ၜၚ်ကံက်၊ ဨပရဴ ၂၉
အခိၚ်ဍုၚ်သေံ ပ္တိတ်ဒၟံၚ်ဇြဟတ် သွက်ဂွံရီုဗၚ်သောၚ်ကလး ပဋိပက္ခဍုၚ်ဗၟာဂှ် ကြဴနူဂကောံဝန်ဇၞော်ဂမၠိုၚ် ကၠောန်သ္ပဒၞါဲအပြံၚ်အလှာဲတုဲ ဝန်ဇၞော်ကာဍုၚ်သ္အာၚ် ပါမ်ပရဳ ဘာဟဳဒါ နူကာရာ ဒဒှ်ရနုက်တိတ်နူ ကဆံၚ်ဌာနန္တရဂှ် အလဵုအသဳသေံ သ္ပဒတန်လဝ် ပ္ဍဲဂိတုဨပရဴ ၂၈ တေံရ။
ညးဝွံ ဒှ်ညးက္ဍိုက်ပ် ဂကောံသောၚ်ကလး ရီုဗၚ်ပြသၞာဍုၚ်ဗၟာတုဲ ဂိတုတုဲကၠုၚ်တေံ စလဝ်အစဳဇန် ကဵုအာအရီုဗၚ်ပရေၚ်ဗ္စာရဏာမၞိဟ်တံဂှ်တုဲ ဒှ်ညးပ္တိတ်ဒၟံၚ်ဇြဟတ် သွက်ဂွံစကၠောန်အာ ပရေၚ်သဳကၠဳပ္ညဳပ္ညပ် ပ္ဍဲဍုၚ်ဗၟာမာန်မွဲ မဒှ်ရ။
ပါမ်ပရဳဝွံ ပ္ဍဲအရာပ္တိတ်ဇြဟတ် သ္ဂောံဗလးကဵုကောန်ဍုၚ်သေံ ဂၠိုၚ်ကဵုဒါဇြိန် ဒးဒုၚ်ရပ်လဝ် ပ္ဍဲဂါဇြာတေံဂှ်လေဝ် ဒှ်ညးပါလုပ်လဝ် နူကဵုဒၞါဲအဓိကရ။
လိက်နုက်တိတ် ပါမ်ပရဳဂှ် ဒဒှ်ရသ္ကိုပ်ဝန်ဇၞော် သရဳထာ တာဗဳဇြေန် ဂွံဒုၚ်လဝ်တဲဂှ် ချိုၚ်ဝါချာရောန်ကဳ ညးမၞုံအခေါၚ်ဟီုဂး အလဵုအသဳ ဟီုလဝ်ကဵု ဌာန်ပရိုၚ်ရိုက်တာရ။
ဝန်အပ္ဍဲလၟိုန် ဌာနဝန်ဇၞော်ကာဍုၚ်သ္အာၚ်တံကဵု သၞာဲဒဴဂမၠိုၚ် ကေတ်အာကဵုတာလျိုၚ်စၞးဏောၚ်ဂှ်တုဲ ဟိုတ်နူပါမ်ပရဳ နုက်တိတ်တုဲ တာလျိုၚ်ကာဍုၚ်သ္အာၚ်ဂမၠိုၚ် လီုအာဟွံသေၚ်ပုဟ်ဂှ် သ္ကိုပ်ဝန်ဇၞော် ဟီုဗပေၚ်စုတ်လဝ်ရ။
လစှ်ေဝန်ဇၞော် ဖေါမ်တာန် မပါလုပ် သၞာဲဒဴကဆံၚ်လ္တူဂမၠိုၚ် ဒးဒှ်ဒၟံၚ်အံသဝ် ကုပရေၚ် ပါမ်ပရဳ နုက်တိတ်နူ ကဆံၚ်ဌာနန္တရညးဂှ်ရ။
ပါမ်ပရဳ နုက်တိတ်နူ ကဆံၚ်ဒၞါဲညးဂှ်ဝွံ ဒှ်ပရေၚ်ဟွံစၟဳလဝ်မွဲရောၚ် ဖေါမ်တာန် သ္ဂးရ။
ပ္ဍဲကဵုဂကောံဝန်ဇၞော်သေံ ဨကရာဇ်သေံ ဒုၚ်တဲသ္ပဒတန်တုဲ လိက်ပရိုၚ်ဝၚ်နန် ထ္မံက်ထ္ၜးလဝ်ဂှ် ပၠောပ်လဝ်စရၚ် ကုပါမ်ပရဳ နဒဒှ်ဝန်ဇၞော်ကာဍုၚ်သ္အာၚ်သၟးရတုဲ ကဆံၚ်လစှ်ေသ္ကိုပ်ဝန်ဇၞော်ဂှ် ပံၚ်တောဲထ္မံက်ထ္ၜးလဝ် ဗီုကၠာတေံ ဟွံမွဲရ။
ပါမ်ပရဳ ဒှ်ညးစၞးသွံရာန်ဗၞိက်တြေံမွဲတၠဂှ် ဖါဲပ္တိတ်ထောံညး နူကဵုကဆံၚ်လစှ်ေသ္ကိုပ်ဝန်ဇၞော်ဂှ်ဝွံ ဟိုတ်နူစၟတ်သမ္တီ ဍာ်ဒကေဝ်ညး ဟွံသေၚ်ပုဟ်ဂှ် စှ်ေစိုတ်ဂှ်ကီု၊ နကဵုညး ပ္ဍဲအကြာဂၠးတိ ညံၚ်ယၟုဍုၚ်သေံ ဂွံခိုဟ်တိုန်ကၠုၚ် ဒဒှ်ရယိုက်ဂၠေၚ်လဝ်တာလျိုၚ် ခိုဟ်ဟ်ဏောၚ်ဂှ် ချူထ္မံက်ထ္ၜးလဝ် ပ္ဍဲလိက်နုက်တိတ်ညးရ။
Ref: Reuters