ဗေကျေန်၊ ဨပရဴ ၂၈
ဍုၚ်ဇြဟတ်ဇၞော်ဂၠးတိ ၜါဍုၚ်ဝွံ စၞးဒးပြိုၚ်ပ္ကာန်ညးသ္ကအ်ဂှ် ထေက်ကဵုဒးဒှ်မိဿဟာဲရောၚ် သမ္မတကြုက် ယှဳကျေန်ဖျေန် ဟီုကဵု ဝန်ဇၞော်ကာဍုၚ်သ္အာၚ်အမေရိကာန် အာန်တဝ်နဳယိုဝ် ဘလေန်ကာန်ရ။
သမ္မတယှဳဂှ် ပ္ဍဲပရေၚ်ဆက်ဆောံညးတံ ကိစ္စဒးပသောၚ်ကလး ဗွဲမဂၠိုၚ် နွံဒၟံၚ်ရောၚ် အခိၚ်ဆဵုဂဗကဵု ဘလေန်ကာန်ဂှ် ဟီုလဝ်ရ။
အပ္ဍဲပွိုၚ်မွဲသၞာံ ဘလေန်ကာန် စိုပ်ကၠုၚ်ဍုၚ်ကြုက် အလန်ဒုတိယဂှ်ဝွံ ပ္ဍဲဗေကျေန် ဆဵုဂဗအာကဵု သၟာပရေၚ်ဍုၚ်ကွာန်ကြုက် ကဆံၚ်လ္တူတံဏောၚ်တုဲ ပ္တိုန်ထ္ၜးသဳကၠဳအာ ကိစ္စပရေၚ်သွံရာန်ဗၞိက် ကေုာံ ပရေၚ်ကြုက်၊ ထိုၚ်ဝါန်တံ မပါလုပ် သွာၚ်လစွံစိုတ်ဟွံတုပ် အဓိကတံဂှ်ဏောၚ်ဂှ် သၞာဲဒဴအမေရိကာန်ဂမၠိုၚ် ဟီုရ။
သၞာံတုဲကၠုၚ်တေံ သမ္မတအမေရိကာန် ဆဵုဂဗကဵု ဂျဵုဗိုၚ်ဒေန်တုဲ နကဵုဍုၚ်ဇကုတံၜါဍုၚ် ညံၚ်ပရေၚ်တောတက်ဂွံနွံ ဒးကၠောန်ဏောၚ်ဂှ် ယှဳ ဟီုလဝ်ရ။
သ္အာၚ်နူဂှ်ပၠန် ပရေၚ်ဖောအ်ဗြေဝ်တောတက်ဍုၚ်ကြုက်ဂှ်လေဝ် အမေရိကာန် သွက်သ္ဂောံညာတ်ကဵု နကဵုလညာတ်လက္ချန်လဟဵုဂှ် ညးတံ စၟဳစလဝ်ရောၚ်ဂှ်လေဝ် ညးဟီုလဝ်ရ။
ပြသၞာအဓိကတံဂှ် ယဝ်ရသောၚ်ကလးအာဏောၚ်မ္ဂး ပရေၚ်ဆက်ဆောံၜါဍုၚ် ညိၚ်ဝတ်တုဲ သာခိုဟ်ကၠုၚ်ဏောၚ်တုဲ ဆက်အာဂတမာန်ရောၚ် သမ္မတယှဳ ဟီုလဝ်ရ။
ပ္ဍဲပရေၚ်ဆက်ဆောံ ကြုက်ကဵု အမေရိကာန်ဂှ် ထိုၚ်ဝါန်ဝွံ ဒှ်စေဝ်သာ်ဗ္ကေတ်ပထမ တတ်ၜက်ဟွံထေက်ရောၚ် ဝန်ဇၞော်ကာဍုၚ်သ္အာၚ်ကြုက် ကဵုလဝ်သတိ ကုဘလေန်ကာန် ပြဟ်ဟ်တေံရ။
နကဵုဘလေန်ကာန် သွက်ဂွံကၠောန်ပေါဲသောၚ်ကလးလိက်ပရိုၚ် ပ္ဍဲရုၚ်ကလုတ်အမေရိကာန် ဖျေံသ္ဇိုၚ်ဗေကျေန် နွံဒၟံၚ်ဂှ် ဂွံတီကေတ်ရ။
Ref: AFP/CNA