မတ်မလီု၊ မေ ၁
ကမၠောန်တမ္ၚာ သြၚ်သ္ၚောဲသြၚ်ကြပ် မၞုံအပ္ဍဲတွဵုရးဍုၚ်မန်တံဝွံ ကရောံၚုဟ်ဗၞိက်ဖျာ သၠုၚ်တိုန်ကၠုၚ်ဂှ် ဟိုတ်နူခရိတ်အိုတ်နာနာ ဂၠိုၚ်ဒၟံၚ်ကီုတုဲ ပ္ဍဲရာသဳတမ္ၚာသၞာံဏံ ကျဗြံလဝ်ရောၚ် တၠကမၠောန်တမ္ၚာတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ရာသဳတမ္ၚာ သြၚ်သ္ၚောဲသြၚ်ကြပ်ဂှ် လၟေၚ်သၞာံ စၟတ်လဝ် နူဂိတုဂျူလာၚ် စဵုကဵုဂိတုဨပရဴအိုတ်ကီုလေဝ် သၞာံဏံ ဂွံကၠုၚ်က အောန်စှ်ေကၠုၚ်တီတီကီု၊ ခရိတ်အိုတ်ဂမၠိုၚ် ဇၞော်သၠုၚ်ဂှ်ကီု သီုကဵုၚုဟ်က ၜိုတ်ချိၚ်လဝ်ဂှ် ဟွံခိုဟ်ဂှ်တုဲ ဒးကျဗြံလဝ်ရ။
သ္အာၚ်နူဂှ်ပၠန် အပ္ဍဲရာသဳပါမ်ကဂှ် ဟိုတ်နူကျာလဗိုတ် ဘဲသဘာဝတံဂှ်တုဲ ကဒး အောန်စှ်ေအာတုဲ ဟိုတ်ဒၟါနူဂၠုၚ်ပါမ်က ဟွံလုပ်သၞောဝ်တံကဵု ဇာပါမ်က ဟွံလုပ်သၞောဝ်တံဂှ်တုဲ ဒးဂဗလဝ်ကဵုအကာဲအရာ ကလိဂွံက အောန်စှ်ေကၠုၚ် တီတီရ။
တၠကမၠောန်ကမွဲတၠဂှ် ကမၠောန်တမ္ၚာတံဂှ် ၚုဟ်ဗၞိက်အရာရာအိုဿီု က္ဍၚ်တုဲ ကလိဂွံက အောန်နူကဵုကၠာတေံဂှ်တုဲ တၠကမၠောန်က ဗွဲမဂၠိုၚ် ဒးဆေၚ်လဝ်မုက်ကဵု ကျဗြံတံရောၚ် ဟီုရ။
“သီုညးဖအိုတ် ကျဒၟံၚ်ဏောၚ်။ အဓိက ဂၞန် ၁ ဂှ် ကၠေၚ်ၚုဟ်က္ဍၚ်ဒၟံၚ်ဏောၚ်။ ဍာ်ကလောံ ၚုဟ်က္ဍၚ်ဒၟံၚ်ဏောၚ်။ ၚုဟ်ကောန်ကလောန်တံ တိုန်ဒၟံၚ်။ ၚုဟ်ဗၞိက်တံဂှ်လေဝ် သၠုၚ်တိုန်အာ ကဵုဆရ။ အေ ဂှ်တှ်ေ ကလိဂွံက ပ္ဍဲၜဳဂှ်လေဝ် တၟော်ကဵုသၞာံတွဵုတွဵုမ္ဂး အောန်စှ်ေအာရ။ မုဒှ်အာဗီုပြၚ်သာ်လဵုရောဟီုတှ်ေ သြန်လုပ်ကဵုသြန်တိတ်ဂှ် သြန်တိတ် ဂၠိုၚ်အာရ” သာ်ဝွံ သ္ဂးရ။
တၠကမၠောန်တမ္ၚာ သြၚ်သ္ၚောဲသြၚ်ကြပ်ဂမၠိုၚ်ဝွံ ခရိတ်အိုတ်ဂၠိုၚ်တုဲ ကလိဂွံကအောန်ဂှ်ရ ကၠာရာသဳပါမ်က ဟွံအိုတ်ဏီဂှ် ဒးဖအောန်ဖျေံလဝ် ကမၠောန်နွံတုဲ တၠကမၠောန်လ္ၚဵုတံဂှ်တှ်ေ ၜိုတ်ကမၠောန်ဂေတ်ဂြိပ်ရဟေၚ် ကၠောန်ၜိုတ်ဒၟံၚ်တံ နွံဂှ် ညး ဆက်ဟီုရ။
မွဲလ္ပာ်ဂှ်ပၠန် ဌာနမဆေၚ်စပ် သၟဝ်တဲကံၚ်ဇြဳပၞာန်တံဂှ် ကေတ်ကဵုအရေဝ် ကုဂၠုၚ်တမ္ၚာ ဟွံလုပ်သၞောဝ်တံကဵု ဇာပါမ်က ဟွံလုပ်သၞောဝ်တံ ဗီုကၠာတေံ ကွေံကွေံကြာန်န်ဟွံမွဲဂှ်ရ သယံဇာတကတံ လေၚ်ဒိုက်တုဲ ကလိဂွံက အောန်စှ်ေအာ တီတီရ။
ကမၠောန်တမ္ၚာ သြၚ်သ္ၚောဲသြၚ်ကြပ်တံဝွံ နူစရာသဳပါမ်ကစတေံဂှ်ရ ဒးဆေၚ်လဝ်မုက်ကဵု ပြသၞာကောန်ကလောန်အောန်ဂှ်တုဲ ကပေါတ်ဆက်စပ်ကဵု ဂၠုၚ်တမ္ၚာတံ ၚုဟ်က္ဍၚ်ဂှ်လေဝ် ဒးဂဗလဝ်ရ။
ပရိုၚ်−သြၚ်လောန်တိုၚ်(မ်)
ဗီု−CJ