သဓီု၊ ဨပရဴ ၂၉
တွဵုရးဍုၚ်မန် ပွိုၚ်ဍုၚ်သဓီု ပ္ဍဲကွာန်( ဓါးရိုး) ဂကောံကွာန်ဓနုဂှ် ဟိုတ်နူဒပ်ကံၚ်ဇြဳပၞာန် ပန်ပှော်လွဟ်ဇၞော်တုဲ ညးဍုၚ်ကွာန်ကောန်အရာပ် မွဲတၠ ဇီုကပိုက်ချိုတ်အာလဝ်ရောၚ် ပ္ဍဲဂိတုဨပရဴ ၂၉ ပယျာံဂယးဂှ် KNU ဗဟဵု လလောၚ်ပ္တိတ်လဝ်ရ။
ပ္ဍဲဂိတုဨပရဴ ၂၇ အခိၚ်ဗ္တံ ၜိုတ် ၁၀ နာဍဳ နူဒပ်အမၠံက်ကံၚ်ဇြဳပၞာန် စၟတ် ၄၀၂ ဖျေံသ္ဇိုၚ်သဓီု ပန်ပလံၚ်နၚ်လွဟ်ဇၞော် ၂ မတုဲ ဒတုံဗ္တိုဟ်ထ္ကးအာလဝ် ဗ္ဒါဲကွာန်( ဓါးရိုး) ရ။
ဟိုတ်နူလွဟ်ဇၞော်ဒတုံဗ္တိုဟ်ထ္ကးအာတုဲ ကောန်ကွာန်နံၚ်ဗိုဝ် မၞုံယၟု(တီးရိုး) အာယုက် ၆၇ သၞာံ ကၠုၚ်စိုပ်ကၠောန်ဒၟံၚ်ကမၠောန်ကၠအ်သတ် ဒးအာကဝေက်လွဟ်ဇၞော်တုဲ ချိုတ်အာလဝ်ရောၚ် ဂွံတီကေတ် အတိုၚ်တၚ်လလောၚ်တြးဂှ်ရ။
ပ္ဍဲတ္ၚဲဂှ် အခိၚ်လဒေါဝ်တ္ၚဲ ၜိုတ် ၁ နာဍဳဂှ်လေဝ် နူဒပ်အမၠံက် ပန်ပှော်လဝ် လွဟ်ဇၞော် ၂ မတုဲ ဒတုံဗ္တိုဟ်ထ္ကးအာလဝ် ပ္ဍဲကမၠောန်ညးဍုၚ်ကွာန် မၞုံသ္ကုတ်ပလိုတ် ကွာန်ကအ်လှာၚ် ပွိုၚ်ဍုၚ်သဓီု ဒေသကော် ကုန်(ဃို့ဖိုးကော်) ဂှ်တုဲ ကၠအ်ထၜိုတ် ၜိုတ် ၁၅ ဨက ပၟတ်တူအာလဝ်ရောၚ် လလောၚ်ပ္တိတ်လဝ်ရ။
တုဲကၠုၚ် ပ္ဍဲဂိတုဨပရဴ ၂၅ တေံဂှ်လေဝ် ဒပ်ကံၚ်ဇြဳပၞာန် ပန်ပှော်လွဟ်ဇၞော် ပ္ဍဲကွာန် (မရမ်းကုန်း) ပွိုၚ်ဍုၚ်ၜဳကလေၚ်တုဲ ညးဍုၚ်ကွာန်ဒေသၜါတၠ ဇီုကပိုက်ကလိဂွံလဝ်ဝပ်တုဲ သ္ၚိဒၟံၚ်ဒ္စါံမ လီုလာ်အာလဝ်ရောၚ် ဂွံတီကေတ် အတိုၚ်တၚ်လလောၚ်တြး KNU ဗဟဵုရ။
ပရိုၚ်−သြၚ်လောန်တိုၚ်(မ်)
ဗီု−KNU