ပဠဝ်၊ ဨပရဴ ၃၀
ဗ္ဒိုပ်ဗၠာဲသၟိၚ်ဍုၚ်ပလ ပွိုၚ်ဍုၚ်ပဠဝ် ရးတၞၚ်သဳ ကေုာံ ဗ္ဒိုပ်ဒပ်ကံၚ်ဇြဳပၞာန် ဖျေံလဝ်ဒပ် လ္တူ (တိုတောၚ်) ဒးဒုၚ်ဗ္တိုက်ကဵုဒရုၚ်တုဲ ကောန်ဒပ်ကံၚ်ဇြဳပၞာန် ၄ တၠ ဇီုကပိုက်ကလိဂွံလဝ်ဝပ်ရောၚ် ဂွံတီကေတ် ဇရေၚ်တမ်ဒပ် (၁) ခရိုၚ်ဗိက်ရ။
ပ္ဍဲဂိတုဨပရဴ ၂၈ အခိၚ်ဇိုၚ်သဝ်တ္ၚဲ ၜိုတ် ၅ နာဍဳဂှ် တမ်ဒပ် (၁) ခရိုၚ်ဗိက် ထောံလဝ်မခတိုဟ် ကုဗ္ဒိုပ်ဒပ်(တိုတောၚ်) ဇြဟတ် ၂၀ ပြၚ် ဖျေံလဝ်ဒပ်ဂှ် မခတိုဟ်မွဲမ၊ ဗ္ဒိုပ်ဗၠာဲသၟိၚ်ကံၚ်ဇြဳပၞာန် ဍုၚ်ပလဂှ် ထောံလဝ်မခတိုဟ် ၂ မ နကဵုဒရုၚ်ရ။
အပ္ဍဲပရေၚ်ဗ္တိုက်ဏံ ကောန်ဒပ်ကံၚ်ဇြဳပၞာန် ၄ တၠ ဇီုကပိုက်ကလိဂွံလဝ်ဝပ်တုဲ ကၠုၚ်စိုပ်ယိုက်ဏာလဝ် နကဵုယာန်ဖ္ဍိုက်မၞိဟ်ယဲရောၚ် ညးဒုၚ်တာလျိုၚ် လလောၚ်ပရိုၚ် တမ်ဒပ် (၁) ခရိုၚ်ဗိက် ကောန်သ္ဂံၚ်အာနဝ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဗ္ဒိုပ်ဒပ်ကံၚ်ဇြဳပၞာန်ၜါ ဒးဒုၚ်ဗ္တိုက်ကဵုဒရုၚ်တုဲ လ္ပာ်ကံၚ်ဇြဳပၞာန် ကြပ်ကၠိုဟ်ဗ္တံ ပန်ပှော်လဝ်လွဟ်ဇၞော်ကီုလေဝ် ညးဍုၚ်ကွာန်ကောန်အရာပ်ဇီုကပိုက်တံဂှ် ဆက်ဂၠိုက်ဂၠါဲဒၟံၚ်ဖိုဟ်ရောၚ် သ္ဂးရ။
တမ်ဒပ် (၁) ခရိုၚ်ဗိက်ဝွံ တုဲကၠုၚ်ပ္ဍဲဂိတုဨပရဴ ၂၅ ကဵု ၂၆ တေံဂှ်လေဝ် အာစိုပ်ဗ္တိုက်လဝ်ဗ္ဒိုပ်ဗၠာဲသၟိၚ်ဍုၚ်ပလ နကဵုဒရုၚ်တုဲ အပ္ဍဲပရေၚ်ဗ္တိုက်ဏံ လ္ပာ်ကံၚ်ဇြဳပၞာန် ဇီုကပိုက်ချိုတ်အာတံ နွံဒၟံၚ်ရောၚ် ဂွံတီကေတ်ရ။
ဒပ်ပံၚ်ကောံ ဂကောံဇြဟတ်ပၠန်ဂတးတံဝွံ ပ္ဍဲဂိတုဨပရဴ သတ္တာဟပထမတေံဂှ်လေဝ် အာစိုပ်ဗ္တိုက်လဝ် တမ်ဒပ်ကံၚ်ဇြဳပၞာန် ခလရ ၂၈၅ ဖျေံသ္ဇိုၚ်ဍုၚ်ပဠဝ် နကဵုဒရုၚ်ရ။
ပရိုၚ်−သြၚ်လောန်တိုၚ်(မ်)
ဗီု−Pala PDF