ဍာ်ဗု၊ ဨပရဴ ၂၆
ပ္ဍဲဌာန်ဂအုပ်ဒပ်ဍာ်မဝ်ရဝတဳ ဒေသကံပေါက် ပွိုၚ်ဍုၚ်ဍာ်ဗု ရးတၞၚ်သဳဂှ် မၞိဟ်တြုံဒေသမွဲတၠ ဒးဒုၚ်ရပ်လဝ် ဒဒှ်ရချိုတ်အာဂှ် လ္ပာ်ကံၚ်ဇြဳပၞာန် ကဵုကၠုၚ်လဝ်ပရိုၚ်ရောၚ် ဂွံတီကေတ် နူညးမစုက်လုက်ကဵု ဂြောဝ်ဂတာညးတံရ။
ဥူဝေန်ဗိုဝ် အာယုက် ၅၂ သၞာံ ဒၟံၚ်ကွာန်ဖံၚ်တဝ် ဒေသကံပေါက် ကောန်ကဵုအပါၜါတၠဂှ် ပ္ဍဲဂိတုဨပရဴ ၁၈ တုဲကၠုၚ်တေံ အခိၚ်ဗ္တံဂှ် ကောန်ဒပ်ကံၚ်ဇြဳပၞာန်တံ ကၠုၚ်စိုပ်ရပ်ကော်ဏာလဝ် ပ္ဍဲသ္ၚိ နကဵုဇြဟတ်လၟိဟ်ဗွဲမဂၠိုၚ်ဂၠေၚ်ရ။
ဥူဝေန်ဗိုဝ် ဒးဒုၚ်ရပ်လဝ်ဂှ်ဝွံ ပ္ဍဲဂိတုဨပရဴ ၂၄ အခိၚ်ဗ္တံ ၜိုတ် ၇ နာဍဳဂှ် လတေၚ်ဆီက္ဍဟ်ပိုတ်တုဲ ဒဒှ်ရချိုတ်အာလဝ်ဂှ် လ္ပာ်ကံၚ်ဇြဳပၞာန် ကဵုကၠုၚ်ပရိုၚ်ဂှ်ရ ဒးအာပ္တိတ်လဝ်ဇွ ဗ္တံဂှ်ရောၚ် ဂွံတီကေတ်ရ။
ကြဴနူဂှ်တုဲ အခိၚ်ကောန်ဇာတ်ဂြောဝ်ဂတာညး စၟဳတ် ဇွဥူဝေန်ဗိုဝ် ဒးချိုတ်အာလဝ် ပ္ဍဲဒၞါဲစၟဳတ်ဂှ် ဘဲဝပ်မ္ၚးဂှ် ဟွံဂွံဆဵုကေတ်တုဲ ဟိုတ်နူဝပ် ဂြေန်ဒက်လဝ်ကၟာၚ်တဲ သီုကံက်တဲၜါလ္ပာ်ဂှ်တုဲ ဝပ်ညိညရဟေၚ် ဂွံဆဵုကေတ်ဂှ် သ္ဂးရ။
အတိုၚ်ဂလာန်ညးဒေသတံဂှ်မ္ဂး ဥူဝေန်ဗိုဝ် ချိုတ်အာဂှ်ဝွံ ဒှ်ညးကၠောန်ကလောန်သွံရာန်သတ်ဗြဴမွဲတၠရတုဲ ဆက်စပ်ကဵု PDF တံ ဟွံမွဲကီုလေဝ် လ္ပာ်ကံၚ်ဇြဳပၞာန် ဆက်စပ်ဒၟံၚ်ကဵု PDF တံ နွံဒၟံၚ်ဂးတုဲ ရပ်ဒက်စၟဳတ်လဝ်ရ။
ဉူဝေန်ဗိုဝ် ညးမဒှ်အပါဂှ် ချိုတ်အာလဝ် ပ္ဍဲဒၞါဲစၟဳတ်ဂှ်ကီုလေဝ် ညးမဒှ်ကောန်ဂှ် ဒပ်ကံၚ်ဇြဳပၞာန်တံ ဆက်ရပ်ဒက်လဝ်တုဲ ဒဵုကဵုအခိၚ်လၟုဟ် ဟွံကလေၚ်ဗလးကဵုဏီရ။
လၟေၚ်ဒဒှ်ဏံဝွံ ပ္ဍဲဒေသကံပေါက် ကြဴနူဒပ်ဍာ်ကံၚ်ဇြဳပၞာန်တံ ရပ်ဒက်ဏာတုဲ အခိၚ်ဒးဒုၚ်စၟဳတ်ဒၟံၚ်ဂှ် ချိုတ်အာဂှ်ဝွံ ဒှ်အလန်ပထမကိုပ်ကၠာအိုတ်ရောၚ် ဂွံတီကေတ် အတိုၚ်ဂလာန်ညးဒေသတံရ။
တုဲကၠုၚ် ပ္ဍဲဂိတုဨပရဴ ၁၉ တေံဂှ်လေဝ် သမ္ဘာတၠသ္ၚိၜါတၠ ပံက်လဝ်ဆေၚ်ဂၠိက်ယာတ် ပ္ဍဲအရာပ် (ဗိုလ်ချုပ်) ဒေသကံပေါက်ဂှ် ဒးဒုၚ်ရပ်ဒက်တုဲ ဒဵုကဵုအခိၚ်လၟုဟ် ဟွံကလေၚ်ဗလးကၠုၚ်ဏီပုဟ်ဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−CJ