မတ်မလီု၊ မေ ၃
ကံၚ်ဇြဳပၞာန် ကျဒၟံၚ်ပၞာန် ဇၟာပ်ပေါဲဗ္တိုက် အလုံဍုၚ်မွဲဂှ်ဝွံ ပ္ဍဲအရာကော် သ္ကဵုယိုက်ဂၠေၚ်လျိုၚ်ပၞာန် အတိုၚ်သၞောဝ်ယိုက်ဂၠေၚ်လျိုၚ်ပၞာန်ဂှ် ညးသၟတ် စၟဳတ်လဝ်ယဲ ဟွံအံၚ်ဇၞးတံဂှ်လေဝ် သွက်ဂွံပကောံကၠုၚ် နဒဒှ်ကောန်ပၞာန်ဂှ် စၞောန်ပ္ညုၚ်ကၠုၚ်ရောၚ် ဂွံတီကေတ် အတိုၚ်ဂလာန် တမ်ရိုဟ်ပရိုၚ်အပ္ဍဲဒပ်ရ။
အတိုၚ်သၞောဝ်ယိုက်ဂၠေၚ်လျိုၚ်ပၞာန်ဂှ်မ္ဂး မၞိဟ် ဂကောံစၟဳတ်ယဲတံ စၟတ်သမ္တီလဝ် ဒဒှ်ရဟွံဂပ်ဝ်ကဵု ယိုက်လျိုၚ်ပၞာန်တံဂှ် အခေါၚ်ဗၠးၜး နူပွမလုပ်ပၞာန်တံ နွံရောၚ် စၞောန်ပျးလဝ်ကီုလေဝ် အခိၚ်လၟုဟ် မၞိဟ်ယဲခန္ဓမၞုံတံ မပါလုပ် သီုညးစၟယဲ HIV တံ ဒှ်တမ် သွက်ဂွံပ္ကောံကၠုၚ်ကောန်ပၞာန်ဂှ် စၞောန်ပ္ညုၚ်လဝ်ရ။
အတိုၚ်ဂလာန် တမ်ရိုဟ်ပရိုၚ်အပ္ဍဲဒပ်မွဲတၠ ဟီုလဝ်ဂှ်မ္ဂး ပ္ဍဲဒၞါဲကော်ကဵုယိုက်လျိုၚ်ပၞာန်တံဂှ် သီုညးယဲခန္ဓနွံတံ မပါလုပ် စနူကဵုမၞိဟ်ဇိုၚ်ကဝ်တဲကဝ်တံဂှ် ကဵုစၟဳတ်ယဲအံၚ်ဇၞးလဝ်တုဲ စၟတ်ထောံ ကဆံၚ်ဂဥုဲဍေံကဵုဍေံတုဲ သွက်ဂွံယိုက်ဂၠေၚ်လျိုၚ်ပၞာန် အနိၚ်အပိုၚ်ဂှ် စၞောန်ပ္ညုၚ်လဝ်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“စၞောန်ပ္ညုၚ်လဝ် ဒပ်ဂဥုဲတံ သာ်လဵုရောဟီုတှ်ေ အပ္ဍဲပွိုၚ်ၜါဂိတု ညံၚ်ဂွံစၟဳတ်ယဲမာန် ကဵုကၠောန်လဝ်။ ပ္ဍဲဒၞါဲစၟဳတ်ယဲတံဂှ် စၟယဲ HIV ၊ စၟယဲ B ကေုာံ ဇိုၚ်ကဝ်တဲကဝ်တံဂှ်လေဝ် ကဆံၚ်ဂဥုဲစှ်ေအာဟွံဂွံပုဟ်။ ညးတံ အခေါၚ်ကဵု A B C ရနွံ။ A တှ်ေ ထတ်တ်ယုက်က်ရဏောၚ်။ ဗ္တိုက်ပၞာန်ဂွံ။ စၟတ်လဝ် B ယဲကောန်တၟအ်တံနွံဟီုတှ်ေ ဒးကေတ်ကဵုဂီုကၠီု ကုတိုက်သြန်နွံပ္ဍဲဂၠံၚ်တံ။ ဒးမၚ်ကၚ် ပ္ဍဲဒၞါဲလုပ်တိတ်ဍုၚ်တံဂှ်ဏောၚ်။ C ဂှ်တှ်ေ မၞိဟ်ဒှ်ဒၟံၚ်ယဲ HIV တံ၊ ရဲစၟယဲဗဳနွံတံ၊ တုဲတှ်ေ ရဲဇိုၚ်ကဝ်၊ တဲပိုတ်ဒၟံၚ်တံဂှ်တှ်ေ ပ္ဍဲကဵုရုၚ်ဌာနတံ မဒှ်ရ။ ဒးအာယိုက်ဂၠေၚ်တာလျိုၚ် ပ္ဍဲဌာန်ဂအုပ်ပၞာန်ရးတံ၊ ရုၚ်တမ်ဒပ်တံဏောၚ်ဂှ် ဟီုလဝ်ရ။ စၞောန်လဝ် သာ်ဏံရ” သာ်ဝွံ သ္ဂးရ။
အတိုၚ်သၞောဝ်ယိုက်ဂၠေၚ်လျိုၚ်ပၞာန်ဂှ်မ္ဂး ညးယိုက်ဝန်သာသနာ၊ ညးဗြဴ မၞုံကဵုအိန်ထံၚ်၊ ညးအဝဲအၚ်္ဂဟွံခိုၚ်ကၠိုက် က္တဵုဒှ်ဒၟံၚ်မွဲမွဲသာ် လၟိုန်တံ ကေုာံ နူကဵုဂကောံဗဟဵု ကော်ယိုက်ဂၠေၚ်လျိုၚ်ပၞာန်တံ လလောၚ်ပ္တိတ်လဝ်အမိၚ် မၞိဟ်ကဵုဗၠးတိတ်နူအခေါၚ်ယိုက်ဂၠေၚ်လျိုၚ်ပၞာန်တံဂှ် အခေါၚ်ဟွံဒးလုပ်ပၞာန်တံ နွံရောၚ် စၞောန်ပျးလဝ်ရ။
တမ်ရိုဟ်ပရိုၚ်အပ္ဍဲဒပ်ပၞာန်ဂှ်တှ်ေ ပ္ဍဲဒၞါဲစၟဳတ်ယဲတံဂှ် အ္စာဂဥုဲစၟဳတ်ယဲတံဂှ် ကံၚ်ဇြဳပၞာန် ဟွံကဵုဖျေံကဆံၚ်ဂဥုဲတုဲ ယဝ်ရဖျေံမ္ဂး ကေတ်အရေဝ်ဏောၚ်ဂးတုဲ စၞောန်ပ္ညုၚ်လဝ်တုဲ ကဵုလဝ်အခေါၚ်စၟဳတ်ယဲအံၚ်ဇၞး ကု ညးဒးဒုၚ်ယိုက်လျိုၚ်ပၞာန် သီုဖအိုတ်တံဂှ်ဝွံ သွက်ဍေံတံ ဂွံခိုဟ်စရဏောၚ်ဂှ် ပါ်ပါဲလဝ်ရ။
“ဖျေံကဆံၚ်ဂဥုဲဟီုဂှ် ဟွံထေက်ကြိုက်ကဵု ဒပ်ပၞာန်ပုဟ် အ္စာဂဥုဲမွဲမွဲတၠ ဟီုပ္တိတ်ဗက် အ္စာဂဥုဲဂှ် ဒးလုပ်အချုက်ရဏောၚ်။ အဓိကဂှ်တှ်ေ ကဵုမံၚ်အမိၚ်ဂွံတှ်ေတုဲ။ Plan ဗီုလဵုဂွံကၠောန် ချိုတ်တ်ပၠိုတ်တ်ရောဟီုဂှ် ဟွံမွဲပုဟ်။ ဍေံတံ (စကစ) တံရ ခိုဟ်စအာ။ မၞိဟ်မွဲဂကောံဓဝ်ရ သိုက်လောဲခိုဟ်စအာ မွဲအာယုက်၊ ကဵုသ္ၚိဇၞော်ဇၞော်သ္ၚိခိုဟ်ဟ်တံဂှ် သိုက်လောဲအာ မၞိဟ်မွဲဂကောံဓဝ်ရ ဂွံဒၞါဲတုဲ ဍေံတံရ ဂွံအခေါၚ်အရာတုဲတှ်ေ ဟွံဗဗွဲဓဝ်ပုဟ်လေဝ်” သာ်ဝွံ သ္ဂးရ။
မွဲလ္ပာ်ဂှ်ပၠန် ကံၚ်ဇြဳပၞာန်ဝွံ သွက်ဂွံယိုက်လျိုၚ်ပၞာန်တုဲ အကြာကွာန်၊ အရာပ်တံဂှ် ကော်ကၠုၚ်ညးဍုၚ်ကွာန်တံ အနိၚ်အပိုၚ်ကီု၊ မ္ၚးနူကဵုကံက်မာဲဂှ် မၞိဟ်အာယုက်ပေၚ်တုဲတံဂှ် အာတ်စရၚ်နူကွာန်အရာပ်တံတုဲ ဗက်ရပ်ဒက်ဒၟံၚ်ရ။
သ္အာၚ်နူဂှ်ပၠန် သွက်တန်ဗ္တောန်ကွတ်ပၞာန် လၟေၚ် (၂) ဂှ် ပ္ဍဲပွိုၚ်ဍုၚ်မဆေၚ်စပ်တံ ဒစးဒုၚ်တုဲ ဂွံကံက်စရၚ်ကောန်တန်ဗ္တောန်မာန် နကဵုခရိုၚ်မဆေၚ်စပ်ဂမၠိုၚ် သွက်ဂွံကောပ်ကာဲ ဗွဲမစှ်ေကဵုသၞောတ်ဂးတုဲ ကဵုဒၟံၚ်စၞောန်ပၟိၚ်သ္ၚိတ်တ်တံလေဝ် နွံဒၟံၚ်ရ။
အတိုၚ်လိက်ဒုၚ်စဳရေၚ် ပရေၚ်လ္ၚတ်ကေၚ်ကာဗၟာ ကေုာံ ပဋိပက္ခ BACS ဂှ်မ္ဂး ပ္ဍဲလၟေၚ် (၁) ယိုက်ဂၠေၚ်လျိုၚ်ပၞာန်ဂှ် ညးသၟတ်အလုံဍုၚ်မွဲ ၄၃၀၀ ပြၚ် ဒးဒုၚ်ပ္ကောံပလဝ်ကောန်ပၞာန်တုဲ ပလံၚ်ဗစိုပ်လဝ် ပ္ဍဲဘာတန်ဗ္တောန် ၁၅ ဘာရောၚ် ပ္ဍဲဂိတုဨပရဴ ၁၃ တုဲကၠုၚ်တေံ လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု− SAC Telegram