ဘာပန်၊ ဨပရဴ ၂၈
ဒပ်ပံၚ်ကောံ KNLA တံ ဗ္တိုက်သီထောံ တမ်ဒပ်ကံၚ်ဇြဳပၞာန် ခမရ ၄၃၄ မၞုံဍုၚ်ဘာပန် တွဵုရးကရေၚ်တုဲဂှ် ကောန်ဒပ်ကံၚ်ဇြဳပၞာန်တံဝွံ ဗျူဟာပၞာန်ဘာပန်ကဵု တမ်ဒပ် ၂ ဒပ် ကလေၚ်ပကောံတုဲ တဝ်စၞေဟ်ဗ္တိုက်ဒၟံၚ်ရောၚ် ညးမၞုံအခေါၚ်ဟီုဂး ဒပ်မဟာ ၅ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တုဲကၠုၚ် ပ္ဍဲဂိတုဨပရဴ ၂၅ တေံ ဒပ်ပံၚ်ကောံမဟာမိတ် ဒပ်မဟာ ၅ KNLA တံ လုပ်စိုပ်ဗ္တိုက်လဝ် တမ်ဒပ်ဗ္ဒိုပ်ဗၠာဲသၟိၚ် ခမရ ၄၃၄ ဒပ်ကံၚ်ဇြဳပၞာန် မၞုံအပ္ဍဲတိဍာ် ဒပ်မဟာ ၅ ခရိုၚ်ဘာပန် KNU ဂှ်တုဲ သီဂွံလဝ် လွဟ်လက်နက်မကမ် ဗွဲမဂၠိုၚ်ဂၠေၚ်ရ။
အခိၚ်လၟုဟ် ဒပ်ကံၚ်ဇြဳပၞာန်ဝွံ ဗျူဟာပၞာန် ဖျေံသ္ဇိုၚ်ဘာပန် သှ်ေဒၟံၚ်တံကဵု တမ်ဒပ် ခမရ ၃၄၀၊ ခမရ ၃၄၁ တံ ကလေၚ်ပကောံတုဲ တဝ်စၞေဟ်ဗ္တိုက်ဒၟံၚ်ရောၚ် ညးမၞုံအခေါၚ်ဟီုဂး ဒပ်မဟာ ၅ KNU သ္ကိုပ်ဗိုလ်ဇၞော် သဝ်ကလာဒိုဝ် သ္ဂးရ။
ပ္ဍဲဂိတုမာတ်တုဲကၠုၚ်တေံ ဒပ်ပံၚ်ကောံပၠန်ဂတးမဟာမိတ် KNLA တံ ဗ္တိုက်ထိၚ်ဂွံလဝ် ဍုၚ်ဘာပန်တုဲ ဗျူဟာ ဒပ်ကံၚ်ဇြဳပၞာန် သှ်ေဒၟံၚ်တံကဵု ဌာန်ဂအုပ်တမ်ဒပ်တံဂှ် ဆက်ကၟာတ်လဒဵုဗ္တိုက်လဝ်တုဲ ပ္ဍဲဂိတုမာတ်အိုတ်ဂှ် သီဂွံလဝ် တမ်ဒပ် ခလရ ၁၉ တုဲ ပ္ဍဲဂိတုဨပရဴကြပ်အိုတ်ဂှ်လေဝ် သီဂွံလဝ်တမ်ဒပ် ခမရ ၄၃၄ ရ။
ကၠာဒပ်ပံၚ်ကောံမဟာမိတ် KNLA တံ ဟွံဂွံစဗိုၚ်ကၟာတ်လဒဵု ဌာန်ဂအုပ်တမ်ဒပ် ကေုာံ ဗျူဟာကံၚ်ဇြဳပၞာန် မၞုံသၠုၚ်ကျာ ဍုၚ်ဘာပန်တုဲဂှ်ကဵု ကြတ်ဗ္တိုက် ကၟာတ်လဒဵုတုဲဂှ် ဒပ်ကံၚ်ဇြဳပၞာန် ဗ္တိုက်ဂြာတ်လဝ်မခတိုဟ် နကဵုက္ၜၚ်ကျာ ကုဍုၚ်ဘာပန် ကေုာံ ကွာန်ဗ္ဒါဲဗ္ဒါဲတံဂှ် ဗွဲမသ္ကာတ်မြဟ်တုဲ ညးဍုၚ်ကွာန်ကောန်အရာပ်တံ ဒးဇီုကပိုက်ချိုတ်အာလဝ်ရ။
ဒပ်ကံၚ်ဇြဳပၞာန် ဗ္တိုက်ဒၟံၚ်ကဵုပၞာန်ကျာ ပ္ဍဲဍုၚ်ဘာပန်ကဵု ဒၞါဲပွဳဗွိုၚ်ဗ္ဒါဲဗ္ဒါဲတံဂှ် အရိုဟ်ဒဒှ်တ္ၚဲတုဲ ညးဍုၚ်ကွာန်ဒေသတံဝွံ ဟွံဂံၚ်ကလေၚ်မံၚ် လ္တူဍုၚ်ဘာပန်ဏီတုဲ ဒးပါဲဒလေတ်ဒၟံၚ်ဖိုဟ်ဂှ် သ္ကိုပ်ဗိုလ်သဝ်ကလာဒိုဝ် သ္ဂးရ။
တုဲကၠုၚ် ပ္ဍဲဂိတုမာတ်ကြပ်အိုတ်တေံ ဟိုတ်နူပရေၚ်ဗ္တိုက်တရဴကျာ ဒပ်ကံၚ်ဇြဳပၞာန်တုဲ ညးဗြဴမၞုံကဵုဒၟုၚ်ဒၠေၚ်တံကဵု ကောန်ၚာ်သၟတ်တံ မပါလုပ် ကောန်အရာပ် ၈ တၠ ဒးချိုတ်အာလဝ်တုဲ စမြိုၚ်သ္ၚိဌာန်ဗွဲမဂၠိုၚ် ဒးဇီုကပိုက်လီုလာ်အာလဝ်တုဲ ညးဍုၚ်ကွာန်ကောန်အရာပ်ဂမၠိုၚ် ဒးဂြိပ်ဒဴပါဲဒလေတ်ဒၟံၚ်ရောၚ် ဂကောံအခေါၚ်အရာမၞိဟ်ကရေၚ် KHRG လေဝ် လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−NUG