ကောန်ပၞာန်တြေံတြေံ အာယုက်သၟဝ် ၆၇ သၞာံတံ ဂွံကလေၚ်ယိုက်ဂၠေၚ်လျိုၚ်ပၞာန်ဂှ် ကံၚ်ဇြဳပၞာန် စၞောန်ပ္ညုၚ်

နေဗျဳဒဝ်၊ ဨပရဴ ၃၀

ဒပ်ကံၚ်ဇြဳပၞာန် ကျဒၟံၚ်ပၞာန် ပ္ဍဲပေါဲဗ္တိုက်အလုံဍုၚ်မွဲဂှ်ဝွံ ကောန်ပၞာန်တြေံတြေံ သၟဝ်အာယုက် ၆၇ သၞာံတံဂှ် သွက်ဂွံကလေၚ်ယိုက်လျိုၚ်ပၞာန် နဒဒှ်ကောန်ဒပ်အရန်ဂှ် စၞောန်ပ္ညုၚ်လဝ်သ္ၚိတ်တ်ရောၚ် ဂွံတီကေတ် နူကဵုဗွိုၚ်ဒပ်ပၞာန်တံရ။

ဒပ်ကံၚ်ဇြဳပၞာန်ဝွံ ကောန်ပၞာန်တြေံတြေံဂမၠိုၚ် ဂွံကလေၚ်ယိုက်လျိုၚ်ပၞာန်မာန်ဂှ် ပ္ဍဲဂိတုဨပရဴ ၁၂ တေံ ရုၚ်သ္ကိုပ်က္ဍိုက်ပ်ပၞာန် (ပၞာန်တိုက်) လလောၚ်ပ္တိတ်လဝ် သၞောဝ်ကောန်ဒပ်အရန်ယိုက်ဂၠေၚ်လျိုၚ်ပၞာန် သ္ၚိတ်တ်ရ။

ပ္ဍဲကဵုဏံ ညးမနုက်တိတ်နူဒပ်ပၞာန် နဆန္ဒဇကုကီု၊ သၞာဲဒဴပၞာန်တြေံ သၟဝ်အာယုက် ၆၇ သၞာံ ဒေါအ်ဇူလဝ်တံ၊ ကောန်ပၞာန်တြေံတြေံဂမၠိုၚ် ယဝ်ရစၟဳတ်ယဲ စပ်ကဵုလ္ပာ်ပၞာန် အံၚ်ဇၞးမ္ဂး ဒးယိုက်ဂၠေၚ်လျိုၚ်ပၞာန် နဒဒှ်ကောန်ဒပ်အရန်ဏောၚ် ပါလုပ်ရ။

သ္အာၚ်နူဂှ်ပၠန် လိက်ကော် ကုကောန်ပၞာန်၊ သၞာဒဴပၞာန်တြေံ တာလျိုၚ်နွံ သ္ဂောံယိုက်လျိုၚ်ပၞာန် နဒဒှ်ဒပ်အရန်တံဂှ် နူကဵုသၟိၚ်တၠအဝဵုလ္ပာ်ပၞာန် အခေါၚ်မၞုံတံ လလောၚ်ပ္တိတ်ကဵုအာဏောၚ်ဂှ် သ္ဂးရ။

ညးယိုက်ဂၠေၚ်လျိုၚ်ပၞာန်တြေံမွဲတၠဂှ် က္ဍိုပ်သ္ကိုပ်ပၞာန်သီအဝဵုဝွံ သ္ကိုပ်ဗိုလ်ပၞာန် နွံမံၚ်ဗ္ဒါဲညးတံဂှ် ဟွံမိက်ကဵုတိတ်နူဒပ်ပၞာန် ကေုာံ ဟိုတ်နူမိက်ဂွံဆက်အုပ်ဓုပ်ဂှ်တုဲ ကၠောန်လဝ်သာ်ဏံရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“ မၞိဟ်ဇၞော်ဇၞော် နွံမံၚ်ဗ္ဒါဲဗ္ဒါဲညးဂှ် မိက်ဂွံတိတ်မံၚ်။ ဗွဲမဂၠိုၚ်ဂှ်တှ်ေ ဟိုတ်ဂှ်ရ အလဵုညးလေဝ် ဂွံမံၚ်အာယုက် ၆၅ ယျဏောၚ်လေဝ်။ အလဵုညးလေဝ် မိက်ဂွံဆက်ကၠောန်။ မၞိဟ်နွံဒၟံၚ်ဗ္ဒါဲညးတံဂှ်လေဝ် ဟွံမိက်ကဵုတိတ်ပုဟ်။ ဟိုတ်ဂှ်ရ သၞောဝ်ဏံဂှ် ချူခၞံလဝ်အရၚ်ညးကၠာဏောၚ်” သာ်ဝွံ သ္ဂးရ။

အတိုၚ်အခိုက်ကၞာဒပ်ပၞာန်မ္ဂး ညးဇၞော်၊ ညးဍောတ် နွံဂှ်ရ သၞာဲဒဴတြေံတြေံတံဂှ် အမိၚ်သၞာဲဒဴလၟုဟ်တံကဵုဂှ် ဒုၚ်တဲမာန်ဟွံသေၚ်တုဲ ယဝ်ရကဵုအမိၚ်အတေၚ်မ္ဂးလေဝ် ပြသၞာအပ္ဍဲဒပ် ဇၞော်ကၠုၚ်မာန်ဏောၚ် ညးသ္ၚဳဂၠိပ်ရ။

ညးယိုက်လျိုၚ်ပၞာန်ဗွဲမဂၠိုၚ်ဝွံ ဒးတိတ်နူ ဒပ်ပၞာန်ဂှ်ဝွံ ဟိုတ်နူပရေၚ်ထတ်ယုက်ဟွံခိုဟ်ကီု၊ ဒးဆောံလေၚ်လဝ် အဝဲအၚ်္ဂဇိုၚ်တဲတံသၟးဟွံက ဟိုတ်နူအာယုက်ဇၞော်တိုန်တုဲ မဒှ်တုဲ ယဝ်ရကဵုယိုက်လျိုၚ်ပၞာန် သၟဝ်အာယုက် ၆၇ သၞာံဏံဂှ်မ္ဂး စိုပ်တရဴဟွံသေၚ်ပုဟ်ဂှ် ညးယိုက်ဂၠေၚ်လျိုၚ်ပၞာန်တြေံတံ ပါ်ပါဲလဝ်ရ။

ညးလ္ၚတ်သ္ၚဳဂၠိပ်ပရေၚ်ဍုၚ်ကွာန်၊ ပရေၚ်ပၞာန် ဥူတာန်သဵုနာၚ်ဂှ် ဒပ်ကံၚ်ဇြဳပၞာန်ဝွံ တၚ်နွံပၟိက်ဍေံတံ ဒိုဟ်ဇဳဂၠိုၚ်ဒၟံၚ်ဂှ်ရ ဂလိုၚ်ပ္တိုန် စဵုကဵု ၆၇ သၞာံသာ်ဏံတုဲ အကာဲအရာ ဗီုပြၚ်ဒက်ပ္တန်ဒပ်ပၞာန် ဗၞတ်ၜိုတ်လဵုလီုလာ်ဒၟံၚ်ရောဟီုဂှ် ထ္ၜးဒၟံၚ်သက်သဳရောၚ် ဟီုရ။

“ထ္ၜးဒၟံၚ်အကာဲအရာ ဗီုပြၚ်ဒက်ပ္တန်ဒပ်ပၞာန်ညး လီုဒၟံၚ်ဂှ်ဏောၚ် ပိုယ်တံ ခယျကေတ်ရ။ မိက်ဂွံသ္ဂးဂှ်တှ်ေ ရဲတိတ်မုက်ပၞာန်တံလေဝ် အိုတ်ယျ။ မၞိဟ်နွံလက္ကရဴဏံလေဝ် ဟွံမွဲရတုဲ ညးယိုက်လျိုၚ်ပၞာန်တြေံတြေံတံဂှ် ဂွံကော်သွက်ကမၠောန်ရုၚ်၊ ကမၠောန်လ္ပာ်လက္ကရဴဏံတုဲ ညးဂှ်တှ်ေ ဂလိုၚ်ပ္တိုန် စဵုကဵု ၆၇ သၞာံ ဟွံဒေါအ်ဟွံဂွံတုဲ ကော်ထောံလဝ်ရောၚ် ညာတ်ကေတ်ရ။ ညအ်ဂှ် ဗီုပြၚ်ဒက်ပ္တန် ဒပ်ပၞာန်ညး ၜိုတ်လဵုအကာဲအရာပရေံဒၟံၚ်ယျဟီုဂှ် ထ္ၜးဒၟံၚ်သက်သဳရောၚ် အဲ မိက်ဂွံဟီုရ” သာ်ဝွံ သ္ဂးရ။

အတိုၚ်လိက်စၞောန် ကံၚ်ဇြဳပၞာန်ဂှ်မ္ဂး ယဝ်ရဒှ်ညးယိုက်လျိုၚ်ပၞာန်တြေံ သၟဝ်အာယုက် ၅၅ သၞာံဂှ်မ္ဂး ဒးကေတ်လျိုၚ် ချဳဒရာၚ်ပရေၚ်ပၞာန်တံဏောၚ်တုဲ အကြာအာယုက် ၅၅ ကဵု ၆၇ သၞာံမ္ဂး ဒးကေတ်တာလျိုၚ်ဂီုကၠီု ဒပ်၊ ဌာန်ဂအုပ်၊ ဗ္ဒိုပ်ဖျေံသ္ဇိုၚ် သွက်လဝေၚ်ပၞာန်တံဏောၚ်ဂှ် သ္ဂးလဝ်ရ။

သ္အာၚ်နူဂှ်ပၠန် ကောန်ဒပ်အရန် ဒက်ပ္တန်အာ နကဵုညးယိုက်လျိုၚ်ပၞာန်တြေံတြေံတံဂှ်ဝွံ ဗွဲတွဵုမအောန် ဒးယိုက်ဂၠေၚ်လျိုၚ်ပၞာန် ၃ သၞာံ အခိၚ်ပေၚ်ၚ်ဏောၚ်တုဲ ယဝ်မိက်ဂွံဆက်ယိုက်ဂၠေၚ်လျိုၚ်ပၞာန်မ္ဂး သ္ပဆန္ဒ မွဲဝါမ္ဂး ၁ သၞာံ၊ ၜါဝါမာန်ရောၚ် ပါလုပ်ရ။

အခိၚ်ဓမ္မတာမ္ဂး အာယုက်ယိုက်ဂၠေၚ်လျိုၚ်ပၞာန် အခိၚ်ပေၚ်ၚ်ဂှ် ပဵုနူကဵု ၅ သၞာံတုဲ ဟွံကဵုအခေါၚ်ယိုက်ဂၠေၚ်လျိုၚ်ပၞာန်ကီုလေဝ် သွက်ဒတုဲဖဵုကၟိန်ဍုၚ် နွံပၟိက်မ္ဂး လ္တူ ၅ သၞာံလေဝ် ပအပ်ကဵုတာလျိုၚ် နကဵုအခေါၚ် သ္ကိုပ်က္ဍိုက်ပ်ပၞာန် ကာစဵုဒၞါဒပ်ပၞာန်မာန်ရောၚ် သ္ဂးလဝ်ရ။

သ္အာၚ်နူဂှ်ပၠန် ကောန်ဒပ်အရန်မွဲတၠဝွံ အာယုက်ယိုက်လျိုၚ်ပၞာန် အခိၚ်ပေၚ်ၚ် ၃ သၞာံဟွံပေၚ်မွဲသာ် ပ္တိုန်လိက်နုက်တိတ်ဟွံဂွံတုဲ ညးတာလျိုၚ်နွံ သ္ဂောံယိုက်လျိုၚ်ပၞာန်ဂှ်မ္ဂး ဟိုတ်ခိုၚ်ၚ်ကၠိုက်က်ဟွံမွဲမွဲသာ် ဟွံပ္တိုန်ထ္ၜးပရိုၚ်မ္ဂး ဒေါအ်အာ အခေါၚ်ဒုၚ်စသိုၚ်ဒေါအ်ဇူ ခေတ္တဏောၚ် ပါလုပ်ရ။

သၞောဝ်ဒပ်အရန် ကလေၚ်ပၠောပ်လဝ်လမျီုဂှ်ဝွံ စၞောန်ပျးလဝ် ပ္ဍဲလက်ထက်တၠအဝဵုပၞာန်တြေံ ဥူတာန်ယှိုဲ သၞာံ ၂၀၁၀ တေံဂှ်တုဲ က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် ဂယိုၚ်ပ္တိုန်လဝ် ပ္ဍဲဂိတုဖေဖဝ်ဝါရဳ ၁၃ တုဲကၠုၚ်တေံရ။

ပရိုၚ်−သြၚ်လောန်တိုၚ်(မ်)

ဗီု−MOI