မတ်မလီု၊ ဨပရဴ ၂၇
သွက်ဂွံဒစးဒုၚ်ကံက်စရၚ် ရဲတိုန်ဘာပၞာန် လၟေၚ် (၂) ပ္ဍဲပွိုၚ်ဍုၚ် တွဵုရးဍုၚ်မန်တံဂှ် နကဵုခရိုၚ်မဆေၚ်စပ်ဂမၠိုၚ် သွက်ဂွံရေၚ်တၠုၚ်ကောပ်ကာဲအာ ဗွဲမစှ်ေကဵုသၞောတ်ဂှ် ကံၚ်ဇြဳပၞာန် စၞောန်ပ္ညုၚ်ကၠုၚ်သ္ၚိတ်တ်ရ။
ပ္ဍဲကဵုတၚ်သ္ဂုတ်သွာတ် ဖျေံစၟတ်လဝ် လၟေၚ်ကမၠောန် ၅ သာ် နူကဵုကောံဓရီုပ္ညဳပ္ညပ် ပရေၚ်အုပ်ဓုပ် ကေုာံ ပရေၚ်ဂီုကၠီုတွဵုရး၊ ရုၚ်ဂကောံအလဵုအသဳတွဵုရးဍုၚ်မန် ကံၚ်ဇြဳပၞာန် မကၠောန်ဗဒှ်လဝ် ပ္ဍဲဂိတုဨပရဴ ၁ ဂှ် ကံက်စရၚ် ရဲတိုန်ဘာပၞာန်တံလဝ် ပါလုပ်ရ။
အပ္ဍဲပၞာန်သီအဝဵုပွိုၚ်ပိသၞာံဏံ ဟိုတ်နူပၞာန်ထ္ပက်အလုံဍုၚ်မွဲတုဲ ကံၚ်ဇြဳပၞာန် ဇြဟတ်ဍိုန်စှ်ေကၠုၚ်ဒၟံၚ်ဂှ် ပ္ဍဲဂိတုဖေဖဝ်ဝါရဳ ၁၀ တေံ ကြဴနူပၠောပ်လမျီု သၞောဝ်ဒးယိုက်ဂၠေၚ်လျိုၚ်ပၞာန်တုဲ စနူဂိတုဨပရဴ ၈ ဂှ် ပ္ဍဲကဵုဌာန်ဂအုပ်ရးပၞာန်နာနာတံဂှ် စကဵုလဝ်တန်ဗ္တောန်ကွတ်ပၞာန် လၟေၚ် (၁) ရ။
ဟိုတ်ဂှ်ရ သွက်လၟေၚ် (၂) ကၠုၚ်စိုပ်ဏံ သွက်ဂွံတိုန်စိုပ်တန်ဗ္တောန်ကွတ်ပၞာန် ပ္ဍဲတွဵုရးဍုၚ်မန်ဂှ် ဒစးဒုၚ်တုဲသွက်ဂွံကံက်ကေတ် စရၚ်ညးတိုန်ဘာပၞာန် မကိတ်ညဳကဵု တၚ်နၚ်တံမာန်ဂှ် ကံၚ်ဇြဳတွဵုရး စၞောန်ပ္ညုၚ်လဝ် ခရိုၚ်မဆေၚ်စပ်တံရ။
နာဲနဂါ ညးမၞုံအခေါၚ်ဟီုဂး ဒပ်စဵုဒၞါဍုၚ်မန် MSRF ပၠန်ဂတးဒၟံၚ် သၞောတ်တၠအဝဵုပၞာန်ဂှ် နကဵုညးဘိုၚ်ရေၚ်တၠုၚ်ဒၟံၚ် သၞောဝ်ယိုက်ဂၠေၚ်လျိုၚ်ပၞာန်ဂမၠိုၚ် သွက်ဂွံဒေါအ်ဒေၚ်ကဵု ကမၠောန်ညံၚ်အာယုက်တၠအဝဵုပၞာန် ဂွံဂၠိၚ်တံ လွာဲဂှ်ဂှ် ကဵုသတိဖ္တိုက်ဖ္အောဝ်လဝ်ရ။
“ညးမပူဗိုၚ်ရီုဗၚ်ရေၚ်တၠုၚ်ကဵုဒၟံၚ် သၞောဝ်ယိုက်ဂၠေၚ်လျိုၚ်ပၞာန် ကံၚ်ဇြဳပၞာန်တံဂမၠိုၚ် ညးအုပ်ဓုပ်တံ၊ ညးဍုၚ်ကွာန်၊ သၞာဲဒဴတံသီုဖအိုတ်ဂှ် နူကဵုဒၞါဲဏံ မိက်ဂွံကဵုသတိဒုၚ်ဂုဏ်မွဲဂှ်တှ်ေ ကမၠောန် ညံၚ်သၞောတ်တၠအဝဵုပၞာန် အာယုက်ဂွံဂၠိၚ်တံဂှ် ဒေါအ်ကဵုလွာဲဂှ်ညိ။ ဍေံတံ စကာမံၚ်ဂှ် မၞးတံ တးပါဲဟာ ဟွံသေၚ်မ္ဂး ဒုၚ်ကေတ်အရေဝ် နကဵုသၞောဝ်ပူဗိုၚ်ရေၚ်တၠုၚ် ကုဂကောံပကီုပရာပ်တံဂှ်ဟာ။ ညအ်ဂှ် မၞးတံ ဒးရုဲစှ်ယျဂှ် အဲမိက်ဂွံဟီုရ” သာ်ဝွံ သ္ဂးရ။
ပ္ဍဲဂိတုဨပရဴ ၂၃ တေံ ပ္ဍဲပွိုၚ်ဍုၚ်ရေဝ် ပွိုၚ်ဍုၚ်ခေါဇာ ကောန်ဒပ်ပျဳတုသေတ် ၅ တၠ ပ္ကောံဒၟံၚ်ကောန်ဒပ် သွက်သၞောဝ်ယိုက်ဂၠေၚ်လျိုၚ်ပၞာန် ကံၚ်ဇြဳပၞာန်တံဂှ် ဒပ်ပံၚ်ကောံမဟာမိတ်တံ ရပ်ဒက်တုဲ သီဂွံလဝ် သီုကဵုလွဟ်လက်နက်မကမ်တံရောၚ် MSRF ကေုာံ ဒပ်မဟာမိတ်တံ လလောၚ်ပ္တိတ်လဝ်ပရိုၚ်ရ။
ကၠောန်သ္ပလဝ် ပရေၚ်စၟဳတ် မၞုံပၟိက်တံဂှ်တုဲ ကောန်ဒပ်ပျဳတုသေတ်ပိတၠဂှ် ကလေၚ်ဗလးကဵုလဝ် ပ္ဍဲတ္ၚဲဂှ်ရတုဲ က္ဍိုပ်သ္ကိုပ်ၜါတၠဂှ်တှ်ေ ဆက်ထိၚ်လဝ်ကီုလေဝ် လွဟ်လက်နက်သီဂွံလဝ်တံဂှ် ဟိုတ်နူပၠံၚ်ကေတ် ပန်ပှော်လဝ်တုဲ ဒးပသောၚ်ထောံလဝ်ရောၚ် ဂွံတီကေတ် အတိုၚ်တၚ်လလောၚ်တြးဂှ်ရ။
နာဲနဂါဂှ် “ပံၚ်တောဲကဵု ကံၚ်ဇြဳပၞာန်တုဲ ဂကောံရပ်လွဟ်၊ မၞိဟ်ပူဂဵုလဵုဟွံဟီု ကၠောန်ၜိုတ်ဒၟံၚ်တံဂှ် နကဵုဒပ်ပၠန်ဂတးဍုၚ်မန် MSRF စွံစိုတ်ညံၚ်ရဴသၞတုဲ ၚးတးပသောၚ်အာ ပိုတ်တ်သ္ကုတ်တ်ဏောၚ်ဂှ် ပိုယ်တံ ဖျေံလဝ်မူ နွံဒၟံၚ်ရ” သာ်ဝွံ ဟီုတဴရ။
ဗော်ဍုၚ်မန်တၟိ AD ဂှ်လေဝ် ဂကောံအုပ်ဓုပ်ကွာန် နူကျာ်မြဟ်၊ မုဟ်ဍုၚ်၊ ဇြပ်ဗု ကေုာံ နူရေဝ်သၟဝ်ကျာ ရေၚ်တၠုၚ်ကဵုဒၟံၚ် သွက်ဂွံလုပ်ပၞာန် သွက်ကံၚ်ဇြဳပၞာန်တံဂှ် ကေတ်အာအရေဝ် ပိုတ်တ်သ္ကုတ်တ်ဏောၚ်ဂှ် ပ္ဍဲဂိတုမာတ် သတ္တာဟတတိယတေံ လလောၚ်ပ္တိတ်ကဵုလဝ်အမိၚ်ရ။
အတိုၚ်စရၚ် နူကဵုသြၚ်လောန်တိုၚ်(မ်) ပ္ကောံပ္ကေဝ်ဂွံလဝ်ဂှ်မ္ဂး ပ္ဍဲအရာပ္ကောံညးတိုန်ဘာပၞာန် ဟိုတ်နူသၞောဝ်ယိုက်ဂၠေၚ်လျိုၚ်ပၞာန်ဂှ် သ္ကိုပ်အုပ်ဓုပ် ကေုာံ က္ဍိုပ်သ္ၚိကၠံ ဗက်ရီုဗၚ်ရေၚ်တၠုၚ်ကဵုဒၟံၚ် ပ္ဍဲပွိုၚ်ဍုၚ်ကျာ်ထဝ်၊ ၜဳကလေၚ်၊ ဇြပ်ဗု ကေုာံ ပွိုၚ်ဍုၚ်ရေဝ် နူတွဵုရးဍုၚ်မန်တံဂှ် ဟွံအောန်နူကဵု ၁၀ တၠ ဒးဒုၚ်ဂစိုတ်လဝ်ရ။
ညးလ္ၚတ်သ္ၚဳဂၠိပ်ပရေၚ်ဍုၚ်ကွာန် ဥူတာန်သဵုနာၚ်ဂှ် သၞောဝ်ယိုက်ဂၠေၚ်လျိုၚ်ပၞာန် ကံၚ်ဇြဳပၞာန် စၞောန်ပျးလဝ်ဂှ်ဝွံ ရပ်ဒက်ဒၟံၚ်ညးသၟတ်တံ ဟွံဗဗွဲကဵုသၞောဝ်ဂှ်ရ ရဲဘိုၚ်ကၠောန်ကဵုဒၟံၚ် ဗွဲမဂၠိုၚ် ဒးဒုၚ်စွံပွန် ဒးဒုၚ်ဗ္တိုက်ဒၟံၚ်ရောၚ် သ္ၚဳဂၠိပ်လဝ်ရ။
“ကံၚ်ဇြဳပၞာန် စၞောန်ပျးသၞောဝ်ယိုက်ဂၠေၚ်လျိုၚ်ပၞာန် ဟွံဗဗွဲကဵုသၞောဝ်ဂှ်တုဲ ရပ်ဒက်ထောံ ညးသၟတ်တံဂှ်တုဲ ဂြိပ်တိတ်ဍုၚ်မ္ၚးတံကီု၊ ဂြိပ်အာ ပ္ဍဲဒေသကောန်ဍုၚ်အရၚ်တံကီု ရဲဂြိပ်ဟွံမာန်ဂှ်တှ်ေ ဒးဒုၚ်ရပ်ရ။ အေ ဂှ်တှ်ေ ကမၠောန်တံဏံဂှ် ညးဍုၚ်ကွာန်တံ ဟွံဒးစိုတ်တုဲ မၞိဟ်ကၠောန်တံဂှ် စွံပွန်ဗ္တိုက်ဒၟံၚ်တံ ဂၠိုၚ်ကွေံကွေံဏောၚ်။ ဆ္ဂး ကလောန်ဏံ (ပ္ကောံကောန်ပၞာန်) ဆက်ကၠောန်အာဒၟံၚ်ဏီမ္ဂး အဲခယျဂှ်တှ်ေ ကိစ္စဂစိုတ်ဂယိုၚ် က္ဍိုပ်သ္ၚိကၠံတံဂှ် ဆက်နွံအာဒၟံၚ်ဏီဏောၚ်” သာ်ဝွံ သ္ဂးရ။
အတိုၚ်လိက်ဒုၚ်စဳရေၚ် ဂကောံလ္ၚတ်ပဋိပက္ခ ကေုာံ ကေၚ်ကာဗၟာ BACS လလောၚ်ပ္တိတ်လဝ် ပ္ဍဲဂိတုဨပရဴ ၁၃ ဂှ်မ္ဂး သွက်တန်ဗ္တောန်ကွတ်ပၞာန် လၟေၚ် (၁) ဂှ် အလုံဍုၚ်မွဲ ညးသၟတ် ၄၃၀၀ ပြၚ်ဂှ် ကံၚ်ဇြဳပၞာန် ပ္ကောံဒၟံၚ်ကောန်ပၞာန်တုဲ ပလံၚ်ဏာလဝ် ပ္ဍဲဘာကွတ်ပၞာန် ၁၅ ဘာရောၚ် ထ္မံက်ထ္ၜးလဝ်ရ။
ပ္ဍဲတွဵုရးဍုၚ်မန် ပ္ဍဲတန်ဗ္တောန်ဒပ်ပၞာန်ကဆံၚ်သၠုၚ် တကက−၄ ဖျေံသ္ဇိုၚ်ကွာန်ဝါကလိ မၞုံပွိုၚ်ဍုၚ်ဇြပ်ဗုဂှ် ညးတိုန်ဘာပၞာန် ဒးဒုၚ်ပ္ကောံပကောန်ပၞာန်ဂှ် ၂၀၀ ပြၚ် နွံဒၟံၚ်ရောၚ် ဂွံတီကေတ် အတိုၚ်လိက်ဒုၚ်စဳရေၚ် BACS ရ။
ပရိုၚ်−သြၚ်လောန်တိုၚ်(မ်)
ဗီု−MSRF/SAC Telegram