သဓီု၊ ဨပရဴ ၂၆
ပ္ဍဲပွိုၚ်ဍုၚ်ဘာအၚ် ကေုာံ ပွိုၚ်ဍုၚ်သဓီု တိဍာ်ထိၚ်ဒဝ် ဒပ်မဟာ ၁ ဗော်သွးကောန်ဂကူကရေၚ် KNU ဂှ် ဟိုတ်နူဒပ်ကံၚ်ဇြဳပၞာန် ဗ္တိုက်ကဵုတရဴကျာ ကေုာံ လွဟ်ဇၞော်တံတုဲ ညးဍုၚ်ကွာန်ဒေသ ၃ တၠ ဇီုကပိုက်ကလိဂွံလဝ်ဝပ်ရောၚ် ခရိုၚ်သဓီု KNU လလောၚ်ပ္တိတ်လဝ် ပ္ဍဲဂိတုဨပရဴ ၂၅ တေံရ။
တုဲကၠုၚ် ပ္ဍဲဂိတုဨပရဴ ၂၀ တေံ ပေါဲဗ္တိုက်ဟွံမွဲမွဲသာ် ဟိုတ်နူဒပ်ကံၚ်ဇြဳပၞာန် ဗ္တိုက်ထောံမခတိုဟ် ကေုာံ ကဵုက္ၜၚ်ကျာတံဂှ်တုဲ နဝ်ချေ အာယုက် ၁၂ သၞာံ ကေုာံ ဖဳပါန်ပု အာယုက် ၈၅ သၞာံတံ ဒးအာကဝေက်မာၚ် ကလိဂွံလဝ်ဝပ် ပ္ဍဲထာၚ်တဲ၊ ပ္ဍဲကအ်၊ ပ္ဍဲဇိုၚ်တံရ။
ပ္ဍဲဂိတုဨပရဴ ၁၈ တေံဂှ်လေဝ် နူဗ္ဒိုပ်ဒပ်ကံၚ်ဇြဳပၞာန် ဖျေံသ္ဇိုၚ်ပုၚ်နေဝ်တဝ် ပွိုၚ်ဍုၚ်သဓီု ပန်ပှော်စုတ်လဝ် လွဟ်ဇၞော် ၄ မတုဲ ညးဒေသကွာန်ပုၚ်နေဝ်တဝ် ဥူယျေဝ်ဝေန် ဇီုကပိုက်ကလိဂွံလဝ်ဝပ်တုဲ ကွဳစက်ၜါဖ္ဍိုက်လေဝ် ဒးလီုလာ်အာလဝ်ရောၚ် ဂွံတီကေတ် အတိုၚ်တၚ်လလောၚ်တြးဂှ်ရ။
ပ္ဍဲဂိတုဨပရဴ ၂၂ အခိၚ်ဗ္တံဂှ်လေဝ် နူကဵုတမ်ဒပ်ကံၚ်ဇြဳပၞာန် ခမရ စၟတ် (၉) ဖျေံသ္ဇိုၚ်ပွိုၚ်ဍုၚ်သဓီုဂှ် ပန်စုတ်လွဟ်ဇၞော်တုဲ ဒတုံဗ္တိုဟ်ထ္ကးအာလဝ် ပ္ဍဲကွာန်မယာန်တုဲ သ္ၚိဒၟံၚ်ညးဒေသမွဲမ လီုလာ်အာလဝ်ရောၚ် ဂွံတီကေတ်ရ။
ပေါဲဗ္တိုက်ဟွံမွဲမွဲသာ် ဟိုတ်နူဒပ်ကံၚ်ဇြဳပၞာန် ပန်ပှော်လွဟ်ဇၞော်တုဲ အကြာညးဍုၚ်ကွာန်ဒေသတံဂှ် ပရေၚ်ဒှ်ဓဝိၚ်တံ သၠုၚ်တိုန်ဒၟံၚ်တုဲ ညးဒေသလ္ၚဵုတံဂှ် ထောံလသာသ္ၚိဌာန် ဒးဂြိပ်ဒဴပါဲဒလေတ်ဒၟံၚ်တံ နွံဒၟံၚ်ရောၚ် ညးဒုၚ်တာလျိုၚ် လလောၚ်ပရိုၚ် ခရိုၚ်သဓီု KNU ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲခရိုၚ်သဓီု KNU ဂှ် စနူလဒေါဝ်သၞာံတုဲကၠုၚ်တေံတုဲ အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA တံ က္တဵုဒှ်ပေါဲဗ္တိုက် စဵုကဵုဟွံမွဲ အောန်ဒၟံၚ်ကီုလေဝ် လ္ပာ်ကံၚ်ဇြဳပၞာန်ဂှ်တှ်ေ ပန်ဒၟံၚ်ကဵုလွဟ်ဇၞော်၊ ဗ္တိုက်ဒၟံၚ်ကဵုတရဴကျာတံ မွဲဏှမွဲဏှရ။
တုဲကၠုၚ် ပ္ဍဲဂိတုမာတ် ၂၃ တေံဂှ်လေဝ် ဒပ်ကံၚ်ဇြဳပၞာန် ထောံမခတိုဟ်ဗ္တိုက်ဒၟံၚ် ပ္ဍဲကွာန်မေန်သဝ် ပွိုၚ်ဍုၚ်ဘာအၚ် KNU ဂှ်တုဲ ညးဍုၚ်ကွာန်ဒေသ ၁ တၠ ဇီုကပိုက်ကလိဂွံဝပ်တုဲ ဘာလကျာ်၊ သ္ၚိဒၟံၚ်ဂမၠိုၚ် လီုလာ်အာလဝ်ရောၚ် ဂွံတီကေတ် အတိုၚ်တၚ်လလောၚ်တြး KNU ရ။
ပရိုၚ်−သြၚ်လောန်တိုၚ်(မ်)
ဗီု−KNU