မတ်မလီု၊ ဨပရဴ ၂၇
တွဵုရးဍုၚ်မန် လ္တူဍုၚ်မတ်မလီု သွက်ဂွံလုပ်ပၞာန်တုဲ ဒပ်ကံၚ်ဇြဳပၞာန်ကဵု ကောန်ဒပ်ဗၠာဲသၟိၚ်တံ အာတ်စရၚ် နူဇရေၚ်သ္ကိုပ်အုပ်ဓုပ်ကွာန်၊ အရာပ်တံတုဲ ဗက်ရပ်ဒၟံၚ် ညးသၟတ်အာယုက်ပေၚ်တုဲတံ နွံဒၟံၚ်ရောၚ် ညးလ္တူဍုၚ်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကောန်ဒပ်ကံၚ်ဇြဳပၞာန် သၟဝ်တဲကံၚ်ဇြဳပၞာန်တံဝွံ အခိၚ်ဗ္တံမ္ဂး နကဵုဟိုတ်ပရေၚ်ဂီုကၠီုတံဂှ် ဂေတ်ဒၟံၚ်ကၚ်ကီု၊ စၟဳတ်သၟာန်သၟုက်ဒၟံၚ် စၟအ်အ်ဒၞါဲတုဲ ညးသၟတ် ပါလုပ်ပ္ဍဲစရၚ်သ္ဂောံလုပ်ပၞာန်တံဂှ် ရပ်ဒက်ကၠုၚ်လွာဲဂှ်တံ နွံကၠုၚ်လဝ်ရ။
ပါလုပ်ဒၟံၚ် ပ္ဍဲစရၚ်လုပ်ပၞာန်တံဂးတုဲ ညးသၟတ် ဒးဒုၚ်ရပ်တံဂှ် ပလံၚ်ဗစိုပ်လဝ် ဇရေၚ်ဌာနပ္ကောံကောန်ပၞာန် ဗ္ဒါဲတိုက်ထ္ၜးပျးယေန်သၞာၚ်မန် လ္တူဍုၚ်မတ်မလီုဂှ်တုဲ ပကောံဒၟံၚ်မၞိဟ်တၟိ သွက်ဘာတန်ဗ္တောန်ကွတ်ပၞာန် လၟေၚ် (၂) ဂှ်ရောၚ် ဂွံတီကေတ်ရ။
ညးဒေသမတ်မလီုမွဲတၠဂှ် အပ္ဍဲတ္ၚဲတုဲကၠုၚ်တေံ ကော်ဏာညးသၟတ် ၃ တၠ ပ္ဍဲကဵုဂၠံၚ် နကဵုကွဳစက်ပၞာန်တုဲ ပလံၚ်ထောံလဝ် ပ္ဍဲဒၞါဲပကောံကောန်ပၞာန်တံဂှ်တုဲ အခါမိမသၟတ်တံဏံ သၟာန်တဴဂှ် ကော်ဏာလဝ် အတိုၚ်စရၚ်ယိုက်ဂၠေၚ်လျိုၚ်ပၞာန် သ္ကိုပ်အုပ်ဓုပ်ဏောၚ်ဂှ် လဴထ္ၜးလဝ်ရ။
“ပ္ဍဲအရာပ် (တောၚ်ရိုးတန်း) ဂှ် သၟတ်ဗၠာဲမူသလေန်ၜါတၠကဵု ဟိန္ဒူ ၁ တၠ စပုၚ်တုဲ စဴနူစက်ဍာ်ကလောံ။ စဴကၠုၚ်တုဲ အေဒၞါဲဂှ် ကွဳစက်ပၞာန်မွဲဖ္ဍိုက် စိုပ်ကၠုၚ်တုဲ ကော်ဏာဍေံတံ။ ဗွဲကြဴမှ ကလေၚ်ဂွံအဆက်။ စိုပ်ဒၟံၚ် ဒၞါဲပကောံကောန်ပၞာန်တံဂှ်ယျ။ မိမဍေံတံ ဗက်ကဵုလှုဲဂှ် မုဟီုရောဟီုတှ်ေ နွံဒၟံၚ် ပ္ဍဲရုၚ်သ္ကိုပ်အုပ်ဓုပ်ဍေံတံဂး။ ညအ်ဂှ် သွက်ဂွံလုပ်ပၞာန် အာတ်လဝ်တံဂှ်ဏောၚ်။ ဗီုဓာတ်တံဏံ ဗီုတံဏံ ကော်ဂွံဂးတုဲ ဍေံတံကော်ဏာ။ ကော်ဏာလဝ် အတိုၚ်တၚ်စၞောန် သ္ကိုပ်အုပ်ဓုပ်ဂှ်တုဲ စၠောံလဝ်သ္ကိုပ်အုပ်ဓုပ်ဂှ်ရ” သာ်ဝွံ သ္ဂးရ။
သ္အာၚ်နူဂှ်ပၠန် ကောန်ဒပ်ကံၚ်ဇြဳပၞာန်တံဝွံ ဗွဲကြဴဏံ အတိုၚ်သၞောဝ်ယိုက်ဂၠေၚ်လျိုၚ်ပၞာန်ဂှ် ဟွံပလံၚ်လိက်ကော် ကုညးသၟတ်တံဂှ်ရတုဲ ညးသၟတ်တိတ်မ္ၚး အခိၚ်ဗ္တံတံဂှ် ဗီုဒးစိုတ်ရပ်တုဲ ပကောံကၠုၚ်ဒၟံၚ်ကောန်ပၞာန်တံရ။
ညးဒေသလ္တူဍုၚ်မွဲတၠပၠန်ဂှ်လေဝ် လ္ပာ်ကံၚ်ဇြဳပၞာန် ရပ်ဒက်ညးသၟတ်တံ အခိၚ်ဗ္တံတုဲ ပ္ဍဲအရာပကောံကောန်ပၞာန်တံဂှ် ၜိုတ်လှုဲ ဍေံတံမိက်ဂွံဂွံတံဂှ် ကဵုကလေၚ်နုက်ဒၟံၚ်တုဲ ဗ္တံ ၉ နာဍဳတုဲမ္ဂး မၞိဟ်အာကၠုၚ် စဵုကဵုဟွံမွဲ အောန်အာယျဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ဍာံဍာံဂှ် အခိၚ်ဗ္တံ ၜိုတ် ၁၀ နာဍဳတှ်ေ ဍေံတံ မၚ်မံၚ် ဒၞါဲမၞိဟ်ပိုတ်တံဂှ်ရ။ ရပ်ဂွံတှ်ေ ကော်ဏာဟဂှ်ရ။ ကော်ဏာတုဲ ပ္ဍဲဒၞါဲပကောံကောန်ပၞာန်တံဂှ် လှုဲၜိုတ်ဍေံတံကေတ် ဟွံဂွံမ္ဂး ဟိုတ်တံဏံ ဟွံတိတ်ကၠုၚ်ပုဟ်။ လှုဲဍေံတံအာတ် ဟွံဂွံမ္ဂး မုဟီုရောဟီုတှ်ေ အတိုၚ်ဗီုဓာတ်ဏံ အတိုၚ်စရၚ်ဏံ ဍေံတံ ဒးရပ်ဂးတုဲ ထ္ၜးဟိုတ်ရ။ လၟုဟ် ဗ္တံ ၜိုတ် ၉ နာဍဳမ္ဂး မၞိဟ်ဟွံမွဲရပုဟ်၊ မၞိဟ်ပိုတ်အာဟဂှ်ရ။ မၞိဟ်ဂမၠိုၚ် ဂ္ဇအ်ဆေၚ်ဍာ်လက်ဖက်မ္ဂး ဖေက်လုပ်ဓဇက်အိုတ်ရ” သာ်ဝွံ သ္ဂးရ။
မွဲလ္ပာ်ဂှ်ပၠန် ကံၚ်ဇြဳပၞာန်ဝွံ ပ္ဍဲကဵုပွိုၚ်ဍုၚ် မၞုံအပ္ဍဲတွဵုရးဍုၚ်မန်တံဂှ် သွက်ဂွံဒစးဒုၚ် ကံက်လဝ်စရၚ် ညးတိုန်ဘာကွတ်ပၞာန် လၟေၚ် (၂) တံဂှ် နကဵုခရိုၚ်မဆေၚ်စပ်ဂမၠိုၚ် သွက်ဂွံကောပ်ကာဲ ဗွဲမစှ်ေကဵုသၞောတ်ဂှ် ကၠတ်စၞောန်ပ္ညုၚ်လဝ်ရ။
အတိုၚ်လိက်ဒုၚ်စဳရေၚ် ဂကောံလ္ၚတ်ကေၚ်ကာဗၟာ ကေုာံ ပဋိပက္ခ BACS ဂှ်မ္ဂး ပ္ဍဲလၟေၚ် (၁) ဂှ် ညးသၟတ်အလုံဍုၚ်မွဲ ၄၃၀၀ ပြၚ် ဒးဒုၚ်ပကောံလဝ် နဒဒှ်ကောန်ပၞာန်တုဲ ပလံၚ်ဗစိုပ်လဝ် ပ္ဍဲဘာတန်ဗ္တောန်ကွတ်ပၞာန် ၁၅ ဘာဂှ် ပ္ဍဲဂိတုဨပရဴ ၁၃ တေံ လလောၚ်တြးလဝ်ရ။
ပ္ဍဲတွဵုရးဍုၚ်မန်ဂှ် ပ္ဍဲဘာတန်ဗ္တောန်ဒပ်ပၞာန်ကဆံၚ်သၠုၚ် တကက−၄ ဖျေံသ္ဇိုၚ်ကွာန်ဝါကလိ မၞုံပွိုၚ်ဍုၚ်ဇြပ်ဗုဂှ် ကောန်တန်ဗ္တောန် ဒးဒုၚ်ပကောံပကောန်ပၞာန်တံဂှ် ၂၀၀ ပြၚ်နွံဒၟံၚ်ရောၚ် ဂွံတီကေတ် အတိုၚ်တၚ်နၚ် BACS ရ။
ပရိုၚ်−သြၚ်လောန်တိုၚ်(မ်)
ဗီု−MOI