မတ်မလီု၊ မေ ၁
အလဵုအသဳညဳသၟဟ်ဂကူ NUG ကဵု ဂကောံဇြဟတ်ပၠန်ဂတး ရပ်လွဟ်ကောန်ဍုၚ်အရၚ်တံဝွံ ထိၚ်ဒက်ဂွံလဝ် ကၟိန်ဍုၚ် ၆၀ တၟံကၠံပြၚ်ယျဂှ် ညးမၞုံအခေါၚ်ဟီုဂး NUG ဥူနေဖုၚ်လာတ် ဟီုရ။
နဒဒှ်စၟတ်သမ္တီ ဒက်ပ္တန်အလဵုအသဳညဳသၟဟ်ဂကူ NUG ပေၚ်ပိသၞာံတုဲ ပ္ဍဲပေါဲသောၚ်ကလးလိက်ပရိုၚ် မကၠောန်ဗဒှ်လဝ် ပ္ဍဲဂိတုဨပရဴ ၃၀ ဂှ် ဥူနေဖုၚ်လာတ် ဟီုစုတ်လဝ်ရ။
ဥူနေဖုၚ်လာတ်ဂှ် အပ္ဍဲပွိုၚ်ပိသၞာံ အလဵုအသဳညဳသၟဟ်ဂကူကဵု ဂကောံဇြဟတ်ပၠန်ဂတးရပ်လွဟ်တံဝွံ သီုကဵုဍုၚ်သွံရာန်ဗၞိက်ပယျဵု ၅ ဍုၚ် မပါလုပ် ကၟိန်ဍုၚ်ဗၟာ ၆၀ တၟံကၠံပြၚ်ဂှ် ထိၚ်ဒက်ဂွံလဝ်ရောၚ် ဟီုရ။
သ္အာၚ်နူဂှ်ပၠန် ဍုၚ်မဒှ်ပွန်ပရေၚ်ပၞာန် ဒှ်အဓိကဂမၠိုၚ် မပ္တံကဵုနေဗျဳဒဝ်၊ ပျေန်ဥူလွေန်၊ ကပစ ကေုာံ ရုၚ်စက်ပ္တိတ်လွဟ်လက်နက်တံဂှ် လုပ်ထ္ပက်ဗ္တိုက်မာန်လဝ်တုဲ စိုပ်ဒၟံၚ်အကာဲအရာ ထ္ပက်ကၠုၚ်ပၞာန်မာန်ယျဂှ် သ္ဂးရ။
စပ်ကဵု NUG ကေုာံ ဂကောံဇြဟတ်ပၠန်ဂတးရပ်လွဟ်ကောန်ဍုၚ်အရၚ်တံ ထိၚ်ဒက်ဂွံလဝ် ၆၀ တၟံကၠံပြၚ်ဂှ်တုဲ ညးမၞုံအခေါၚ်ဟီုဂး ရုၚ်သမ္မတ ဥူနေဖုၚ်လာတ် ဟီုလဝ် သာ်ဏံရ။
“စပ်ကဵုတိဍာ်ပိုယ်တံ ထိၚ်ဒက်ဂွံလဝ်တုဲမ္ဂး အဓိကဂှ်တှ်ေ နကဵုတိဍာ်မ္ဂး တိဍာ်အုပ်လဒံ၊ တိဍာ်ထိၚ်ဒက် ကေုာံ တိဍာ်ဗၠးၜး နွံရ။ လၟုဟ် ၆၀ တၟံကၠံပြၚ်ဟီုဂှ် သီုပိဂကူဏံ ပိုယ်တံသရုပ်တုဲ ၆၀ တၟံကၠံပြၚ်ဂးတုဲ ဟီုဒၟံၚ်ရ” သာ်ဝွံ သ္ဂးရ။
သ္အာၚ်နူဂှ်ပၠန် ပ္ဍဲကဵုပွိုၚ်ဍုၚ် ထိၚ်ဒက်လဝ်တံဂှ် သွက်ပရေၚ်ဂီုကၠီုညးဍုၚ်ကွာန်တံဂှ် ဒက်ပ္တန်လဝ် ဂကောံဒပ်စဵုဒၞါညးဍုၚ်ကွာန် (ပကဖ) ၊ ဂကောံဒပ်ဂီုကၠီုညးဍုၚ်ကွာန် (ပလဖ) တံသၟးဟွံက သွက်ပရေၚ်သၞောဝ်ဥပဒေအုပ်လဒံဂှ် ဒက်ပ္တန်လဝ် ဂကောံအုပ်ဓုပ်ညးဍုၚ်ကွာန် အဆံၚ်ၚ်တုဲ အုပ်ဓုပ်ဒၟံၚ်ရောၚ် ဥူနေဖုၚ်လာတ် ဟီုလဝ် ပ္ဍဲပေါဲသောၚ်ကလးလိက်ပရိုၚ်ရ။
မွဲလ္ပာ်ဂှ်ပၠန်လေဝ် သွက်ဂွံပံၚ်တောဲရေၚ်တၠုၚ်အာ မဟာဗျူဟာပရေၚ်ပၞာန်တံဂှ် ဒက်ပ္တန်လဝ် ကမ္မတဳ ပရေၚ်ပံၚ်တောဲပ္ညဳပ္ညပ် C3C ကေုာံ J2C ဂကောံဇြဟတ်ပၠန်ဂတးမဟာမိတ်တံကဵု ဂကောံကောပ်ကာဲဗဟဵုတံတုဲ ကေတ်အဆက်ရေၚ်တၠုၚ်ဒၟံၚ်ရောၚ် ကဵုလဝ်သမ္တီရ။
အခိၚ်လၟုဟ် အလဵုအသဳညဳသၟဟ်ဂကူ NUG ကဵု ဂကောံဇြဟတ်ပၠန်ဂတးရပ်လွဟ်တံဝွံ သီဂွံလဝ် ပွိုၚ်ဍုၚ် အပံၚ်ဖအိုတ် ဟွံအောန်နူကဵု ၅၀ ရ။
ပရိုၚ်−သြၚ်လောန်တိုၚ်(မ်)
ဗီု−(တောကျီးကန်း)