ် ဒက်ပ္တန်အာ ဂကောံပညဳပညပ်ပရေၚ်မၠောန်ဏောၚ် ဂွံလဝ်တၚ်တုပ်စိုတ်တုဲ ပ္ဍဲဂကောံဏံ မွဲမွဲလ္ပာ် ရန်လဝ်ပိတၠရောၚ် နာဲမန်သာၚ် လဴထ္ၜးလဝ်ရ။
စပ်ကဵုလၟေၚ်ကမၠောန် ပညဳပညပ်ကလိဂွံတၚ်တုပ်စိုတ်တံ နူကဵုဂကောံပ္ညဳပ္ညပ်ပရေၚ်ကမၠောန်တံဂှ် ပ္တိုန်ထ္ၜးအာကဵု ညးဍုၚ်ကွာန်ဂကူမန်တံကဵု ညးဍုၚ်ကွာန်ကောန်ဍုၚ်အရၚ် အလုံကၟိန်ဍုၚ်တံ လၟေၚ်ၚ်ရောၚ်ဂှ် ဂွံတီကေတ် အတိုၚ်တၚ်လလောၚ်တြး ပံၚ်တောဲဂှ်ရ။
စပ်ကဵုပရေၚ်ပၞာန်၊ ပရေၚ်ဍုၚ်ကွာန်တုဲ သဳကၠဳလဝ် သောဲသောဲဗြောဲဗြောဲဟွံမွဲကီုလေဝ် ပရေၚ်ဍုၚ်ကွာန်၊ ပရေၚ်ပၞာန် မက္တဵုဒှ်ဒၟံၚ်လၟုဟ်ဏံ မပါလုပ် အကာဲအရာဆက်စပ် စပ်ကဵုကၟိန်ဍုၚ်ပံၚ်ကောံဖေဝ်ဒရာတံဂှ် နူကဵုဂကောံၜါလ္ပာ် ပါ်ပရအ်တၚ်နၚ်ပရိုၚ် ကေုာံ သ္ၚဳဂၠိပ်လဝ်တံ ကၠောန်ၜိုတ်လဝ်ရောၚ် နာဲမန်သာၚ် လဴထ္ၜးလဝ်ရ။
နကဵုကံၚ်ဇြဳဖေဝ်ဒရာဍုၚ်မန် MSFC သွက်သၞောတ်တၠအဝဵုပၞာန် ဂွံသရိုဟ်စှ်ေ၊ သွက်ဗၠးၜးဂကူမန် ကေုာံ သွက်ဂွံပ္တန်ဍုၚ်ဖေဝ်ဒရာဒဳမဝ်ကရေဇြဳတံဂှ်တုဲ ဂကောံပၠန်ဂတး တၚ်ရန်တၟံတုပ်တုဲ လုပ်ဒၟံၚ်ပေါဲဗ္တိုက်ဂမၠိုၚ် ဂကောံလဵုဟွံဟီု သ္ဂောံအာတက်ကျာနွံဒၟံၚ်ရောၚ် ဂွံတီကေတ် နူကံၚ်ဇြဳရ။
နာဲမန်သာၚ်ဂှ် “တော်ကဵုဒေသတၞဟ်ဟ်မ္ဂး တွဵုရးဍုၚ်မန်ပိုယ်တံဂှ်တှ်ေ အသိၚ်အလိုန်ပၠန်ဂတး အောန်ဒၟံၚ်ဏောၚ် ဟီုဂွံရ။ ဟိုတ်ဂှ်ရ နဒဒှ်အလန်ကိုပ်ကၠာအိုတ် မွဲဂကောံကဵုမွဲဂကောံ ကလေၚ်ဒက်ပ္တန်ဓဝ်ပတှ်ေကီု၊ တုဲပၠန် ဒက်ပ္တန်ဇြဟတ်ကီု သွက်အရာတံဏံဂှ် ပိုယ်တံ ဒးပံၚ်တောဲရေၚ်တၠုၚ်အာဏောၚ် ထေၚ်ကေတ်ရ” သာ်ဝွံ ထံက်ထ္ၜးလဝ်ရ။
ကံၚ်ဇြဳဖေဝ်ဒရာဍုၚ်မန်ဝွံ ဒှ်ဂကောံပၠန်ဂတး၊ ဂကောံပရေၚ်ဍုၚ်ကွာန် မံက်ဂတဝ်ကၠုၚ် နူပၠန်ဂတးက္ညၚ်တုဲ NMSP AD ဂှ်တှ်ေ ဒှ်ဂကောံရပ်လွဟ်ကောန်ဍုၚ်အရၚ် ပါ်တိတ်နူ ဗော်ဍုၚ်မန်တၟိရ။
တုဲကၠုၚ် ဂိတုဨပရဴ သတ္တာဟပထမဂှ်လေဝ် ကံၚ်ဇြဳဖေဝ်ဒရာဍုၚ်မန် MSFC ၊ ဒပ်ပၠန်ဂတးဍုၚ်မန် MSRF ကေုာံ ဒပ်စဵုဒၞါဍုၚ်မန် MSDF တံ သွက်ဂွံလုပ်ပေါဲဗ္တိုက် ကုတၠအဝဵုပၞာန် ကေုာံ တၠအဝဵုအိုဿီုတံဂှ် ကလိဂွံလဝ်တၚ်တုပ်စိုတ်ရ။
ပရိုၚ်−သြၚ်လောန်တိုၚ်(မ်)
ဗီု−NMSP