တၞၚ်သဳ၊ မေ ၃
ဟိုတ်နူပေါဲဗ္တိုက်ၜါလ္ပာ် က္တဵုဒှ်ဒၟံၚ် ပ္ဍဲဂကောံကွာန်သိန္ဓော ပွိုၚ်ဍုၚ်တၞၚ်သဳ ရးတၞၚ်သဳဂှ်တုဲ ညးဍုၚ်ကွာန်ပါဲဒဴဘဲပၞာန် ၆၀၀၀ ပြၚ်ဝွံ တၚ်နွံပၟိက်ဇွောံမစၞစတံကဵု ဂဥုဲဇဗတံ နွံဒၟံၚ်ရောၚ် ဂွံတီကေတ် ဇရေၚ်ဂကောံနွေဥူမေတ္တာ ထံၚ်ပၚ်ရီုဗၚ်ပါဲဒဴဘဲပၞာန်ရ။
ဒၟါနူပေါဲဗ္တိုက်ၜါလ္ပာ် က္တဵုဒှ်ဒၟံၚ် ပ္ဍဲဂကောံကွာန်သိန္ဓောကဵု ပရေၚ်ဗ္တိုက်တရဴကျာ ကံၚ်ဇြဳပၞာန်တံဂှ်တုဲ ညးဍုၚ်ကွာန်ဒေသဂမၠိုၚ်ဝွံ စနူဂိတုဨပရဴ ၂၃ တုဲ ထောံလသာသ္ၚိဌာန် ဂြိပ်ဒဴပါဲဒလေတ်အာ ဒၞါဲဗၠးဘဲတံရ။
ညးဍုၚ်ကွာန်ဒေသ ၆၂၀၀ ပြၚ် နူကဵုဂကောံကွာန်သိန္ဓော မပ္တံကဵုကွာန်သိန္ဓော၊ ရေပူ၊ သူဌေးအရှေ့၊ သူဌေးအနောက်၊ မိုင်းသတ္တု၊ ဘန်းပြည့်အရှေ့ ကေုာံ ဘန်းပြည့်အနောက် နူကဵုကွာန် ၇ ကွာန်ဂှ်ဝွံ ဒဵုကဵုအခိၚ်လၟုဟ် ဒးပါဲဒလေတ်ဒၟံၚ်ဘဲပၞာန်တုဲ စဴဌာန်ဒၟံၚ်ဟွံမာန်ဏီရ။
ညးတာလျိုၚ် ဂကောံထံက်ပၚ်ရီုဗၚ် ပါဲဒဴဘဲပၞာန် နွေဥူမေတ္တာ မွဲတၠဂှ် ရီုဗၚ်ညးဒဴပၞာန်တံ မွဲဝါတှ်ေ ၜိုတ်မသုန်တ္ၚဲရ ထံက်ပၚ်ဇွောံမမာန်တုဲ မိက်ဂွံရီုဗၚ်ဍိုက်က်ပေၚ်ၚ်ကီုလေဝ် သွက်ညးပါဲဒဴဘဲပၞာန်တံဂှ် တၠဒါန်ဟွံမွဲဂှ်ရ ဇွောံမရုမ်ဂပ် ဟွံမွဲပုဟ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ညးပါဲဒဴဘဲပၞာန်တံဏံသီုဖအိုတ်ဂှ် အာမွဲတဲတှ်ေ ၜိုတ်မသုန်တ္ၚဲရဏောၚ်။ ၜိုတ်မသုန်တ္ၚဲရဏောၚ် ရုမ်ဂပ်မာန်။ ဗာတ်ဂျက်ဂှ် ဟွံမွဲစအှ်ေပုဟ်။ မၞိဟ်ကၠုၚ်စိုပ် ထံက်ပၚ်ဂှ်လေဝ်အောန်၊ တၠကမၠောန်ဂှ်လေဝ် အောန်အာစဵုကဵုဟွံမွဲရ၊ မွဲမှ ဟွံမွဲဏီပုဟ်။ ပ္တိုန်လဝ်ပ္ဍဲ Page ဂှ်လေဝ် ဂွံၜိုတ်ပန်ကိုဋ်ရဏောၚ်။ သ္ၚုမွဲရိုက်ဂှ် ဒှ်အာ ၁၁၅၀၀၀ ဒ္ကေဝ်ယျလေဝ်။ ထပ်တုဲမိက်ဂွံထံက်ပၚ်ဒၟံၚ်ရ ဆ္ဂး တၠဒါန်ဂှ်ဟွံမွဲတုဲ စိုပ်ဒၟံၚ်ဂတကီုလေဝ် ရဲထံက်ပၚ်လက္ကရဴဟွံမွဲ ဒှ်ဒၟံၚ်ရ” သာ်ဝွံ သ္ဂးရ။
ပ္ဍဲကဵုညးဍုၚ်ကွာန်ပါဲဒဴဘဲပၞာန် နွံ ၆၀၀၀ ပြၚ်ဂှ် ဒဵုကဵုအခိၚ်လၟုဟ် ဟိုတ်နူပေါဲဗ္တိုက် က္တဵုဒှ်ဒၟံၚ်တံဂှ်ကဵု အကာဲအရာဗလးတိတံဂှ်တုဲ ၜိုတ်က္ဍစိုပ် နူဂကောံနွေဥူမေတ္တာ အာစိုပ်ရီုဗၚ်လဝ်ဂှ် လၟိဟ်ညးပါဲဒဴဘဲပၞာန် ၁၂၀၀ ပြၚ်ရ နွံလဝ်ရောၚ် သ္ဂးရ။
သ္အာၚ်နူဂှ်ပၠန် ပ္ဍဲအရာအာစိုပ်ရီုဗၚ် ညးပါဲဒဴဘဲပၞာန်တံဂှ်လေဝ် ဟိုတ်နူဘဲပၞာန်ကျာကံၚ်ဇြဳပၞာန်ကဵု အန္တရာယ်မာၚ်တိုပ်တိတံဂှ်တုဲ ဒးဆေၚ်ဒၟံၚ်မုက် အခက်အခုဲနာနာသာ်ရောၚ် ညးတာလျိုၚ် ဂကောံရီုဗၚ်ထံက်ပၚ် ပါဲဒဴဘဲပၞာန် နွေဥူမေတ္တာမွဲတၠ ဟီုလဝ်ရ။
“အခက်အခုဲဂှ်တှ်ေ နွံတၟာဂလိုၚ်ရ။ အကာဲအရာအကးတေံဂှ်လေဝ် ဒးမၚ်ကျောဝ်ဒၟံၚ်ဏီဏောၚ်။ ဇကုဂှ်လေဝ် ကောန်ရုပ်စက် ပသဲက္ဍိုၚ်ဟွံသေၚ်ပုဟ်။ ဆ္ဂး ပ္ဍဲအကာဲအရာသ်ာဏံဂှ် ဇကုဇကုရဂှ် ဂွိၚ်ဟွံဂတာပ်ပုဟ်။ ဒးဂွိၚ်ဒၟံၚ် ကုညးတံသၟး။ ဂဗအာ ကုစကစတံဏံ ပ္ဍဲဂၠံၚ်ရဟာ၊ လိုန်ဒးမာၚ်ရဟာ သာ်ဏံ နွံရ” သာ်ဝွံ သ္ဂးရ။
မွဲလ္ပာ်ဂှ်ပၠန် ကံၚ်ဇြဳပၞာန် ကၟာတ်လဝ်အခေါၚ်ပလံၚ်ဗစိုပ် ဇွောံမ ကေုာံ ဂဥုဲဇဗ ကုကွာန် နူပွိုၚ်ဍုၚ်တၞၚ်သဳတံဂှ်တုဲ သွက်ညးပါဲဒဴဘဲပၞာန်တံဂှ် နွံပၟိက်ဒၟံၚ်ကဵု ဂဥုဲပဿဴဍာတ်ကဵု ဂဥုဲဆီၜေတ်တံဂှ်သၟးဟွံက ပ္ဍဲကဵုဂၠံၚ်တံဂှ်လေဝ် လ္ပာ်ကံၚ်ဇြဳပၞာန် ပတေၚ်ဂြတ်လဝ် ပရေၚ်စၟဳတ်တံဂှ် ဂွံတီကေတ်ရ။
ပ္ဍဲဂကောံကွာန်သိန္ဓောဂှ် စနူဂိတုဨပရဴ ၂၂ တုဲကၠုၚ်တေံတုဲ အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ ဂကောံဇြဟတ်ပၠန်ဂတးတံဂှ် ပေါဲဗ္တိုက်သ္ကာတ်မြဟ်လဝ်တုဲ ဟိုတ်နူကံၚ်ဇြဳပၞာန် ဗ္တိုက်ဂြာတ်မခတိုဟ် အပ္ဍဲပေါဲဗ္တိုက်တံတုဲ ညးဍုၚ်ကွာန်ကောန်အရာပ် ဇီုကပိုက်တံကဵု သ္ၚိဌာန်လီုလာ်အာတံ နွံဒၟံၚ်ကီုလေဝ် ချိုတ်တ်ပၠိုတ်တ်ဂှ်တှ်ေ နကဵုသြၚ်လောန်တိုၚ်(မ်) သ္ပဒတန်တၞဟ်ခြာ ဟွံမာန်ဏီရ။
ပ္ဍဲရးတၞၚ်သဳ ဟိုတ်နူပေါဲဗ္တိုက်ၜါလ္ပာ် မက္တဵုဒှ်လဝ် ပ္ဍဲဂိတုမာတ်တုဲကၠုၚ်တေံဂှ်တုဲ ညးဒးထောံလသာသ္ၚိဌာန် ဒးဂြိပ်ဒဴပါဲဒလေတ်တံ ဂၠိုၚ်တိုန်ကၠုၚ် စဵုကဵု ၅၄၀၀၀ ပြၚ်ရောၚ် ဂွံတီကေတ် အတိုၚ်လိက်ဒုၚ်စဳရေၚ် ဂကောံသုတေသန FE5 Tanintharyi ပ္တိတ်လဝ်ပ္ဍဲဂိတုဨပရဴ ၁၃ တေံရ။
ပရိုၚ်−သြၚ်လောန်တိုၚ်(မ်)
ဗီု− နွေဦးမေတ္တာ