လ္ဂုၚ်၊ ဨပရဴ ၂၇
အကြာၜါဍုၚ် ဂွံတၚ်တုပ်စိုတ်တုဲ လှာဲလဝ် သ္ၚာတမ္ၚာကောန်ဍုၚ်ဗေန်ဂလာန်ဒေတ် ၁၇၃ တၠ ဒးဒုၚ်ရပ်လဝ် ပ္ဍဲဍုၚ်ဗၟာကဵု ဒပ်မၚ်ပယျဵုကံၚ်ဇြဳပၞာန် ၂၈၈ တၠ ဂြိပ်တိတ်အာ အပ္ဍဲပေါဲဗ္တိုက်တံဂှ်ရောၚ် ဂွံတီကေတ်ရ။
က္ၜၚ်ဒပ်ဍာ်ဗၟာ ဖ္ဍိုက်ပ္တိုန်နၚ် သၟာတမ္ၚာဗေန်ဂလာဒေတ် လ္တူၜဳချေန်တွေန်တုဲ ကောန်ဒပ်ညးတံဂှ် ကလေၚ်ကော်ဏာ နကဵုက္ၜၚ်ဏံရဂှ် ဒပ်မၚ်ပယျဵု ဗေန်ဂလာန်ဒေတ် ဟီုရ။
ကောန်ဒပ်ဂီုကၠီု ကံၚ်ဇြဳပၞာန် ကလေၚ်ကော်ဏာတံဂှ်ဝွံ ပ္ဍဲရခေၚ် ကြဴနူဒှ်ပေါဲဗ္တိုက် အကြာဒပ်ကံၚ်ဇြဳပၞာန်ကဵု ဒပ်ပၞာန်ရခေၚ် AA တံတုဲဂှ် ဒှ်ညးဂြိပ်လုပ်အာ ပ္ဍဲဍုၚ်ဗေန်ဂလာန်ဒေတ်တံ မဒှ်ရ။
ဣဏံဝွံ အပ္ဍဲဂၠိုၚ်ကဵုဂိတုဏံ ကောန်ဒပ်ကံၚ်ဇြဳပၞာန် နူဍုၚ်ဗၟာတံ ဂြိပ်တိတ်အာ ပ္ဍဲဍုၚ်ဗေန်ဂလာန်ဒေတ် အလန်ဒုတိယဂှ် ဂွံတီကေတ်ရ။
တုဲကၠုၚ် ပ္ဍဲဂိတုဖေဖဝ်ဝါရဳတေံ ဗေန်ဂလာဒေတ် ကလေၚ်ပလံၚ်ဖျဴလဝ် ကောန်ဒပ်ကံၚ်ဇြဳပၞာန် ၃၃၀ တၠ တံဂှ်ကီုလေဝ် လ္ပာ်ဍုၚ်ဗၟာ လှာဲလဝ်မၞိဟ်ဂှ် ဟွံမွဲရ။
အလန်ဏံဂှ်တှ်ေ သၞာဲဒဴဗေန်ဂလာန်ဒေတ်တံ မိက်ဂွံကလေၚ်ကော် ကောန်ဍုၚ်ညးတံ ဒးမံၚ်ထံၚ် ပ္ဍဲဍုၚ်ဗၟာဂှ်ရောၚ် ဟီုလဝ်ရ။
ညးချဳဒရာၚ်ကတိုၚ်ကၟဟ် ဗေန်ဂလာန်ဒေတ်လ္ၚဵုတံဂှ် နူအခိၚ်ၚ်ပြဟ်ဟ်တေံ ထေက်ကဵုဒးကလေၚ်ဗလး သၟာတမ္ၚာတံဏံဂှ်ကီု၊ ဟွံဒးလှာဲကဵု ကောန်ပၞာန်ဗၟာတံပုဟ်ဂှ် သ္ဂးဒၟံၚ်အိုတ်ရ။
သၟာတမ္ၚာ လုပ်စိုပ်ကၠုၚ် အပ္ဍဲတွဵုဒၞက်တိဍာ်ဍုၚ်ဗၟာတံဂှ် ဒပ်ဍာ် ရပ်လဝ်တုဲ ကၠတ်ပါမ်ကဂှ် ဒဏ်ထံၚ် ၅ သၞာံ၊ ကၠတ်လုပ်စိုပ်ဂှ် ဒဏ်ထံၚ် ၇ သၞာံ အပံၚ်ဖအိုတ် ၁၂ သၞာံ လေပ်ဖျေံတဴဒုဟ်ဒဏ်ဂှ် ဂွံတီကေတ်ရ။
ဌာနဝန်ဇၞော်ဗေန်ဂလာန်ဒေတ်ဂှ် နကဵုဇကုတံ ကောန်ဒပ်မၚ်ပယျဵု ဂြိပ်တိတ်ကၠုၚ် နူဍုၚ်ဗၟာတံဂှ် ကဵုဇူဒီုလဝ် နဒဒှ်ပရေၚ်ဗ္စာရဏာမၞိဟ်တုဲ ဆန္ဒမိက်ဂွံပါလုပ် ပ္ဍဲပေါဲပၞာန်ဍုၚ်ဗၟာ ဟွံမွဲပုဟ်ဂှ် ဟီုလဝ်ရ။
Ref: VOA