ကိဗ်၊ မေ ၁
နကဵုကၟိန်ဍုၚ်လုပ်ဂကောံမဟာမိတ်ဂမၠိုၚ် သွက်ဂွံရေၚ်တၠုၚ်အာ အတိုၚ်ကတိ ပလံၚ်ဗစိုပ်ကဵုအရီုဗၚ်လွဟ်လက်နက်တံဂှ် ဂိတုတုဲတုဲကၠုၚ်ဏံ ဟွံဂွံရေၚ်တၠုၚ်လဝ်ကီုလေဝ် ပလံၚ်ဗစိုပ်ဂလိုၚ်ပ္တိုန်အာ လွဟ်လက်နက်တံရောၚ် ဇၞော်သ္ကိုပ်ဂကောံနေတိုဝ် ဂျာန်သတိုဝ်တာန်ဗက် ကဵုလဝ်ကတိရ။
ပ္ဍဲလၟေၚ်တရဴအာစိုပ်လဝ်ယူကရုၚ် ဟွံလလောၚ်တြးလဝ်ဂှ် သတိုဝ်တာန်ဗက်ဂှ် သဳကၠဳလဝ် ကုသမ္မတယူကရုၚ် ဇြဳလာန်သကဳတုဲ သဳကၠဳပ္တိုန်ထ္ၜးအာ ပ္ဍဲကၠတ်ထဝ်ယူကရုၚ်ဏောၚ်ဂှ် သ္ဂးလဝ်ရ။
ကြဴနူရုယှာ ၜက်ၜေတ်ယူကရုၚ် ပ္ဍဲသၞာံ ၂၀၂၂ ဂိတုဖေဖဝ်ဝါရဳတုဲဂှ် နဒဒှ်အလန်တတိယ လၟေၚ်တရဴဇၞော်သ္ကိုပ်ဂကောံနေတိုဝ်ဝွံ ဒပ်ယူကရုၚ်တံ အခိၚ်ဒှ်ဒၟံၚ်အခက်အခုဲ ပ္ဍဲမုက်ပၞာန်ဂှ် မံက်တိတ်ကၠုၚ်ရ။
ပၞာန်ကလေၚ်ပၠန်ဗတိုက် ယူကရုၚ် ဟွံအံၚ်ဇၞး ဒှ်အာလဝ်တုဲ ဟိုတ်နူဍုၚ်ပလိုတ် ဒေါအ်ဇူလဝ် ပရေၚ်ပလံၚ်ဗစိုပ်လွဟ်လက်နက်တံဂှ်ရ ဒပ်ရုယှာတံဝွံ ပြဟ်ဟ်ဏံ ကလိဂွံမံၚ် ပေါဲအံၚ်ဇၞးရောၚ် ဂွံတီကေတ်ရ။
ဍုၚ်လုပ်ဂကောံညးတံဝွံ ပ္ဍဲဂိတုတုဲကၠုၚ်တေံ အတိုၚ်ကဵုလဝ်ကတိ ပလံၚ်ဗစိုပ်ကဵုလွဟ်လက်နက်တံ ဟွံမွဲပုဟ်ဂှ် မိက်ဂွံဟီုတပ်ပ်ရောၚ် သတိုဝ်တာန်ဗက် ဟီုလဝ်ရ။
သွက်ဂွံကဵုအရီုဗၚ်ပလံၚ်ဗစိုပ် ကုယူကရုၚ်ဂှ် အမေရိကာန် ဒးကေတ်လဝ်အခိၚ် တြဴဂိတုတုဲ ဍုၚ်ဥရဝ်ပ ပိုယ်တံ အတိုၚ်ကဵုလဝ်ကတိ ပလံၚ်ဗစိုပ်ကဵုလဝ် လွဟ်လက်နက် ဟွံမွဲကီုလေဝ် အခိၚ်လၟုဟ် အကာဲအရာပြံၚ်လှာဲကၠုၚ်ဏောၚ် ဒဒှ်ရစၟဳစလဝ်ဂှ် ဇၞော်သ္ကိုပ်နေတိုဝ် သ္ဂးလဝ်ရ။
နေဝ်တာလာန်ဂှ် သွက်ဂွံပလံၚ်ဗစိုပ်အရီုဗၚ် ကုယူကရုၚ်ဂှ် ဂလိုၚ်ပတိုန်လဝ်တုဲ ဂျာမာန်ဝွံလေဝ် သွက်ဂွံပလံၚ်ဗစိုပ် သၞောတ်စဵုဒၞါ တရဴကျာပက်ထရာ်ဂှ် ကဵုလဝ်ကတိရောၚ် ဂွံတီကေတ်ရ။
ရုယှာဝွံ ဂွံသီဂွံတိဍာ်ညိညဂှ် ဒးဒုၚ်ဆောံလေၚ်လဝ် တၟာဂလိုၚ်တုဲ နကဵုယူကရုၚ် ညံၚ်အကာဲအရာပေါဲဗ္တိုက် ဂွံပြံၚ်လှာဲအာ ကၠောန်ဂွံဒၟံၚ်ဏီဏောၚ်ဂှ် ဂွံတီကေတ်ရ။
နကဵုဂကောံနေတိုဝ် အတိုၚ်ကတိကဵုလဝ် သွက်ဂွံပလံၚ်ကဵုလွဟ်လက်နက် ကုယူကရုၚ်ဂှ် စိုပ်အခိၚ်ယျ ဒဒှ်ရညးစှ်ေစိုတ်ဂှ် ဇၞော်သ္ကိုပ်နေတိုဝ် ဟီုလဝ်ရ။
Ref: Reuters