ဗြဝတဳ၊ ဨပရဴ ၃၀
ဒပ်ကံၚ်ဇြဳပၞာန် ဗပေၚ်ဒၟံၚ်ဇြဟတ်ဒပ်၊ ပလံၚ်ဗစိုပ်ဒၟံၚ်ဇွောံမ ကုဍုၚ်ဗြဝတဳ တွဵုရးကရေၚ် ဍုၚ်ပယျဵုသေံ−ဗၟာဂှ်ရောၚ် ဂွံတီကေတ် အတိုၚ်ဂလာန် တမ်ရိုဟ်ပရိုၚ်ဗလးတိတံရ။
ပ္ဍဲဂိတုဨပရဴ ၂၉ တေံ က္ၜၚ်ကျာကံၚ်ဇြဳပၞာန် ၂ ဖ္ဍိုက်ဝွံ အခိၚ်နူဂယး ၁၁ နာဍဳဝိုက်ဂှ်မွဲဝါ၊ ဇိုၚ်သဝ်တ္ၚဲ ၄ နာဍဳပြၚ်ဂှ် မွဲဝါ၊ ၂ ဝါ ကၠုၚ်စိုပ်ဖျေံလဝ်ဇွောံမ ကေုာံ ဇြဟတ်ဒပ် ပ္ဍဲဒၞါဲရုၚ်မုက်ပၞာန် ဒၞါဲကောန်ဒပ်ကံၚ်ဇြဳပၞာန်တံမၞုံ လ္တူဍုၚ်ဗြဝတဳဂှ်ရောၚ် တမ်ရိုဟ်ပရိုၚ်ဗလးတိတံ ဟီုရ။
ဒပ်ကံၚ်ဇြဳပၞာန်ဝွံ နူကဵုဂၠံၚ်ကုန်ဂှ် ပလံၚ်ဗစိုပ်ဇွောံမ ကေုာံ ဇြဟတ်ဒပ်ဂမၠိုၚ် ဟွံဂွံဂှ်ရ ဒးပလံၚ်ဒၟံၚ် ဇွောံမ၊ ဇြဟတ်ဒပ် နကဵုက္ၜၚ်ကျာ နူကဵုမှဲအကးတေံရောၚ်ဂှ် တမ်ရိုဟ်ပရိုၚ်ဂမၠိုၚ် သ္ဂးရ။
ပ္ဍဲဍုၚ်ဗြဝတဳ ဒၞါဲကံၚ်ဇြဳပၞာန်ကဵု ဒပ်ပံၚ်ကောံပၠန်ဂတးတံ ပေါဲဗ္တိုက်သ္ကာတ်မြဟ်လဝ်ဂှ် စနူဂိတုဨပရဴ ၂၁ တုဲကၠုၚ်တေံတုဲ ဟိုတ်နူဒပ်ပံၚ်ကောံပၠန်ဂတးတံ ဆုတ်တိတ်အာ နူလ္တူဍုၚ်ဂှ်ရ ပေါဲဗ္တိုက်ၜါလ္ပာ်တံ ကလေၚ်ညိၚ်ဒၟံၚ် မဒှ်ရ။
ပေါဲဗ္တိုက်ဂမၠိုၚ် ညိၚ်ဝတ်စှ်ေအာဂှ်ရ ဂိတုဨပရဴ ၃၀ ဂှ် ကလေၚ်ပံက်လဝ် ဒဒန်ဆာန်ကၟိန် သေံ−ဗၟာ သီုၜါတၞုၚ်တုဲ သွက်ဂွံကလေၚ်ဂေတ်ဂြိပ် အတိုၚ်သၞောတ်တြေံ အပ္ဍဲပွိုၚ်မွဲဂိတုဂှ် လ္ပာ်ကံၚ်ဇြဳပၞာန် ပ္တိတ်ဒၟံၚ်ဇြဟတ်ရ။
မွဲလ္ပာ်ဂှ်ပၠန် ဒပ်ကံၚ်ဇြဳပၞာန်ဝွံ သွက်ဂွံကလေၚ်ထိၚ်ဒက် ဍုၚ်ဗြဝတဳကဵု ဒေသတေန်ဂါန်ညဳနံၚ် အလုံအိုဿီုမာန်ဂှ် ပလံၚ်ဒၟံၚ်ပၞာန်အရီု ကုကရောၚ်ပၞာန်အံၚ်ဇေယျ ကဆံၚ်ကၟိန်ဍုၚ်ဂှ်ရ။
ဆ္ဂး ကရောၚ်ပၞာန်ဏံဂှ် ဒပ်ပံၚ်ကောံ ဂကောံဇြဟတ်ပၠန်ဂတးတံ ကၟာတ်လဒဵုဗ္တိုက်ဒၟံၚ်တုဲ စိုပ်ဒၟံၚ် ၜိုတ်ပွဳဗွိုၚ်ဍာ်လဂေါဝ်တဝ်နဝ် ဂၠံၚ်အာယှ ဗြဝတဳ−ကအ်ကြိက်ဂှ်ညိကီုဂှ် ဂွံတီကေတ် အတိုၚ်တမ်ရိုဟ်ပရိုၚ်ဗလးတိတံရ။
ပရိုၚ်−သြၚ်လောန်တိုၚ်(မ်)
ဗီု−CJ