ထဝါဲ၊ မေ ၃
ရးတၞၚ်သဳ ပွိုၚ်ဍုၚ်ထဝါဲ ကွာန်(မောၚ်မယ်ရှောၚ်) ဗ္ဒါဲသၞေဟ်ကၚ်စၟဳတ်(ဘုရားမဲ)ဂှ် ဟိုတ်နူပေါဲဗ္တိုက်ၜါလ္ပာ် က္တဵုဒှ်လဝ်တုဲ ညးဒေသ အလုံကွာန်မွဲ ဒးဂြိပ်ဒဴပါဲဒလေတ်ဒၟံၚ်ရောၚ် ညးဍုၚ်ကွာန်ပါဲဒဴဘဲပၞာန်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲဂိတုမေ ၂ အခိၚ်နူဂယး ၜိုတ် ၆ နာဍဳဂှ် ဂကောံဒပ်ပံၚ်ကောံ ဂကောံဇြဟတ်ပၠန်ဂတးတံ လုပ်စိုပ်ဗ္တိုက်လဝ် သၞေဟ်ကၚ်စၟဳတ်(ဘုရားမဲ) ကံၚ်ဇြဳပၞာန် ဖျေံလဝ်ဒပ် နကဵုဇြဟတ်ဒပ် ၃၀ ပြၚ်ဂှ်ရ။
ဟိုတ်နူပရေၚ်ဗ္တိုက်ဏံတုဲ ပေါဲဗ္တိုက်ၜါလ္ပာ် က္တဵုဒှ်လဝ် လလအ်ပွိုၚ်မွဲနာဍဳတုဲ အကာဲအရာဇီုကပိုက်ချိုတ်ဂျိုၚ် ဗွဲလစှ်ေ ဂှ်ဟွံဂွံတီကေတ်ဏီရ။
အခိၚ်ပေါဲဗ္တိုက်က္တဵုဒှ်ဒၟံၚ်ဂှ် နူဒပ်ကံၚ်ဇြဳပၞာန် ဖျေံသ္ဇိုၚ်ကွာန်ဇဟာ ပွိုၚ်ဍုၚ်ထဝါဲဂှ် ဘိုၚ်ပန်ပှော်ကဵုလဝ် လၟိဟ်လွဟ်လက်နက်ဇၞော် ဗွဲမဂၠိုၚ်ဂၠေၚ်ဂှ်ရ ဂွိၚ်ဖေက်ဒးလွဟ်ဇၞော်တုဲ ညးဒေသ အလုံကွာန်မွဲ ဒးဂြိပ်ဒဴပါဲဒလေတ်လဝ်ရ။
အတိုၚ်ဂလာန် ညးဍုၚ်ကွာန်ပါဲဒဴဘဲပၞာန်တံဂှ်မ္ဂး ညးဒေသ မောၚ်မယ်ရှောၚ်တံဝွံ ဆုဲပြံၚ်မံၚ်စံၚ်လဝ် လ္တူဍုၚ်ထဝါဲ သ္ၚောဲနူကဵုကွာန် ဗၞတ် ၃ မိုၚ်ဂှ်ကဵု ပ္ဍဲကွာန်ဗ္ဒါဲဗ္ဒါဲတံ ယာယဳရောၚ် ဂွံတီကေတ်ရ။
တုဲကၠုၚ် ပ္ဍဲဂိတုမာတ်အိုတ်တေံဂှ်လေဝ် ဒပ်ကံၚ်ဇြဳပၞာန်ကဵု ဒပ်စဵုဒၞါညးဍုၚ်ကွာန်တံ က္တဵုဒှ်လဝ်ပေါဲဗ္တိုက်ဆေၚ်မုက် ဗ္ဒါဲကွာန်မောၚ်မယ်ရှောၚ်တုဲ ညးဒေသတံ ဒးဂြိပ်လဝ် အလုံကွာန်မွဲရ။
ပ္ဍဲရးတၞၚ်သဳဂှ် စဵုကဵုဂိတုမာတ်တုဲကၠုၚ်တေံ ညးဍုၚ်ကွာန်ပါဲဒဴဘဲပၞာန် ထောံလသာသ္ၚိဌာန်တုဲ ဒးဂြိပ်ဒဴပါဲဒလေတ်ဒၟံၚ်တံ ၅ ဠက်ပြၚ် နွံကၠုၚ်လဝ်ရောၚ် ဂကောံသုတေသန FE5 Tanintharyi လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−CJ