ပ္ဍဲလံင်လုင် လွဟ်ဇၞော်စှ်ေတုဲ မိဇၞော်ဗျူမွဲတၠ ချိုတ်အာ

လံၚ်လုၚ်၊ ဨပရဴ ၂၇

ဟိုတ်နူဒပ်ကံၚ်ဇြဳပၞာန် ပန်ပှော်လွဟ်ဇၞော် အပ္ဍဲအရာပ် (က) ဍုၚ်လံၚ်လုၚ်၊ ရးဒေသဇၞော်တၞၚ်သဳဂှ်တုဲ မိဇၞော်ဗျူ အာယုက် ၇၅ သၞာံမွဲတၠ ချိုတ်အာတုဲ မၞိဟ်တြုံအာယုက်ဇၞော်ဇၞော်မွဲတၠ ကလိဂွံလဝ်ဝပ်ရောၚ် ဂွံတီကေတ် ဇရေၚ်ညးဒေသတံရ။

တုဲကၠုၚ် ပ္ဍဲဂိတုဨပရဴ ၂၅ အခိၚ်ဇိုၚ်သဝ်တ္ၚဲ ၜိုတ် ၃ နာဍဳဂှ် ဒပ်ကံၚ်ဇြဳပၞာန် ဖျေံလဝ်ဒပ် ပ္ဍဲရုၚ်ဂီုကၠီုစပ်ကဵုလ္ပာ်ပၞာန် ဍုၚ်လံၚ်လုၚ်ဂှ်ဝွံ ပေါဲဗ္တိုက်ဟွံမွဲမွဲသာ် ပန်ပှော်လဝ်လွဟ်ဇၞော် ပွဳပွူဗ္ဒါဲဍုၚ်ဂှ် ဟွံအောန်နူကဵု ၅ မရ။

မကမ်လွဟ်ဇၞော် ဒပ်ကံၚ်ဇြဳပၞာန် ပန်ပှော်လဝ်မွဲမဂှ် ဒတုံဗ္တိုဟ်ထ္ကးအာလဝ် အပ္ဍဲအရာပ် (က) တုဲ ဒဝ်ခေန်အေ မိဇၞော်ဗျူ အာယုက် ၇၅ သၞာံမွဲတၠဝွံ ပ္ဍဲဒၞါဲဒှ်ပရူဂှ်ရ ဒးက္ဍိုပ်တုဲ ချိုတ်အာလဝ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

သ္အာၚ်နူဂှ်ပၠန် ဗ္ဒါဲမကမ်လွဟ်ဇၞော်ဗ္တိုဟ်ထ္ကးဂှ် မၞိဟ်တြုံအာယုက်ဇၞော်ဇၞော် နွံဒၟံၚ်အဂှ်မွဲတၠလေဝ် ဒးမကမ်လွဟ်ဇၞော်တုဲ ကလိဂွံလဝ်ဝပ်ရောၚ် သ္ဂးရ။

လ္တူဍုၚ်လံၚ်လုၚ် အပ္ဍဲကာလသီအဝဵုဏံ ဟိုတ်နူပရေၚ်ပန်ပှော် ဒပ်ကံၚ်ဇြဳပၞာန်ကဵု ဒပ်ပံၚ်ကောံ ဂကောံဇြဟတ်ပၠန်ဂတးတံတုဲ မွဲဏှမွဲဏှဟီုဂွံ ညးဍုၚ်ကွာန်ကောန်အရာပ် ဇီုကပိုက်ချိုတ်တံ နွံဒၟံၚ်ရောၚ် ဂွံတီကေတ် အတိုၚ်ဂလာန်ညးဒေသတံရ။

အတိုၚ်တၚ်လလောၚ်တြး ဂကောံသုတေသန FE5 Taintharyi လလောၚ်ပ္တိတ်လဝ်ဂှ်မ္ဂး တုဲကၠုၚ် ပ္ဍဲသၞာံ ၂၀၂၂ ဂိတုဨပရဴ စဵုကဵုဂိတုမာတ် သၞာံဏံ အပ္ဍဲပွိုၚ် ၂ သၞာံ ပ္ဍဲရးတၞၚ်သဳဂှ် ညးဍုၚ်ကွာန်ကောန်အရာပ် ၅၄၁ တၠ ဒးဒုၚ်ပြိုက်ဂစိုတ်လဝ်ရောၚ် ပ္ဍဲဂိတုဨပရဴမံက်တေံ လလောၚ်ပ္တိတ်လဝ်လိက်ဒုၚ်စဳရေၚ်ရ။

ပရိုၚ်−သြၚ်လောန်တိုၚ်(မ်)

ဗီု−CJ