သဓီု၊ ဨပရဴ ၂၈
ဗ္ဒိုပ်ဗၠာဲသၟိၚ်တိဍာ် (သိမ်ဆိပ်) မၞုံဍုၚ်သုဝဏ္ဏဝတဳ ပွိုၚ်ဍုၚ်သဓီု တွဵုရးဍုၚ်မန်ဂှ်ဝွံ ပ္ဍဲဂိတုဨပရဴ ၂၇ အခိၚ်နူဂယး ၜိုတ် ၉ နာဍဳဂှ် ဒးဒုၚ်ဗ္တိုက်ကဵုဒရုၚ်တုဲ ကောန်ဒပ်ဗၠာဲသၟိၚ် ၄ တၠ ကလိဂွံလဝ်ဝပ်ရောၚ် ညးမစုက်လုက်ကဵု ဗ္ဒိုပ်ဗၠာဲသၟိၚ်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဒပ်ပံၚ်ကောံ ဂကောံဇြဟတ်ပၠန်ဂတးတံ ထောံဖျေံမခတိုဟ် နကဵုဒရုၚ် ၃ မတုဲ ဗ္တိုက်လဝ် ဗ္ဒိုပ်ဗၠာဲသၟိၚ် (သိမ်ဆိပ်) ဂှ်တုဲ ဒတုံဗ္တိုဟ်ထ္ကးအာလဝ် လ္တူဗ္ဒိုပ်ရုၚ်သ္ကိုပ်ဗ္ဒိုပ်ဂှ်မွဲမ၊ လ္တူဗာန်ကာဂှ်မွဲမ၊ အကြာဗာန်ကာ ကဵု ဗ္ဒိုပ်ဂှ်မွဲမ မဒှ်ရ။
အပ္ဍဲလၟေၚ်ဒဒှ် ဒးဒုၚ်ဗ္တိုက်ကဵုဒရုၚ်ဂှ် အကြာပ်ဒပ်ဗၠာဲသၟိၚ်မွဲတၠ မပါလုပ် ကောန်ဒပ်ဗၠာဲသၟိၚ် ၄ တၠ ဇီုကပိုက်ကလိဂွံလဝ်ဝပ်တုဲ ကၟဳစမြိုၚ်ဗ္ဒိုပ်ဗၠာဲသၟိၚ် လီုလာ်အာတဝ်တံ နွံဂှ် ဂွံတီကေတ်ရ။
ကြဴနူဒးဒုၚ်ဗ္တိုက်ထောံမခတိုဟ် ကဵုဒရုၚ်တုဲဂှ် လ္ပာ်ဒပ်ဗၠာဲသၟိၚ် ဗက်ပန်လဝ် ဒရုၚ်ဂှ်တုဲ ဒရုၚ်မွဲမ လီုစှ်ေလဝ် လ္တူဂၠံၚ်ကာဇၞော် လ္ဂုၚ်−မတ်မလီုတုဲ သီဂွံလဝ်ရောၚ် သ္ဂးရ။
ပ္ဍဲထလဳဂရာမ်ချာန်နေဝ် ရဲထံက်ဂလာန်ဒပ်ပၞာန်တံဂှ် အပ္ဍဲလၟေၚ်ဒဒှ် ဗ္ဒိုပ်ဗၠာဲသၟိၚ် (သိမ်ဆိပ်) ဒးဒုၚ်ဗ္တိုက်ကဵုဒရုၚ်ဂှ် ကောန်ဒပ်ဗၠာဲသၟိၚ်တံ ဇီုကပိုက်ကလိဂွံလဝ်ဝပ် ဟွံမွဲပုဟ်ဂှ် ချူထ္မံက်ထ္ၜးလဝ်တံ နွံဒၟံၚ်ရ။
ဗ္ဒိုပ်ဗၠာဲသၟိၚ် (သိမ်ဆိပ်) ဂှ် သၞာံတုဲကၠုၚ် ပ္ဍဲဂိတုဨပရဴ ၁၇ တေံ ကောန်ဒပ်ဗၠာဲသၟိၚ်တံ ကၠုၚ်စိုပ်ဗ္တိုက်လဝ်တုဲ ပရေၚ်ပန်ပှော်ၜါလ္ပာ် က္တဵုဒှ်လဝ်တုဲ ကောန်ဒပ်ဗၠာဲသၟိၚ်လ္ၚဵု ဇီုကပိုက်ကလိဂွံလဝ်ဝပ်တံ နွံလဝ်ရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−CJ