မတ်မလီု၊ ဨပရဴ ၂၆
ဒုသ္ကိုပ်ဗိုလ်ဇၞော် သဵုဝေန် သီုကဵုဒှ်ဒုက္ဍိုပ်သ္ကိုပ်ပၞာန်သီအဝဵု မကၠေံဒၟံၚ်နူကဵုမတ်မၞိဟ် ပွိုၚ်ပိသတ္တာဟဂှ်ဝွံ ဆက်နွံဒၟံၚ် ပ္ဍဲဌာန်ဂအုပ်ပၞာန်ရးအဂၞဲ ဖျေံသ္ဇိုၚ်ဍုၚ်မတ်မလီုရောၚ် ဂွံတီကေတ် ဇရေၚ်တမ်ရိုဟ်ပရိုၚ်သြၚ်လောန်တိုၚ်(မ်) အပ္ဍဲဒပ်ရ။
ဒုက္ဍိုပ်သ္ကိုပ်ပၞာန် ကၠေံဒၟံၚ်နူမတ်မၞိဟ်တုဲ ပရိုၚ်တိတ်ဒၟံၚ်နာနာသာ်ဂှ်ဝွံ အခိၚ်လၟုဟ် သွက်ဂွံထိၚ်ဒက် ပေါဲဗ္တိုက်အပ္ဍဲတွဵုရးကရေၚ်ဂှ်ကဵု တွဵုရးဍုၚ်မန်ဂှ်တုဲ ဖျေံသ္ဇိုၚ် ပ္ဍဲဌာန်ဂအုပ်ပၞာန်ရးအဂၞဲတုဲ ကဵုဒၟံၚ်စၞောန်ပၟိၚ်ပရေၚ်ပၞာန်တံဂှ် ဂွံတီကေတ်ရ။
ဒုက္ဍိုပ်သ္ကိုပ်ပၞာန် ဇာတိပွိုၚ်ဍုၚ်ဘာအၚ် တွဵုရးကရေၚ်ဂှ်ဝွံ သွက်ဂွံကလေၚ်ကေတ် ဍုၚ်ဗြဝတဳဂှ် အလဵုညး ရပ်စပ်ဒၟံၚ် ပရေၚ်ပၞာန်အံၚ်ဇေယျ ကဆံၚ်ကၟိန်ဍုၚ်ဂှ်တုဲ ပေါဲဗ္တိုက်တွဵုရးဍုၚ်မန်ဂှ်လေဝ် ကဵုဒၟံၚ်အမိၚ်စၞောန် တိုက်ရိုက်ဏောၚ်ဂှ် တမ်ရိုဟ်ပရိုၚ်အပ္ဍဲဒပ်တံ သ္ဂးရ။
တမ်ရိုဟ်ပရိုၚ်အပ္ဍဲဒပ်မွဲတၠဂှ် ဒုက္ဍိုပ်သ္ကိုပ်ပၞာန်ဝွံ ဖျေံဒပ် ပ္ဍဲဌာန်ဂအုပ်ပၞာန်ရးအဂၞဲ ကရောံက္ဍိုပ် ဂကောံပရေၚ်ပၞာန်တၟေၚ် (ကစထမှူး) ဂှ်တုဲ ကောပ်ကာဲဒၟံၚ် ပရေၚ်ပၞာန်ဂှ် အဓိကရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“နွံမံၚ် ပ္ဍဲရးဂှ်ရဏောၚ်။ အလဵုဟွံအာပုဟ်။ ကရောံညးဂှ် က္ဍိုပ် ကစထမှူးလေဝ် နွံ။ ဂကောံဖျေံလွဟ်တုဲ ကလေၚ်စဴကၠုၚ်တံဂှ်လေဝ် လၟုဟ်ကလေၚ်ဗလးဒၟံၚ်မုက်ပၞာန်ယျ။ ကလေၚ်ကဵုလွဟ်တုဲတှ်ေ၊ နူတမ်ဝါဒိဂှ်ရ မုဟွံဒးပုဟ်။ ဟွံဒးမွဲသာ် ကောပ်ကာဲဒၟံၚ်ပရေၚ်ပၞာန်အဏံ။ နူစတမ် ဒဵုကဵုလၟုဟ် ကောပ်ကာဲဒၟံၚ်ပရေၚ်ပၞာန် ပ္ဍဲရးဂှ်ရ” သာ်ဝွံ သ္ဂးရ။
ဒုက္ဍိုပ်သ္ကိုပ်ပၞာန် ကၠေံဒၟံၚ်နူကဵုမတ်မၞိဟ်ဂှ်ဝွံ ဆက်ကေတ်ဒၟံၚ်တာလျိုၚ် ပရေၚ်စဵုဒၞါကဵု ပရေၚ်ဂီုကၠီုတံဖိုဟ်ဂှ် ညးမၞုံအခေါၚ်ဟီုဂးကံၚ်ဇြဳပၞာန် သ္ကိုပ်ဗိုလ်ဇြဝ်မေန်ထောန် ဟီုလဝ်ရ။
အတိုၚ်ဂလာန် တမ်ရိုဟ်ပရိုၚ်အပ္ဍဲဒပ်ဂှ်မ္ဂး ဒုက္ဍိုပ်သ္ကိုပ်ပၞာန်ဝွံ သွက်ဂွံကလေၚ်ကေတ် ဍုၚ်ဗြဝတဳဂှ် ပ္ညဳပ္ညပ်ကဵုကေတ်လဝ် ကုသ္ကိုပ်ဗိုလ်ဇၞော် သဝ်ချေတ်တူ ညးအုပ်ကာနာနာ ဒပ်မၚ်ပယျဵု BGF ဂှ် ဂွံတီကေတ်ရ။
“အဓိကဂှ်တှ်ေ ပညဳဒၟံၚ်ကဵုသဝ်ချေတ်တူရဏောၚ်။ သဝ်ချေတ်တူဂှ် ဂျဵုကာရဏောၚ်။ ရဲဂွံသဝ်ချေတ်တူဂှ်တှ်ေ ဇၞးပၞာန်ဏံရဏောၚ်။ ဒပ်ပၞာန်ဂှ်လေဝ် ကၟောန်လဝ် သဝ်ချေတ်တူပေၚ်ၚ်။ စပ်ကဵု ကမၠောန်ကျဖျ ညးကၠောန်ဒၟံၚ်လၟုဟ်ဂှ်တုဲ ကၠောန်ဒၟံၚ်ဂှ် တၟာဂလိုၚ်ဏောၚ်။ ပ္ညဳထောံ နကဵုဗီုပြၚ် ဟွံကေတ်အရေဝ် စပ်ကဵုကျဖျတံဂှ်ရ။ လၟုဟ်ဂှ်တှ်ေ ဒှ်အာသဘဴ ကလေၚ်ဂွံအာ ဗြဝတဳဂှ်ယျဏောၚ်။ ဂွံသဝ်ချေတ်တူတှ်ေ ဂွံဗြဝတဳရဏောၚ်။ အိုတ်ကၞောတ် ကလေၚ်စန်ဒက်ဏာ နကဵုဒတုဲဖဵုပရေၚ်ပိုန်ဒြပ်ဂှ် ကလေၚ်ပါအာပၠန်” သာ်ဝွံ သ္ဂးရ။
အခိၚ်လၟုဟ် ဒုက္ဍိုပ်သ္ကိုပ်ပၞာန်ဝွံ ကလေၚ်ထိၚ်ဒက်ဂွံဍုၚ်ဗြဝတဳ သီုဖအိုတ်တုဲ ညံၚ်စက်ယန်ညးယိုက်ဝန်တံ ဂွံကလေၚ်ဂေတ်ဂြိပ်မာန် ဆက်ပ္ညဳပ္ညပ်ဒၟံၚ်တံ နွံဒၟံၚ်ဂှ်လေဝ် တမ်ရိုဟ်ပရိုၚ်အပ္ဍဲဒပ်တံ ဟီုရ။
ဒုက္ဍိုပ်သ္ကိုပ်ပၞာန်ဝွံ တုဲကၠုၚ် ပ္ဍဲဂိတုဨပရဴ ၈ ကဵု ဂိတုဨပရဴ ၉ အပ္ဍဲလၟေၚ်ဒဒှ် ဌာန်ဂအုပ်ပၞာန်ရးအဂၞဲ ဒးဒုၚ်ဗ္တိုက်ကဵုဒရုၚ်ဂှ် ကလိဂွံဝပ်ဇီုကပိုက်အာတုဲ ဒးလွဳလွတ်မံၚ်ရောၚ် ပရိုၚ်တိတ်ဒၟံၚ်ဂှ် လ္ပာ်ဒပ်ပၞာန် ကယျာန်ပါဲလဝ်ကီုလေဝ် စပ်ကဵုလၟေၚ်ဒဒှ်ဏံတုဲ နကဵုသြၚ်လောန်တိုၚ်(မ်)လေဝ် သ္ပဒတန်တၞဟ်ခြာဟွံမာန်ရ။
ဒုက္ဍိုပ်သ္ကိုပ်ပၞာန်ဝွံ တုဲကၠုၚ်ပ္ဍဲဂိတုဨပရဴ ၃ တေံ တန်ဗ္တောန်အလံၚ်ဗိုလ် လၟေၚ် ၁၂၇ မကၠောန်ဗဒှ်လဝ် ပ္ဍဲဍုၚ်ဗထူ သ္ကုတ်သၠုၚ်ကျာတွဵုရးသေံ စှ်ေတန်ဗ္တောန်တုဲဂှ် ကၠေံဒၟံၚ်နူမတ်မၞိဟ် ဒဵုကဵုတ္ၚဲဏံရ။
ပရိၚ်−သြၚ်လောန်တိုၚ်(မ်)
ဗီု−MOI