ပ္ဍဲဒေသၜဳဂြာၚ် ကရောၚ်ပၞာန်လုပ်ကၠုၚ်ဂှ် ကောန်အရာပ် ဟွံအောန်နူကဵု ၃၀ ဒးဒုၚ်ပြိုက်ဂစိုတ်

ကျာ်မြဟ်၊ ဨပရဴ ၃၀

ဒပ်ကံၚ်ဇြဳပၞာန်ဝွံ ပ္ဍဲအရာပ္တိတ်ဇြဟတ် သ္ဂောံကလေၚ်အုပ်ဓုပ် ဒေသၜဳဂြာၚ် ကေုာံ ဗ္ဒိုပ်ဗၠာဲသၟိၚ်ကအ်ဗိန် ဒးဗလးလဝ်တဲတံဂှ် သီုကဵုကျာ်ဇၞော်အ္စာမွဲတၠ မပါလုပ် ကောန်အရာပ် ၃၀ ပြၚ်ဂှ် ပြိုက်ဂစိုတ်လဝ်ရောၚ် ဂွံတီကေတ် နူကဵုကံၚ်ဇြဳဖေဝ်ဒရာဍုၚ်မန်ရ။

ညးဒးဒုၚ်ဂစိုတ်ဂယိုၚ်ဂမၠိုၚ်ဝွံ ကောန်အရာပ် ဂွံဆဵုကေတ် ဒၞါဲကောန်ဒပ်ကံၚ်ဇြဳပၞာန် ဖျေံဗ္ဒိုပ်တံကဵု ဒၞါဲလုပ်စိုပ်ထ္ပက်ကရောၚ်ပၞာန်တံဂှ် ရပ်ဒက်တုဲ ဂစိုတ်လဝ်ဂှ်ကီု၊ ပန်ပှော်ကြာန်န်ကီု ကေုာံ ဟိုတ်နူလွဟ်ဇၞော်စှ်ေတုဲ ဒးချိုတ်အာလဝ်ရ။

 မိသုတဇဝ် သ္ကိုပ်ဌာန ဌာနပရေၚ်ဗ္စာရဏာမၞိဟ် ကေုာံ ပရေၚ်ဟံၚ်ပြာ် ကံၚ်ဇြဳဖေဝ်ဒရာဍုၚ်မန်ဂှ် စပ်ကဵုလၟေၚ်ဒဒှ်ကောန်အရာပ် ဒးဒုၚ်ဂစိုတ်ဂှ်တုဲ လ္တူနူကဵုစရၚ် ကလိဂွံလဝ်ဂှ် ပ္ဍဲဗလးတိဏံ သာဂၠိုၚ်မာန်ဏောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“ပ္ဍဲပွိုၚ်မွဲဂိတုဏံ ဒးလွဟ်ဇၞော်တုဲ ကောန်ကွာန်ဒးချိုတ်အာ မပ္တံကဵုမၞိဟ်ဗြဴ၊ ကောန်ၚာ်သၟတ်၊ တုဲပၠန် မၞိဟ်အာကၠုၚ်ဂၠံၚ် အာရာန်စၞစ ဗ္ဒါဲသ္ၚိတံ၊ အဃောစဴကွာန် ဖေက်ကော်စၟဳတ်တုဲ ပန်ခ္ဍာၚ်ဏာလဝ်တံ၊ တုဲပၠန် ကော်စၟဳတ်တုဲမှ လၟိဟ်မၞိဟ်ပန်ဂစိုတ်လဝ်တံဂှ်ဟီုမ္ဂး အပံၚ်ဖအိုတ် ၃၀ ပြၚ် ပိုယ်တံ ဂွံလဝ်စရၚ်ရ။ ဂၠိုၚ်နူဏံလေဝ် နွံကၠုၚ်မာန်ရ” သာ်ဝွံ သ္ဂးရ။

ပ္ဍဲကဵုဏံ ပရေံအိုတ်ဂှ်တှ်ေ ဒပ်ကံၚ်ဇြဳပၞာန်ဝွံ ပ္ဍဲဂိတုဨပရဴ ၁၄ တေံ နကဵုတၚ်ရန်တၟံနွံနွံ ပန်ဂစိုတ်လဝ် ကျာ်ဇၞော်အ္စာဝါယမ ဘာကွာန်သၚ်ကၠံ အခိၚ်စဴကၠုၚ်ကဵုကွဳစက် ပ္ဍဲပါၚ်ဂၠံၚ်လုပ်ကွာန်ကြေဝ်ဏာဂှ်တုဲ ဒးပဝ်အာလဝ်ရောၚ် ဂွံတီကေတ် အတိုၚ်တၚ်နၚ် ကံၚ်ဇြဳဖေဝ်ဒရာဍုၚ်မန် MSFC ရ။

ဒပ်ပံၚ်ကောံမဟာမိတ် မန်၊ ကရေၚ်၊ PDF တံ စနူအခိင်သီထောံ ဗ္ဒိုပ်ဗၠာဲသၟိၚ်ကအ်ဗိန်တုဲဂှ် ဒပ်ကံၚ်ဇြဳပၞာန်ဝွံ နကဵုဇြဟတ်လၟိဟ်ဗွဲမဂၠိုၚ်ဂၠေၚ် နူပါၚ်ဂၠံၚ်ဒဵုခရီု ပ္ဍဲကွာန်ကအ်သိုက်၊ ကွာန်ကအ်ဇြဲ၊ ကွာန်ကြေဝ်ဏာ ကေုာံ ကွာန်သၚ်ကၠံတံဂှ် မွဲကဆံၚ်တုဲမွဲကဆံၚ် ကေတ်လဝ်ဒၞါဲတုဲ လုပ်စိုပ်ထ္ပက်လဝ်ကရောၚ်ပၞာန် စဵုကဵုကွာန်ကအ်ဗိန်ရ။

ပ္ဍဲဂိတုဨပရဴ ၁၉ တေံ အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံမဟာမိတ်တံ က္တဵုဒှ်လဝ်ပေါဲဗ္တိုက်ဆေၚ်မုက် မွဲဒမြိပ်ပွဳပွူကွာန်ကြေဝ်ဏာ ကေုာံ ကွာန်သၚ်ကၠံတံဂှ်တုဲ ပ္ဍဲဂိတုဨပရဴ ၂၂ ဂှ် ကံၚ်ဇြဳပၞာန် လုပ်စိုပ်ထိၚ်ဒက်လဝ် ကွာန်ဓမ္မသတုဲ ပ္ဍဲဂိတုဨပရဴ ၂၅ ဂှ် ပ္ဍဲကွာန်ကအ်ဗိန်ကဵု ကွာန်ပွဳဗွိုၚ်တံဂှ် ကၠောန်သ္ပၚးတးလဝ်တိဍာ်ရ။

မွဲဒမြိပ်ဂၠံၚ် ကရောၚ်ပၞာန်ကံၚ်ဇြဳပၞာန် လုပ်စိုပ်ကၠုၚ်တံဂှ် ညးဒေသ ၜိုတ်ဆဵုတံဂှ် ရပ်ဒက်ၜုၚ်တက်ကီု၊ ပန်ဂစိုတ်ထောံ မသက္ကုဟိုတ်ကီု၊ ကၠေၚ်ဒက်ဂစိုတ်ထောံတံလေဝ် ကလိလောန်လဝ်တုဲ ကြဴနူဒးဒုၚ်ရပ်ဒက်ၜုၚ်တက်တုဲဂှ် မၞိဟ်ကလေၚ်ဗလးကၠုၚ်တံလေဝ် နွံလဝ်ရ။

မွဲလ္ပာ်ဂှ်ပၠန် ကောန်ဒပ်ကံၚ်ဇြဳပၞာန်တံဝွံ သ္ၚိဌာန်ညးဍုၚ်ကွာန်ဒေသ မၞုံအပ္ဍဲကွာန် လုပ်စိုပ်ထ္ပက်ကၠုၚ်ကရောၚ်ပၞာန်တံဂှ် လုပ်ကၠတ်ဂၠံက်တုဲ ကေတ်ဏာလဝ် သီုကွဳလိုန်ဓာတ်တံ မပါလုပ် ကပေါတ်ကညောတ်ဂမၠိုၚ်ဂှ် ညးဒေသတံ ဟီုရ။

ညးဒေသ ဟွံမိက်ထ္မံက်ယၟုမွဲတၠဂှ် “ ရဲၜိုတ်လဒေါဝ်ကွာန်တံဂှ်တှ်ေ မုဟွံဒှ်ပုဟ်။ တၞုၚ်ကွာန်တှ်ေ ကပေါတ်ကၠေံနွံဒၟံၚ်။ တုဲပၠန် အခိၚ်ကရောၚ်ပၞာန်ဍေံတံ လုပ်ကၠုၚ်တှ်ေ (ကောန်အရာပ်ဒေသတံ) ဒးဒုၚ်ၜုၚ်တက်ကီု၊ ပၠံၚ်ကပေါတ်ကညောတ်တံ နွံရ” သာ်ဝွံ သ္ဂးရ။

ကံၚ်ဇြဳပၞာန်ဂှ် ညးဒေသ ထောံလသာသ္ၚိဌာန်တံဂှ် သွက်ဂွံကလေၚ်စဴမံၚ် ဌာန်ဒၟံၚ်ညးတံအိုတ်ဂှ် သ္ကိုပ်ဝန်ဇၞော်တွဵုရးဍုၚ်မန် ကံၚ်ဇြဳပၞာန်ခါန်ကၞက် ဥူအံၚ်ကျဳတုၚ် စန်ဒက်လဝ် စဵုကဵုကွာန်ဓမ္မသရ။

လအာတုပ်သာ်ဂှ်ကီု ညးဒေသ ပါဲဒလေတ်ဒၟံၚ် လ္တူဍုၚ်မတ်မလီုကဵု ပ္ဍဲဘာလကျာ် နူဍုၚ်ၜါသွာၚ်တံဂှ်လေဝ် ဂကောံအုပ်ဓုပ် ပွိုၚ်ဍုၚ်မဆေၚ်စပ်တံ အာစိုပ်စန်ဒက်လဝ်ရောၚ် ကံၚ်ဇြဳပၞာန် လလောၚ်ပ္တိတ်လဝ်ပရိုၚ်ရ။

ဟိုတ်နူဒပ်ကံၚ်ဇြဳပၞာန် ပန်ပှော်ဗ္တိုက်တုဲ အပ္ဍဲကွာန်ဓမ္မသ သ္ၚိ ၃၀၀ ပြၚ် ပၟတ်တူဒှ်အာဆောံဂှ် ဂကောံအုပ်ဓုပ် ပွိုၚ်ဍုၚ်ကျာ်မြဟ်တံ ပစူဂတဵုမုက်တုဲ ကောန်ကွာန်ဂမၠိုၚ် ဂွံကလေၚ်ဖျေံသ္ဇိုၚ်ဂှ် ဗက်ဆဝ်မ္ၚုဟ်လဝ်ရ။

မိသုတဇဝ်ဂှ် ပ္ဍဲအရာဒပ်ကံၚ်ဇြဳပၞာန် ကော်ဂွံကလေၚ်စဴဌာန်ဒၟံၚ်ဂှ် သ္ၚိကောန်အရာပ်ဂမၠိုၚ် ကၟာတ်လဝ်တံဂှ် ကဵုပံက်အတေၚ်တုဲ ဒှ်ဒၟံၚ်အကာဲအရာ ယိုက်ပ္တိတ်သီကေတ်ဒၟံၚ် ကွဳလိုန်ဓာတ်တံ ကေုာံ  ကပေါတ်ကညောတ်ၜိုတ်နွံတံဏောၚ်ဂှ် နိဿဲကေတ် ဂလာန်ညးသှ်ေဒၟံၚ်သ္ဂောံမၚ်သ္ၚိတံဂှ်တုဲ ဟီုလဝ်သာ်ဏံရ။

“ပ္ဍဲအရာကော် စဴသ္ၚိဌာန်ညိဂှ် ကောန်အရာပ်စဴအာဂမၠိုၚ်၊ သ္ၚိကၟာတ်လဝ်တံဂှ် ( ဒပ်ကံၚ်ဇြဳပၞာန်) ကဵုပံက်အတေၚ်တုဲ ကွဳလိုန်ဓာတ်ၜိုတ်နွံ၊ ထၟာဲပုၚ်ထၟာဲခရံက်တံဟွံသှ်ေ အရာနွံဒၟံၚ်ပ္ဍဲဗဳဒိုဝ်တံသီုဖအိုတ်ဂှ် သီပၠံၚ်ၜးကေတ်တုဲ မွဲတ္ၚဲ ကွဳစက်ၜိုတ်စှ်ကာ ကောန်ပၞာန်စကစတံ လဆောဝ်လဆောဝ် ကော်နၚ်သီုသမ္ဘာတုဲ ကပှ်ကေတ်ကပေါတ်ကညောတ်သ္ၚိ ဂၠိက်ယာတ်တံဂှ်တုဲ ယိုက်ပ္တိတ်ဏာမံၚ် နူကဵုကွာန် မွဲဒမြိပ်ၜဳဂြာၚ်တံ နကဵုကွဳစက်ဂှ် နွံရ” သာ်ဝွံ သ္ဂးရ။

ညးဍုၚ်ကွာန်ပါဲဒဴဘဲပၞာန် သ္ၚိဌာန်သှ်ေဒၟံၚ်ဏီတံဂှ် သွက်ဂွံကလေၚ်စဴဌာန်ဒၟံၚ်ဇကုတံဂှ် ဒးမၚ်ရံၚ်ဒၟံၚ် အကာဲအရာဖိုဟ်တုဲ မၞိဟ်တြုံလ္ၚဵုတံဂှ်တှ်ေ စဴအာကေတ် ကပေါတ်သှ်ေဒၟံၚ်ပ္ဍဲသ္ၚိတံ နွံတုဲ ညးသှ်ေဒၟံၚ် နဒဒှ်ရဲမၚ်သ္ၚိတံလေဝ် နွံဂှ် ဂွံတီကေတ် ဇရေၚ်ညးဒေသတံရ။

နူပေါဲဗ္တိုက်သီဗ္ဒိုပ်ဗၠာဲသၟိၚ်ကအ်ဗိန် အပ္ဍဲပေါဲဗ္တိုက်ၜဳဂြာၚ်ဂှ် ညးဍုၚ်ကွာန် နူကွာန်မၞုံမွဲဒမြိပ်ဂၠံၚ်ကွဳစက်ရမ္မာဝတဳ မပ္တံကဵုကွာန်ကအ်ဗိန်၊ ကွာန်ကအ်ပံက်၊ ကွာန်သၚ်ကၠံ၊ ကွာန်ဓမ္မသ၊ ကွာန်ကြေဝ်ဏာ၊ ကွာန်ကအ်ဇြဲ၊ ကွာန်ကအ်သိုက်တံ စဵုကဵုမွဲကိုဋ်ပြၚ် လၟိဟ်ညးထောံလသာသ္ၚိဌာန် ဂၠိုၚ်ကၠုၚ်ဒၟံၚ်ရ။

ပရိုၚ်−သြၚ်လောန်တိုၚ်(မ်)

ဗီု−CJ