ကအ်ကြိက်၊ ဨပရဴ ၂၇
ဒပ်ကံၚ်ဇြဳပၞာန် လုပ်စိုပ်ထ္ပက်ကၠုၚ်ကရောၚ်ပၞာန် ပ္ဍဲကွာန်ကအ်ဗိန် ပွိုၚ်ဍုၚ်ကအ်ကြိက် တွဵုရးကရေၚ် နကဵုဇြဟတ်လၟိဟ်ဗွဲမဂၠိုၚ်ဂၠေၚ်တုဲ အလုံကွာန်မွဲ ဒးဂြိပ်ဒဴပါဲဒလေတ်ဒၟံၚ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲဂိတုဨပရဴ ၂၅ တေံ ဒပ်ကံၚ်ဇြဳပၞာန် ဇြဟတ်ၜိုတ် ၃၀၀ လုပ်စိုပ်ထ္ပက်ကၠုၚ်ကရောၚ်ပၞာန် ပ္ဍဲကွာန်ကအ်ဗိန် ဒၞါဲဗ္ဒိုပ်ဗၠာဲသၟိၚ်ကအ်ဗိန် ဒပ်ပံၚ်ကောံ ဂကောံဇြဟတ်ပၠန်ဂတးတံ ဗ္တိုက်သီဂွံလဝ်ဂှ်ရ။
ဒပ်ကံၚ်ဇြဳပၞာန် လုပ်စိုပ်ထ္ပက်ကၠုၚ်ကရောၚ်ပၞာန်ဂှ်ဝွံ ရပ်ဒက်ၜုၚ်တက် မၞိဟ်တြုံဒေသ သှ်ေဒၟံၚ် အပ္ဍဲကွာန်တံကီု၊ ညးဍုၚ်ကွာန်ဒေသ ဂ္စါန်ဂြိပ်ပၞာန်တံဂှ်လေဝ် ဟိုတ်ဟွံမွဲမွဲသာ် ပန်ပှော်လဝ်ရ။
ဒပ်ကံၚ်ဇြဳပၞာန် လုပ်စိုပ်ထ္ပက်ကၠုၚ်ကရောၚ်ပၞာန်တုဲ ညးဒေသ ဒၟံၚ်ကွာန်ကအ်ဗိန် လၟိဟ်မၞိဟ်ၜိုတ်မွဲဠက်ပြၚ်ဂှ်ဝွံ အလုံကွာန်မွဲ ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံကဵု လ္ပာ်ကွာန်ဗ္ဒါဲဗ္ဒါဲတံဂှ်ရောၚ် ဂွံတီကေတ် ဇရေၚ်ညးဒေသတံရ။
အတိုၚ်ဂလာန် ညးဒေသတံဂှ်မ္ဂး ဟိုတ်နူပရိုၚ် ဒပ်ကံၚ်ဇြဳပၞာန် ထ္ပက်ကရောၚ်ပၞာန် ပ္ဍဲကွာန်ကအ်ဗိန်ဏောၚ်ဂှ်တုဲ ၜိုတ် ၃ တ္ၚဲလောန်ကၠုၚ်တေံ ညးဒေသဗွဲမဂၠိုၚ် ဒစးဒုၚ်ဂြိပ်လဝ်တုဲ ကရောၚ်ပၞာန်လုပ်ကၠုၚ်တုဲမှ ညးဒေသသှ်ေဒၟံၚ်တံ ထပ်ဒးပါဲဒလေတ်ကၠုၚ်ဂှ် သ္ဂးရ။
ကရောၚ်ပၞာန်ကံၚ်ဇြဳပၞာန်ဝွံ စဵုကဵုဂိတုဨပရဴ ၂၆ ဂှ် ဆက်ဖျေံလဝ်ဒပ် ပ္ဍဲသ္ၚိဌာန်ညးဒေသတံကဵု ဘာလကျာ် ကွာန်ကအ်ဗိန်တံဂှ်တုဲ ပန်ပှော်ဒၟံၚ်လွဟ်ဇၞော်တံရောၚ် ဂွံတီကေတ်ရ။
ကရောၚ်ပၞာန်ဂှ်ဝွံ ပ္ဍဲဂိတုဨပရဴ ၂၅ ဂှ်လေဝ် ပန်ဂစိုတ်လဝ် ညးဗြဴဒေသ အာယုက် ၁၉ သၞာံ ဂ္စါန်ဂြိပ်ပၞာန် ကဵုကွဳလိုန်ဓာတ်ဂှ် နကဵုသေနာတ်ရ။
ဒပ်ကံၚ်ဇြဳပၞာန် ဒးဗလးလဝ်တဲ ဗ္ဒိုပ်ဗၠာဲသၟိၚ်ကအ်ဗိန်ဂှ်ဝွံ စနူဂိတုမာတ် သတ္တာဟလက္ကရဴအိုတ်ဂှ်တုဲ ထ္ပက်ဒၟံၚ်ကရောၚ်ပၞာန် ကွာန်မွဲဒမြိပ် ၜဳဂြာၚ်တံဂှ်တုဲ ၂၀ ကွာန်ပြၚ်၊ လၟိဟ်မၞိဟ် ဟွံအောန်နူကဵု မွဲကိုဋ်ပြၚ် ထောံလသာသ္ၚိဌာန် ဒးဂြိပ်ဒဴပါဲဒလေတ်ဒၟံၚ်ရောၚ် ဂွံတီကေတ် အတိုၚ်တၚ်နၚ် ကံၚ်ဇြဳဖေဝ်ဒရာဍုၚ်မန်ရ။
ပရိုၚ်−သြၚ်လောန်တိုၚ်(မ်)
ဗီု−Bhante Agga