ၜၚ်ကံက်၊ မေ ၁
ဨကရာဇ်သေံ ဒဒှ်ရသ္ပဒတန်ထောံ အမာတ်ကလုတ်ဒေါအ်ဇူ မာရေတ်သာန်ဂဳယာမ်ပေါန်သာ နဒဒှ်ဝန်ဇၞော်ကာဍုၚ်သ္အာၚ် ဍုၚ်သေံဂှ် လိက်ပရိုၚ်ဝၚ်နန် ထ္မံက်ထ္ၜးလဝ် ပ္ဍဲဂိတုမေ ၁ တေံရ။
မာရေတ် အာယုက်မၞုံ ၆၅ သၞာံ ယိုက်ဂၠေၚ်လဝ်တာလျိုၚ် နဒဒှ်အမာတ်ကလုတ်ဍုၚ်သေံ စပ်ကဵုအဝ်သတြေလျ ကေုာံ ဍုၚ်ကနေဒါတံဂှ်ဝွံ နဒဒှ်ညးကဵုကသပ် ဝန်ဇၞော်ကာဍုၚ်သ္အာၚ် ပါမ်ပရဳ မနုက်တိတ်အာနူကဆံၚ်ဒၞါဲညးဂှ်လေဝ် ကေၚ်ကေတ်လဝ်တာလျိုၚ်ရ။
ပါမ်ပရဳဝွံ အပ္ဍဲအပြံၚ်အလှာဲ ဒၞါဲကဆံၚ်ဌာနန္တရဂကောံဝန်ဇၞော်ဂှ် ဟိုတ်နူဟွံဂွံဆက်ယိုက်ဂၠေၚ် နဒဒှ်ကဆံၚ်လစှ်ေသ္ကိုပ်ဝန်ဇၞော် ကၠာတေံ ဖက်ဆောကေတ်လဝ်တာလျိုၚ်ဂှ်တုဲဂှ် ပ္ဍဲဂိတုဨပရဴ ၂၈ တေံ ဟွံစၟဳစလဝ်မွဲသာ် နုက်တိတ်အာလဝ်ရ။
အခိၚ်ဍုၚ်သေံ သၠုၚ်ပ္တိုန်အသိၚ် ဂ္စါန်ရပ်စပ်သောၚ်ကလးဒၟံၚ် ပြသၞာဍုၚ်ဗၟာ ဒှ်ဒၟံၚ်ပၞာန် နကဵုပရေၚ်ကလုတ်တမာန် အခိၚ်ပၟိက်ဇၞော်ဂှ် ပွမခါန်ကၞက်ပ္တိုန် ကဆံၚ်ဝန်ဇၞော်ကာဍုၚ်သ္အာၚ်ဏံ က္တဵုဒှ်ကၠုၚ်ရ။
အကြာဂကောံ ဝေၚ်ဒၟံၚ်ပၞာန်တံ ညံၚ်ဂၠံၚ်သဳကၠဳဆဵုဂဗ ဂၠံၚ်ဂွံပံက်အာ ရန်သာ်ဏံတုဲ အပ္ဍဲဂိတုမာတ်တေံ ဍုၚ်သေံ စပလံၚ်ဗစိုပ်လဝ်ကဵု အရီုဗၚ်ပရေၚ်ဗ္စာရဏာမၞိဟ် ပ္ဍဲဍုၚ်ဗၟာရ။
အစဳဇန်ပရေၚ်ၜိုဟ်လလမ်အာဇြဳယာန်ဝွံ လလောၚ်တြးတုဲ စဵုကဵုလအ်အာပွိုၚ်ပိသၞာံ ရုပ်ရဴဟွံမံက်ကၠုၚ် က္တဵုဒှ်ဒၟံၚ်ဂှ်ရ နကဵုအာဇြဳယာန် သွက်ဂွံရေၚ်တၠုၚ် သ္ဂောံဂၠါဲသွဟ်ပြသၞာဍုၚ်ဗၟာ က္တိုၚ်က္တိုၚ်ကၟဟ်ဟ်ဂှ် ဍုၚ်သေံ ကဵုကၠုၚ်ဇြဟတ်ဂရိုဟ်ရ။
စပ်ကဵုဒှ်ကယျာန်ဓဝါန်ဒၟံၚ် ကံၚ်ဇြဳပၞာန် သ္ဂောံသဳကၠဳကဵု ဂကောံဇြဟတ်ပၠန်ဂတးတံဂှ် ဍုၚ်မဒှ်ဂကောံအာဇြဳယာန်ဂမၠိုၚ် စိုတ်အိုတ်ဒၟံၚ်အိုတ်ရ။ ညံၚ်ပြသၞာဍုၚ်ဗၟာ ဂွံပြေပြံၚ်အာဂှ် ဍုၚ်သေံ ပ္တိုန်လဝ်ဂလာန် အစဳဇန်ဍုၚ်အာဇြဳယာန်ပိဍုၚ် အေန်ဒိုဝ်နဳယှာ၊ မလေဝ်ယှာ၊ လာအိုဝ်တံ ပါလုပ်ပ္တိတ်အာဇြဟတ်တုပ်ပ်မွဲဂှ်တုဲ ဥက္ကဌအာဇြဳယာန်လၟုဟ် လာအိုဝ် ဒုၚ်လဝ်တၠုၚ်ရ။
Ref: The Strait Times