ပဠဝ်၊ မေ ၄
အပ္ဍဲပေါဲဗ္တိုက်သီဗ္ဒိုပ် ကွာန်ထမေန်မသာ ပွိုၚ်ဍုၚ်ပဠဝ် ရးတၞၚ်သဳဂှ် ကောန်သ္ဂံၚ် ဒပ်စဵုဒၞါညးဍုၚ်ကွာန် PDF မွဲတၠ ပြဟ်လလုဲတုဲ ဒ္စိတ်တၠ ဇီုကပိုက်ကလိဂွံလဝ်ဝပ်ရောၚ် ဂွံတီကေတ် ဇရေၚ်ကရောၚ်ပၞာန် (နဂါးမဲ) ဂကောံဇြဟတ်ပၠန်ဂတးတံရ။
ပ္ဍဲဂိတုမေ ၂ အခိၚ်နူဂယး ၜိုတ် ၆ နာဍဳဂှ် နဒဒှ်ပေါဲဗ္တိုက်သီဗ္ဒိုပ်တုဲ ဒပ်ပံၚ်ကောံစဵုဒၞါညးဍုၚ်ကွာန်တံ လုပ်စိုပ်ဗ္တိုက်လဝ် ဒပ်ကံၚ်ဇြဳပၞာန် ဖျေံလဝ်ဒပ် ပ္ဍဲဘာဗ္တောန်လိက်ကွာန်ထမေန်မသာ နကဵုဇြဟတ်ဒပ် ၜိုတ် ၄၀ ဂှ်ရ။
ဟိုတ်နူပရေၚ်ဗ္တိုက်ဏံတုဲ ပေါဲဗ္တိုက်သ္ကာတ်မြဟ်လဝ် ဗ္ဒါဲကၠိုဟ်တ္ၚဲတုဲ ပရေၚ်ဇီုကပိုက်ချိုတ်ၜါလ္ပာ်တံလေဝ် ဂၠိုၚ်လဝ်ရောၚ် ညးဒုၚ်တာလျိုၚ်လလောၚ်ပရိုၚ် ကရောၚ်ပၞာန် (နဂါးမဲ) ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အပ္ဍဲပေါဲဗ္တိုက်သီဗ္ဒိုပ်ဂှ် ဒပ်ပံၚ်ကောံ ဂကောံဇြဟတ်ပၠန်ဂတးတံ လုပ်စိုပ်ဗ္တိုက်လဝ် စဵုကဵုအပ္ဍဲဗ္ဒိုပ်ကီုလေဝ် ဒၟါနူသရိုဟ်ဖျေံဗာန်ကာ ဟွံမာန်တုဲ ဒးဆုတ်ကလေၚ်လဝ်ရောၚ် သ္ဂးရ။
အပ္ဍဲပေါဲဗ္တိုက်ဂှ် ဒၟါနူဒးအာလွဟ်ဇၞော် ၄၀ မမ ကံၚ်ဇြဳပၞာန်တုဲ ပ္ဍဲကဵုကောန်သ္ဂံၚ် ကလိဂွံဝပ် ဒ္စိတ်တၠဂှ် ကောန်သ္ဂံၚ် ဒးဂွိၚ်မွဲတၠဂှ်ဝွံ ပ္ဍဲဂိတုမေ ၃ ဂှ် ပြဟ်လလုဲအာလဝ်ရောၚ် ဂွံတီကေတ်ရ။
ပ္ဍဲဂိတုမေ ၃ ဂှ်လေဝ် ဒပ်ကံၚ်ဇြဳပၞာန် ဖျေံလဝ်ဒပ် ပ္ဍဲကွာန်ထမေန်မသာဂှ်ကဵု ဒပ်ပံၚ်ကောံ ဂကောံဒပ်စဵုဒၞါညးဍုၚ်ကွာန်တံ က္တဵုဒှ်လဝ် ပရေၚ်ပန်ပှော်ညိညတုဲ ပရေၚ်ပၞာန်ၜါလ္ပာ် ဆက်ကြံၚ်မ္ၚိုဟ်ဒၟံၚ်ရောၚ် ဂွံတီကေတ်ရ။
တုဲကၠုၚ် ပ္ဍဲဂိတုဨပရဴ ၂၈ တေံဂှ်လေဝ် ဗ္ဒိုပ်ဒပ်ကံၚ်ဇြဳပၞာန် ဖျေံလဝ်ဒပ် လ္တူ (တိုတောၚ်) ကဵု ဗ္ဒိုပ်ဗၠာဲသၟိၚ်ဍုၚ်ပလ ပွိုၚ်ဍုၚ်ပဠဝ်ဂှ်လေဝ် ဟိုတ်နူဒးဒုၚ်ဗ္တိုက်ဂြာတ်ကဵုမခတိုဟ် နကဵုဒရုၚ်တုဲ ကောန်ဒပ်ကံၚ်ဇြဳပၞာန် ၄ တၠ ဇီုကပိုက်ကလိဂွံလဝ်ဝပ်ရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−CJ