လ္ဂုၚ်၊ မေ ၂
ပ္ဍဲဒေသအာယှဒိုဟ်အဂၞဲ ဗွဲမဂၠိုၚ် ဗ္ၜတ်ဂမ္တဴသၠုၚ် အခိၚ်လအ်ကၠုၚ်ဒၟံၚ်ဂှ် ပ္ဍဲဍုၚ်ဗၟာလေဝ် ဟိုတ်နူဗ္ၜတ်ဂမ္တဴ သၠုၚ်တိုန်ဒၟံၚ်တုဲ မွဲတ္ၚဲမ္ဂး မၞိဟ်ၜိုတ် ၄၀ ချိုတ်ဒၟံၚ်ရောၚ် ထ္မံက်ထ္ၜးလဝ် ပ္ဍဲပရိုၚ်ဍုၚ်သ္အာၚ်တံရ။
ပ္ဍဲဒၞါဲထိၚ်ဒဝ်တိရစ္ဆာန်သတ်ဂြိုပ်အရိုၚ် ဍုၚ်ကာမ္ဗောဒဳယျာဂှ်လေဝ် တိရစ္ဆာန်ဂမၠိုၚ် ဒးဂဗဒၟံၚ်ကဵု အန္တရာယ်ဍာ်ဟွံမွဲရ။
ပ္ဍဲဍုၚ်ဝေဒ်နာမ် ဗ္ၜတ်ဂမ္တဴသၠုၚ်တိုန်ဒၟံၚ် မၞိဟ်အလုံဍုၚ်မွဲ စဵုကဵုဟွံတိတ်မ္ၚး ဒှ်အာလဝ်ဂှ် ပ္ဍဲဂိတုမေဏံလေဝ် ဗ္ၜတ်ဂမ္တဴ သၠုၚ်တိုန်အာ လ္တူနူကဵုဓမ္မတာဏီဏောၚ် ဒဒှ်ရစၟဳစလဝ်ဂှ် ညးစမ်ၜတ်ရာသဳဥတုတံ ဟီုလဝ်ရ။
ပ္ဍဲဍုၚ်ဗၟာ ပၞာန်အပ္ဍဲဍုၚ် ဒှ်ဒၟံၚ်တုဲ အပ္ဍဲသၞာံလောန်ကၠုၚ်တံဏံ မၞိဟ်ဗွဲမဂၠိုၚ်ဂၠေၚ် ဒးထောံလသာသ္ၚိဌာန် ဒးဂြိပ်ဒဴလဝ်ဂှ် ဟွံဂွံကၟဳဒဒၚ် ရုမ်မ်ဂပ်ပ်တုဲ နူစဂိတုမာတ်တေံရ မၞိဟ်ဒးချိုတ်တံ သာဂၠိုၚ်ကၠုၚ်တုဲ မၞိဟ်ချိုတ်အာ ဗွဲမဂၠိုၚ်ဝွံ ဆက်စပ်ဒၟံၚ်ကဵု ဗ္ၜတ်ဂမ္တဴသၠုၚ်တိုန်တံရ။
ပ္ဍဲဍုၚ်ဗၟာ လၟိဟ်မၞိဟ်ဒးချိုတ်အာ ဆက်စပ်ကဵုဗ္ၜတ်ဂမ္တဴတံဂှ်ဝွံ အပ္ဍဲဂိတုဨပရဴ မွဲဂိတုဓဝ်ဂှ် ၁၄၇၃ တၠ နွံလဝ်ရောၚ် ဂွံတီကေတ် အတိုၚ်တၚ်နၚ် နူဌာန်ပရိုၚ် Radio Free Asia (RFA) ပ္ကောံပ္ကေဝ်လဝ်တံရ။
ပ္ဍဲသ္ကုတ်လဒေါဝ်ကၟိန်ဍုၚ်ဗၟာ ဒေသမာန္တလေဝ်ဂှ် မၞိဟ်ဗ္ဒါဲ ၉၀၀ ချိုတ်အာဂှ်ဝွံ ဆက်စပ်ဒၟံၚ်ကဵု ဗ္ၜတ်ဂမ္တဴ သၠုၚ်တိုန်ကၠုၚ် ဗွဲမလောန်ရောၚ် ဂကောံပရဟိတ ယာန်ဖ္ဍိုက်မၞိဟ်ယဲကဵု ပရေၚ်ဟံၚ်ပြာ် M-Rescue Corps ဟီုရ။
တုဲကၠုၚ် ၜါပိတ္ၚဲတေံဂှ်လေဝ် ဟိုတ်နူဗ္ၜတ်ဂမ္တဴ သၠုၚ်တိုန်ဒၟံၚ် တၟာဂလိုၚ်ဂှ်ရ မၞိဟ်ဂမၠိုၚ် အဃောကွာ်ဒၟံၚ်ဂၠံၚ်၊ အဃောဍိုက်ဒၟံၚ်ကွဳလိုန်ဓာတ် ဒးချိုတ်အာလဝ်တုဲ လ္ၚဵုတံဂှ်တှ်ေ အခိၚ်ဂ္ဇအ်ဒၟံၚ် လ္တူကွဳစက်ဂှ် ဒးချိုတ်အာလဝ်ရောၚ် M-Rescue Corps ဟီုရ။
ပ္ဍဲလ္ဂုၚ်လေဝ် လၟိဟ်မၞိဟ်ဒးချိုတ်အာတံဝွံ အပ္ဍဲဂိတုဨပရဴဂှ် ဂၠိုၚ်နူကဵုဂိတုမာတ်တေံရ။
ညးမဒးချိုတ်အာ ပ္ဍဲရးမဂွဵု ဗွဲမဂၠိုၚ်ဂှ်တှ်ေ ညးအာယုက်ဇၞော်ဇၞော်တံ ဟွံသေၚ်မ္ဂး ညးယဲဗွက်ဇမၠိၚ်နွံ ညံၚ်ရဴယဲဆီၜေတ်၊ ယဲပဿဴဍာတ်တံဏောၚ်ဂှ် သၞာဲဒဴ Myanmar Rescue Team မွဲတၠ ဟီုရ။
ကောန်ၚာ်တံလေဝ် ဒးဒုၚ်စသိုၚ်ဒၟံၚ်ဘဲ ဂမ္တဴလုပ်တံဏောၚ်ဂှ် ညးပါဲဒဴဘဲပၞာန် နူဍုၚ်ကဝ်လေန် ရးသက်ကိုၚ်မွဲတၠ ဟီုရ။
ဌာနဝန်ဇၞော်ပရေၚ်ထတ်ယုက် ကံၚ်ဇြဳပၞာန် လလောၚ်ပ္တိတ်လဝ် လၟိဟ်မၞိဟ်ဒးချိုတ်အာ ဆက်စပ်ကဵု ဗ္ၜတ်ဂမ္တဴသၠုၚ်တံဂှ် ဒဵုကဵုအခိၚ်လၟုဟ် ဟွံဂွံဆဵုကေတ်ဏီရ။
Ref: RFA