ကျာ်မြဟ်၊ ဨပရဴ ၂၈
နကဵုညးဍုၚ်ကွာန်ပါဲဒဴဘဲပၞာန် ဒးထောံလသာသ္ၚိဌာန် နူကဵုကွာန်ကအ်ဗိန်၊ ကွာန်ဓမ္မသ ကေုာံ ကွာန်ပွဳဗွိုၚ်ဗ္ဒါဲဗ္ဒါဲဂမၠိုၚ် မၞုံလ္တူဂၠံၚ်ကွဳစက်ရမ္မာဝတဳ သ္ကုတ်သၠုၚ်ကျာၜဳဂြာၚ် ပယျဵုတွဵုရးကရေၚ်ကဵု တွဵုရးဍုၚ်မန်တံ သွက်ဂွံကလေၚ်မံၚ်စံၚ် ပ္ဍဲကွာန်ဇကုတံဂှ် ကံၚ်ဇြဳပၞာန် ဗက်စန်ဒက်ဒၟံၚ်ရ။
ညးဒေသ ထောံလသာသ္ၚိဌာန်တံဂှ် သွက်ဂွံကလေၚ်မံၚ် ပ္ဍဲဌာန်ဒၟံၚ်ဇကုတံဂှ် ညးဍုၚ်ကွာန်ပါဲဒဴဘဲပၞာန် ဒးပါဲဒလေတ်ဒၟံၚ် လ္တူဍုၚ်မတ်မလီုတံကဵု ပ္ဍဲဘာလကျာ် နူဍုၚ်ၜါသွာၚ်တံဂှ် ဂကောံအုပ်ဓုပ်ကံၚ်ဇြဳပၞာန်တံ အာစိုပ်စန်ဒက်ဒၟံၚ်ရ။
အခိၚ်လၟုဟ် ကွာန်ဓမ္မသဝွံ ၜိုဟ်သြိုဟ်ညိၚ်ဝတ်ဒၟံၚ်ယျတုဲ နကဵုညးဍုၚ်ကွာန်ဂမၠိုၚ် စဴဌာန်ဒၟံၚ်တုဲ ကလေၚ်မံၚ်ဂွံယျဂှ် လိက်ပရိုၚ်တြးဝါဒဒပ်ပၞာန်တံကဵု ပ္ဍဲထလဳဂရာမ်တံ ထ္မံက်ထ္ၜးလဝ်ရ။
ညးဒေသ ထောံလသာဌာန်ဒၟံၚ်မွဲတၠဂှ် ဂွံကလေၚ်စဴသ္ၚိဌာန်ဂှ် ညးသ္ၚိတူလေၚ်အာတံ ဒၞါဲသ္ဇက်ဂွံမံၚ်ဟွံမွဲ ဒှ်ဒၟံၚ်တုဲ ဂွံလုပ်ကွာန် ကၟာတ်လဝ်ဂၠံၚ်ဂှ်ရ ဂလာန်ဂကောံအုပ်ဓုပ် ကံၚ်ဇြဳပၞာန်တံဝွံ တၞဟ်ခြာဒၟံၚ်ကဵု ဗလးတိဏံဏောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“နူဏေံတေံ ဍေံတံ ( ဂကောံအုပ်ဓုပ်စကစ) တံ ဟီုလဝ် သွက်ဂွံစဴကွာန်ဓမ္မသရ။ စဴတှ်ေ ဂွံအာဗန် ဒယိုၚ်တူလဝ်ပၟတ်တံဂှ်ဟာ။ ဂၠံၚ်တေံဂှ်လေဝ် ကၟာတ်လဝ်တုဲ စဴဟွံဂွံပုဟ်။ ကြေဝ်ဏာဂှ်လေဝ် မၞိဟ်လုပ်ဂွံဂှ်လုပ်ဂွံတုဲ မၞိဟ်လုပ်ဟွံဂွံဂှ် ဟွံကဵုလုပ်ပုဟ်။ ဂၠံၚ်လ္ပာ်ကအ်ဆုကၠဂှ် ကၟာတ်လဝ်တုဲ ဟွံကဵုအာပုဟ်။ ဍေံတံဂှ် ဗက်ဟီုဒၟံၚ်ပြး မုဟွံတီပုဟ်။ ဂလာန်ဟီုဂှ်ကဵု ဒှ်ဒၟံၚ်ဍာံဍာံတံဂှ် တၞဟ်ခြာဒၟံၚ် ဍာ်ကဵုကၠေၚ်ရဏောၚ်” သာ်ဝွံ သ္ဂးရ။
ပါၚ်ဂၠံၚ်ကအ်ဆုကၠ ဂွံလုပ်ကွာန်ဓမ္မသ မၞုံလ္တူဂၠံၚ်ကွဳစက်ရမ္မာဝတဳဂှ် ကၟာတ်လဝ်တုဲ သ္ကုတ်ဂၠံၚ်ကွာန် မၞုံမွဲဒမြိပ်ဗ္ဒိုပ်ဗၠာဲသၟိၚ်ကြေဝ်ဏာတံဂှ်လေဝ် ကောန်ဒပ်ကံၚ်ဇြဳပၞာန်တံ ကၟာတ်လဝ်တုဲ အာကၠုၚ်ဟွံဂွံပုဟ်ဂှ် ညး လဴထ္ၜးလဝ်ရ။
တုဲကၠုၚ် ပ္ဍဲဂိတုမာတ် ၂၇ တေံ ကွာန်ဓမ္မသ ပ္ဍဲပွိုၚ်ဍုၚ်ကျာ်မြဟ် ပေါဲဗ္တိုက်က္တဵုဒှ်ဟွံမွဲတံဂှ် ဒပ်ကံၚ်ဇြဳပၞာန် ဟိုတ်နူဗ္တိုက်ကဵု ဒပ်ဍာ်၊ ဒပ်တိုက်၊ ဒပ်ကျာတံဂှ်တုဲ သ္ၚိဒၟံၚ်ကောန်အရာပ် ၃၀၀ ပြၚ် ပၟတ်တူဒှ်အာဆောံတုဲ ညးဒေသဂၠိုၚ်ကဵုဠက် ထောံလသာသ္ၚိဌာန် ဒးပါဲဒလေတ်လဝ်ရ။
ကံၚ်ဇြဳပၞာန်ဂှ် ညးဍုၚ်ကွာန် ဒးထောံလသာသ္ၚိဌာန်တံ သွက်ဂွံကလေၚ်လုပ်စိုပ်မံၚ် ပ္ဍဲကွာန်ကအ်ဗိန်၊ ဓမ္မသ ကေုာံ ကွာန်ဗ္ဒါဲဗ္ဒါဲတံဂှ် နူကဵုဂကောံအလဵုအသဳမန်၊ ကရေၚ်တံ သွက်ဂွံဆက်ရေၚ်တၠုၚ်ကဵု ကမၠောန်ကလေၚ်ပ္တန်ပ္တူ ကရောံညးဍုၚ်ကွာန်တံ ဗွဲမပြဟ်မာန်ဂှ် ကောပ်ကာဲဒၟံၚ်ရောၚ် သ္ဂးရ။
“အခိၚ်တ္ၚဲတှ်ေ အာကျောဝ်ဏောၚ် ကပေါတ်ညးတံ (ညးပါဲဒဴဘဲပၞာန်) နွံမ္ဂး ညးတံ အာကေတ်ဏောၚ်။ သဝ်တ္ၚဲတှ်ေ ကၠုၚ်တိက် လ္ပာ်ကွာန်ခယျး။ အတေံ (ကအ်ဗိန်၊ ကအ်ပံက်) ဂှ် ညးတံ ဟွံဂံၚ်မံၚ်။ ဗ္တံဗ္တံတှ်ေ ညးတံ ဖေက်ဒၟံၚ်ဏောၚ်” သာ်ဝွံ ညးမရီုဗၚ်ကဵုဒၟံၚ် ပရေၚ်ပါဲဒဴဘဲပၞာန်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲဂိတုမာတ် ၂၅ တေံ ကရောၚ်ပၞာန်ကံၚ်ဇြဳပၞာန် ဇြဟတ်ၜိုတ် ပွဳပွူ ၃၀၀ လုပ်စိုပ်ကၠုၚ် ပ္ဍဲကွာန်ကအ်ဗိန်၊ ကအ်ပံက်တုဲ ၚးတးပသောၚ်လဝ်တိဍာ်ဂှ်ရ ညးဒေသ သှ်ေဒၟံၚ်အပ္ဍဲကွာန် ဂၠိုၚ်ကဵုလ္ၚီ ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲ အလုံကွာန်မွဲရ။
သ္အာၚ်နူဂှ်ပၠန် ဒပ်ကံၚ်ဇြဳပၞာန် ပ္ဍဲအရာကၠောန်သ္ပၚးတးပသောၚ်တိဍာ်ဂှ် ပန်ဂစိုတ်လဝ် ညးဗြဴကောန်အရာပ်မွဲတၠ နကဵုသေနာတ်တုဲ မၞိဟ်တြုံလ္ၚဵုတံဂှ်လေဝ် ရပ်ဒက်စၟဳတ် ၜုၚ်တက်လဝ်ရောၚ် ဂွံတီကေတ် ဇရေၚ်ညးဒေသတံရ။
ပ္ဍဲကဵုလိက်ပရိုၚ်တြးဝါဒဒပ်ပၞာန် လလောၚ်ပ္တိတ်လဝ် ပ္ဍဲဂိတုမာတ် ၂၇ ဂှ် က္တဵုဒှ်လဝ်ပေါဲဗ္တိုက်ဆေၚ်မုက် ကုဒပ်ပံၚ်ကောံမဟာမိတ်တံ ၇ ဝါတုဲ ပ္ဍဲဂိတုဨပရဴ ၂၂ ဂှ် ဒပ်ကံၚ်ဇြဳပၞာန် ကလေၚ်ထိၚ်ဂွံလဝ် ကွာန်ဓမ္မသ၊ ပ္ဍဲဂိတုဨပရဴ ၂၅ ဂှ် ထိၚ်ဂွံလဝ် ကွာန်ကအ်ဗိန်ရောၚ် ထ္မံက်ထ္ၜးလဝ်ရ။
မွဲလ္ပာ်ဂှ်ပၠန် ပ္ဍဲကွာန်ကအ်ဗိန်၊ ကွာန်ဓမ္မသ ကေုာံ ကွာန်မၞုံဗ္ဒါဲဗ္ဒါဲတံဂှ် ဟိုတ်နူညိၚ်ဝတ်ၜိုဟ်သြိုဟ်ဒၟံၚ်ယျဂှ်ရ နကဵုညးဍုၚ်ကွာန်ဒေသ မံၚ်စံၚ်ဒၟံၚ် ဗွဲမၜိုဟ်သြိုဟ်ဂမၠိုၚ် ကလေၚ်လုပ်စိုပ်မံၚ်ဒၟံၚ် အပ္ဍဲကွာန်ညးတံအိုတ်ယျဂှ် ကံၚ်ဇြဳပၞာန် တြးလဝ်ဝါဒရ။
“ပ္ဍဲကွာန် ညးမွဲမှဟွံမွဲပုဟ်၊ သ္ဇက်ဂွံစဴကၠုၚ်မံၚ်လေဝ် ဟွံမွဲပုဟ်။ ဟွံၜိုဟ်သြိုဟ်ဏီပုဟ်။ ဍေံတံ သေနာတ်နွံတုဲ စဴကၠုၚ်တှ်ေ ဖေက်ဍေံတံ ကၠောန်ထောံမွဲမွဲသာ်။ စဴကွာန်မ္ဂးလေဝ် ဒၞါဲဂွံမံၚ် ဟွံမွဲရပုဟ်လေဝ်။ ဘာလကျာ် ပၟတ်ဟွံတူတှ်ေ မံၚ်ဂွံဒၟံၚ်ဏီ။ ညအ်ဂှ် ဒးသီုဘာလကျာ်တုဲ ဒးဂြိပ်ရနွံ။ ဒှ်ဒၟံၚ်ဒဒိုက်ညးသ္ကအ် အိုတ်ဍာ်ရဏောၚ်။ က္ၜၚ်ဍေံတံ (စကစ) စိုပ်ဒၟံၚ် ကွာန်ဓမ္မသ (ပ္ဍဲၜဳဂြာၚ်) ယျလေဝ်။ က္ၜၚ်ဏံဂှ် ပန်ဒၟံၚ် လ္ပာ်ကအ်မိတ်” သာ်ဝွံ ကောန်ကွာန်ဓမ္မသ ထောံလသာသ္ၚိဌာန်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တုဲကၠုၚ် ပ္ဍဲဂိတုမာတ် ၂၄ တေံ ဒပ်ပံၚ်ကောံမဟာမိတ် မန်၊ ကရေၚ် ကေုာံ PDF တံ လုပ်စိုပ်ဗ္တိုက်လဝ် ဗ္ဒိုပ်ဗၠာဲသၟိၚ်တိဍာ်ကအ်ဗိန် မၞုံပွိုၚ်ဍုၚ်ကအ်ကြိက် တွဵုရးကရေၚ်တုဲ ပ္ဍဲဂိတုမာတ် ၂၅ ဂှ် သီဂွံလဝ် ဗ္ဒိုပ်ဗၠာဲသၟိၚ်ပေၚ်ၚ်ရ။
လ္ပာ်ကံၚ်ဇြဳပၞာန် အခိၚ်ဒးဗလးတဲ ဗ္ဒိုပ်ဗၠာဲသၟိၚ်ကအ်ဗိန်တုဲဂှ် နူပါၚ်ဂၠံၚ်ဒဵုခရီု ကေတ်ကၠုၚ်ဒၞါဲ မွဲကဆံၚ်တုဲမွဲကဆံၚ် စဵုကဵုကွာန်ကအ်သိုက်၊ ကအ်ဇြဲ၊ ကြေဝ်ဏာ ကေုာံ ကွာန်သၚ်ကၠံတံဂှ်တုဲ ထ္ပက်ကၠုၚ်ကရောၚ်ပၞာန် နကဵုဇြဟတ်ပၞာန် ပွဳပွူ ၂၀၀ ရ။
သ္အာၚ်နူဂှ်ပၠန် အပ္ဍဲပေါဲဗ္တိုက်အလုံဍုၚ်တံဂှ် ရပ်စပ်စကာလဝ် ပၞာန်ကျာအရီုဗၚ် ဒပ်ကံၚ်ဇြဳပၞာန်တံ မသ္ပပဓာန်ဒၟံၚ်လၟိုန်ဂှ်တုဲ ပ္ဍဲၜဳဂြာၚ်ဂှ်လေဝ် က္ၜၚ်ပၞာန်ၜါဖ္ဍိုက် ဘိုၚ်ပန်ကဵုဒၟံၚ်လွဟ်ဇၞော်ရ။
ဟိုတ်နူအကာဲအရာဏံတုဲ အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံမဟာမိတ်တံဂှ် ပရေၚ်ပၞာန်ၜါလ္ပာ်ကြံၚ်မ္ၚိုဟ်တံ ဆက်က္တဵုဒှ်လဝ်တုဲ ညးဍုၚ်ကွာန်မွဲဒမြိပ်ဒေသၜဳဂြာၚ် ကွာန်ကအ်ဗိန်၊ ကွာန်ကအ်ပံက်၊ ကွာန်သၚ်ကၠံ၊ ကွာန်ဓမ္မသ၊ ကွာန်ကြေဝ်ဏာ စဵုကဵုမွဲကိုဋ်ပြၚ် ဒးထောံလသာလဝ်ဌာန်ဒၟံၚ်အိုတ်ရ။
ကံၚ်ဇြဳပၞာန်ဂှ် တိဍာ်ညိၚ်ဝတ်ၜိုဟ်သြိုဟ်မှဟေၚ် ဘဝပရေၚ်ပိုန်ဒြပ်ပရေၚ်မၞိဟ် ညးဍုၚ်ကွာန်တံ ဖောအ်ဗြေဝ်တောတက်ကၠုၚ်ဏောၚ်ဂှ်ရ ပ္ဍဲသၞောတ်ဂီုကၠီုညးဍုၚ်ကွာန် ဌာန်ဒေသဇကုတံ အလဵုဇကုတံပါလုပ်ဂှ် ဒးပံၚ်တောဲရေၚ်တၠုၚ်အာဏောၚ် ကဵုသမ္တီစန်ဒက်လဝ် ညးဒေသတံရ။
ပရိုၚ်−သြၚ်လောန်တိုၚ်(မ်)
ဗီု−CJ