ကအ်ကြိက်၊ ဨပရဴ ၂၆
ဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန် ပ္ဍဲကွာန်ကအ်ဗိန် ပွိုၚ်ဍုၚ်ကအ်ကြိက် တွဵုရးကရေၚ် နကဵုဇြဟတ်လၟိဟ်ဗွဲမဂၠိုၚ်ဂၠေၚ်ဂှ် ပ္ဍဲဂၠံၚ် မၞိဟ်တြုံဒေသၜိုတ်ဆဵုတံဂှ် ရပ်ကၠေၚ်ဒက်တုဲ ၜုၚ်တက်ပျဲပျာံဒၟံၚ်ရောၚ် ဂွံတီကေတ် နူကဵုတမ်ရိုဟ်ပရိုၚ်ဗလးတိတံရ။
ပ္ဍဲဂိတုဨပရဴ ၂၅ အခိၚ်နူဂယးပြဟ်ဂှ် ဒပ်ကံၚ်ဇြဳပၞာန် ဇြဟတ်ၜိုတ် ၃၀၀ လုပ်စိုပ်ထ္ပက်ကၠုၚ်ကရောၚ်ပၞာန် ပ္ဍဲကွာန်ကအ်ဗိန် ဒၞါဲဗ္ဒိုပ်ဗၠာဲသၟိၚ်တိဍာ်ကအ်ဗိန် ဒပ်ပံၚ်ကောံပၠန်ဂတးတံ မဗ္တိုက်သီဂွံလဝ်ဂှ်ရ။
ဒပ်ကံၚ်ဇြဳပၞာန် ပန်ပှော်လွဟ်ဇၞော် ဟွံပိုတ်သ္ကုတ်တုဲ ထ္ပက်ကၠုၚ်ကရောၚ်ပၞာန်ဂှ် ရပ်ဒက်မၞိဟ်တြုံရဲဒေသလ္ၚဵုတံဂှ်တုဲ ၜုၚ်တက်ဒၟံၚ်တုဲ မၞိဟ်ကလေၚ်ဗၠးကၠုၚ် ပ္ဍဲကဵုဏံတံလေဝ် နွံဒၟံၚ်ရောၚ် ဂွံတီကေတ်ရ။
စပ်ကဵုအကာဲအရာကွာန်ကအ်ဗိန်ဂှ်တုဲ နိဿဲကေတ် ဂလာန်ညးဗၠးကၠုၚ်မွဲတၠ နူကဵုကံၚ်ဇြဳပၞာန်တံ ရပ်ကၠေၚ်ပျဲပျာံလဝ်ဂှ်တုဲ ညးဒေသမွဲတၠ ဟီုလဝ်ကဵု ဌာန်ပရိုၚ်သြၚ်လောန်တိုၚ်(မ်) သာ်ဏံရ။
“ဍေံတံ (စကစ) မၞိဟ်တြုံၜိုတ်ဆဵုဂှ် ကော်တုဲ ဒက်လဝ်ကဵုဇုက်။ မၞိဟ်ဒးဂှ် ( ဒးဒုၚ်ရပ်) သၟာန်ညးတုဲ ညးသှ်ကဵုရ။ ဒက်ကဵုဇုက်တုဲ ဍေံတံ ၜုၚ်တက်ဒၟံၚ်ရ။ မၞိဟ်ဗၠးကၠုၚ်မွဲတၠဂှ် ညးလဴထ္ၜးရ။ သ္ကအ်ရဲညးမသုန်တၠ ဒးဒုၚ်ကၠေၚ်လဝ်။ တုဲပၠန် စိုပ်မွဲဒၞါဲတုဲ သှ်ကဵုဇုက်သီုဖအိုတ်တုဲ ကဵုမံၚ်သၟဝ်သ္ၚိ။ မံၚ်မွဲဏှေံ ကောန်ပၞာန်တံ တိတ်အာတုဲ ညး ( ဒးဒုၚ်ဒက်လဝ်ဇုက်တုဲ ဗၠးကၠုၚ်) ဂြိပ်လုပ်ကၠုၚ် လ္ပာ်ဏံ” သာ်ဝွံ သ္ဂးရ။
မၞိဟ်တြုံသှ်ေမံၚ် ၄ တၠ ဒးဒုၚ်ရပ်လဝ် ကုကံၚ်ဇြဳပၞာန်တံဂှ် ဂ္စါန်ဂြိပ်တိတ်လဝ် ဒၞါဲဗၠးဘဲတံကီုလေဝ် ကလေၚ်ဗၠးကၠုၚ် နွံ၊ ဟွံမွဲဂှ် ဟွံဂွံတီကေတ်ဏီပုဟ်ဂှ် ညးဒေသတံ ဆက်ဟီုရ။
တုဲကၠုၚ် ခြာဟွံလအ်ဏံ ဟိုတ်နူပရိုၚ် ဂကောံဒပ်ပံၚ်ကောံပၠန်ဂတးတံ ကလေၚ်ဆုတ်အာ နူဗ္ဒါဲကွာန်ကအ်ဗိန်ကဵု ကွာန်ဓမ္မသယျဂှ်တုဲ ဒပ်ကံၚ်ဇြဳပၞာန် လုပ်စိုပ်ချဳဒရာၚ်ကၠုၚ် နကဵုက္ဍိုပ်လိက်သ္အးဇ္ၚးတိဍာ်ရ။
ကရောၚ်ပၞာန်ဒပ်ကံၚ်ဇြဳပၞာန်တံ လုပ်စိုပ်ကၠုၚ် ဗီုလၟုဟ်တုဲ ညးဒေသ နူကွာန်ကအ်ဗိန်၊ ကွာန်ကအ်ပံက်ဂမၠိုၚ် အတိုၚ်ကွာန်မွဲ အခိၚ်ဂြိပ်တိတ် ဒၞါဲဗၠးဘဲတံဂှ် မၞိဟ်ဗြဴဒေသမွဲတၠဝွံ ဟိုတ်နူဒပ်ကံၚ်ဇြဳပၞာန် ပန်ပှော်ဒၟံၚ်ကဵုသေနာတ်တုဲ ချိုတ်အာလဝ်ရောၚ် ဂွံတီကေတ် ဇရေၚ်ညးဒေသတံရ။
ညးဗြဴ ဒးချိုတ်အာဂှ်ဝွံ အာယုက် ၁၉ သၞာံ နွံတုဲ ဂွံဂြိပ်ပၞာန် အခိၚ်ဒဳတိတ်ကွဳလိုန်ဓာတ် နူကဵုကွာန်ဂှ် ကောန်ဒပ်ကံၚ်ဇြဳပၞာန်တံ ပန်ပှော်ကၠုၚ် ကဵုသေနာတ်တုဲ ဒးမကမ်တုဲ ဒးချိုတ်အာလဝ်ရောၚ် တမ်ရိုဟ်ပရိုၚ်အပ္ဍဲဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အခိၚ်လၟုဟ် ဒပ်ကံၚ်ဇြဳပၞာန်ဝွံ လုပ်စိုပ်ကေတ်ဒၞါဲ အပ္ဍဲကွာန် ကေုာံ အပ္ဍဲဗ္ဒိုပ်ဗၠာဲသၟိၚ်ကအ်ဗိန် ဒးဗလးလဝ်တဲဂှ်တုဲ သ္အးဇ္ၚးဒၟံၚ်တိဍာ်ဂှ်ရ ညးဒေသဂၠိုၚ်ကဵုလ္ၚီ ဂြိပ်ဒဴပါဲဒလေတ်ဒၟံၚ်ဒၞါဲဗၠးဘဲတံရောၚ် တမ်ရိုဟ်ပရိုၚ်ဂှ် သ္ဂးရ။
မွဲလ္ပာ်ဂှ်ပၠန် လ္ပာ်ဒပ်ပံၚ်ကောံပၠန်ဂတးတံ ကလေၚ်ဆုတ်ကလေၚ်အာဂှ်ရ ဗြုပန်ပှော် ဗြုပေါဲဗ္တိုက်ၜါလ္ပာ်တံ ဟွံဂွံမိၚ်ကေတ်တုဲ လ္ပာ်ကံၚ်ဇြဳပၞာန် ဂွံဆဵုကေတ်ဒၟံၚ် ရမျာၚ်လွဟ်ဇၞော်တံရောၚ် ဂွံတီကေတ် ဇရေၚ်ညးဒေသတံရ။
တုဲကၠုၚ် ပ္ဍဲဂိတုမာတ် ၂၅ တေံ ဒပ်ပံၚ်ကောံ မန်၊ ကရေၚ် ကေုာံ PDF တံ ဗ္တိုက်သီဂွံလဝ် ဗ္ဒိုပ်ဗၠာဲသၟိၚ်ကအ်ဗိန်တုဲ မွဲဒမြိပ်ဒေသၜဳဂြာၚ် ပရေၚ်ပၞာန်ကြံၚ်မ္ၚိုဟ်ၜါလ္ပာ်တံ ဆက်က္တဵုဒှ်ဒၟံၚ်ရ။
ဒပ်ကံၚ်ဇြဳပၞာန်ဝွံ နူဗ္ဒိုပ်ဗၠာဲသၟိၚ်ကအ်ဗိန်စှ်ေတုဲ မွဲဒမြိပ်ကွာန်သၚ်ကၠံ၊ ကြေဝ်ဏာ၊ ကအ်သိုက်၊ ဒဵုခရီု ပ္ဍဲပွိုၚ်ဍုၚ်ကျာ်မြဟ် မၞုံလ္တူဂၠံၚ်ကွဳစက်ရမ္မာဝတဳဂှ် သၠဲပ္တိုန်ဇြဟတ်တုဲ ကလေၚ်ဗ္တိုက်ဒၟံၚ် နကဵုဒပ်တိုက်၊ ဒပ်ဍာ်၊ ဒပ်ကျာတံရ။
ပ္ဍဲဂိတုဨပရဴ ၂၄ ဂှ်လေဝ် ပ္ဍဲပွိုၚ်ဍုၚ်ကျာ်မြဟ် ကွာန်ကအ်ဇြဲဂှ် ဟိုတ်နူလွဟ်ဇၞော် ဒပ်ကံၚ်ဇြဳပၞာန် ဒတုံစှ်ေတုဲ ညးဗြဴမွဲတၠ ဒးချိုတ်အာလဝ်တုဲ မၞိဟ်တြုံမွဲတၠ ကေုာံ မၞိဟ်ဗြဴမွဲတၠ ဇီုကပိုက်ကလိဂွံလဝ်ဝပ်ရောၚ် ဂွံတီကေတ် ဇရေၚ်ညးမၚ်ရံၚ်အကာဲအရာပရေၚ်ပၞာန်တံရ။
ပရိုၚ်−သြၚ်လောန်တိုၚ်(မ်)
ဗီု−SAC Telegram