မတ်မလီု၊ မေ ၃
ရုၚ်ဂဥုဲအေသန္တာ မၞုံလ္တူဍုၚ်မတ်မလီု တွဵုရးဍုၚ်မန်ဂှ် နကဵုဟိုတ်ခါန်ကၞက်လဝ် ညးယိုက်ဝန် CDM တံဂးတုဲ ကံၚ်ဇြဳပၞာန် ကၟာတ်ထောံလဝ် ပိဂိတုရောၚ် ဂၠိုက်ဂၠါဲဂွံတီကေတ် နူကဵုဗွိုၚ်အ္စာဂဥုဲဂမၠိုၚ်ရ။
ဌာနပရေၚ်ထတ်ယုက် သၟဝ်တဲကံၚ်ဇြဳပၞာန်တံ မပါလုပ် နူဌာနပံၚ်ကောံနာနာတံ ကြဴနူလုပ်စိုပ်စၟဳတ် ပ္ဍဲရုၚ်ဂဥုဲအေသန္တာ ခါန်ကၞက်လဝ် အ္စာဂဥုဲ CDM ကေုာံ အ္စာမြိမြန်ယဲတံ နွံ၊ ဟွံမွဲတုဲဂှ် ကၟာတ်လဝ်ယာယဳရ။
ရုၚ်ဂဥုဲအေသန္တာ မဒှ်ရုၚ်ဂဥုဲပုဂ္ဂလိကဂှ် နကဵုဟိုတ်ခါန်ကၞက်လဝ် ညးယိုက်ဝန် CDM တံဂှ်ဂးတုဲ ပပ္တံနူဂိတုမေ ၁ တုဲ ကံၚ်ဇြဳပၞာန် ကၟာတ်ထောံပွိုၚ်ပိဂိတုရ။
အတိုၚ်ဂလာန် အ္စာဂဥုဲမွဲတၠဂှ်မ္ဂး ဂကောံကံၚ်ဇြဳပၞာန် ပံၚ်ကောံတံဝွံ ကြဴနူစၟဳတ်ရုၚ်ဂဥုဲဂှ်တုဲဂှ် ကဵုမၞိဟ်ယဲဂမၠိုၚ် စှ်ေနူရုၚ်ဂဥုဲလွာဲဂှ်တုဲ ကၟာတ်ထောံလဝ်ရုၚ်ဂဥုဲရောၚ် ဟီုရ။
ဒဒှ်မကၟာတ်ထောံ ရုၚ်ဂဥုဲအေသန္တာဂှ်ဝွံ ဒှ်ပွဍဵုဍိုက်ညးယိုက်ဝန် CDM တံကီု၊ ပ္ဍဲရုၚ်ဂဥုဲတၞဟ်ဟ်တံဂှ်လေဝ် ညံၚ်ဂွိုအ်ခါန်ကၞက်ပ္တိုန် CDM တံဂှ်တုဲ ဒှ်သဘဴဘပဠလဝ်ရောၚ် ဗွိုၚ်အ္စာဂဥုဲတံ ပါ်ပါဲလဝ်ရ။
ကံၚ်ဇြဳပၞာန် သ္ပမာန်ဍဵုဍိုက်ဒၟံၚ် ညးယိုက်ဝန် ပရေၚ်ထတ်ယုက် သ္ပလဝ် CDM တံဂှ်ဝွံ အခိၚ်ကာလတုဲကၠုၚ်တေံဂှ်လေဝ် ညံၚ်ဂွိုအ်ခါန်ကၞက် သၞာဲဒဴ CDM တံ ပ္ဍဲရုၚ်ဂဥုဲ ပုဂ္ဂလိကတံဂှ် ပလံၚ်ဗစိုပ်လဝ်လိက် ကေုာံ ကဵုထ္ပက်စၟတ်တဲဒုၚ်လျိုၚ်တံ နွံလဝ်ရ။
အတိုၚ်လိက်ဒုၚ်စဳရေၚ် ဂကောံမၚ်မွဲရီုဗၚ် ကောန်ထံၚ်ပရေၚ်ဍုၚ်ကွာန် AAPP တံဂှ်မ္ဂး အပ္ဍဲကာလသီအဝဵု ပေၚ်ပိသၞာံပြၚ်ဏံ ကံၚ်ဇြဳပၞာန် သီထောံလဝ် ရုၚ်ဂဥုဲ ကေုာံ ဗ္ဒမ်ဂဥုဲ ၁၁ ဟွံဗဗွဲကဵုသၞောဝ်ရောၚ် ပ္ဍဲဂိတုမေ ၁ တေံ လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−CJ