ရေဝ်၊ မေ ၄
ဗ္ဒိုပ်ဒပ်ဍာ်ကံၚ်ဇြဳပၞာန် မၞုံတ္ကအ်သကုတ် ပွိုၚ်ဍုၚ်ရေဝ် တွဵုရးဍုၚ်မန် ဒးဒုၚ်ဗ္တိုက်တုဲ လ္ပာ်ကံၚ်ဇြဳပၞာန် ဗ္တိုက်ဂြာတ်ဒၟံၚ်မခတိုဟ် နကဵုက္ၜၚ်ကျာ ဟွံပိုတ်သ္ကုတ်ရောၚ် ဂွံတီကေတ် အတိုၚ်ဂလာန် ညးဒေသတံရ။
ဗ္ဒိုပ်ဒပ်ဍာ်ဏံဂှ် ပ္ဍဲဂိတုမေ ၂ အခိၚ်ဗ္တံ ၜိုတ် ၁၀ နာဍဳ ဒပ်ပံၚ်ကောံ ဂကောံဇြဟတ်ပၠန်ဂတးတံ လုပ်စိုပ်ဍိုက်ဗ္တိုက်လဝ်တုဲ စဵုကဵုဂိတုမေ ၃ ပယျာံနူဂယးဂှ် ပေါဲဗ္တိုက်ၜါလ္ပာ် သ္ကာတ်မြဟ်လဝ်ရ။
အပ္ဍဲပေါဲဗ္တိုက်ဏံ သၞာဲဒဴ လ္ပာ်ကံၚ်ဇြဳပၞာန်မွဲတၠ ချိုတ်အာလဝ်တုဲ ကောန်ဒပ်လ္ၚဵု ဒးဒုၚ်ရပ်လဝ်တုဲ လွဟ်လက်နက်မကမ်တံဂှ်လေဝ် ဒပ်ပံၚ်ကောံ ဂကောံဇြဟတ်ပၠန်ဂတးတံ သီဂွံလဝ်ရ။
ဗ္ဒိုပ်ဒပ်ဍာ်ကံၚ်ဇြဳပၞာန် မၞုံတ္ကအ်သကုတ် ဒးဒုၚ်ဍိုက်ဗ္တိုက်တုဲ လ္ပာ်ကံၚ်ဇြဳပၞာန် ထောံမခတိုဟ် နကဵုက္ၜၚ်ကျာကီု၊ နူကဵုက္ၜၚ်ပၞာန်ဒပ်ဍာ်ဂှ် ပန်ပှော်ဒၟံၚ်လွဟ်ဇၞော် ဟွံပိုတ်သ္ကုတ်တံ ကၠောန်ၜိုတ်ဒၟံၚ်ရ။
အတိုၚ်ဂလာန် ညးဒေသတံဂှ်မ္ဂး ဟိုတ်နူကံၚ်ဇြဳပၞာန် ဗ္တိုက်ဂြာတ်မခတိုဟ် နကဵုက္ၜၚ်ကျာတုဲ ပ္ဍဲတကအ်သကုတ်ဂှ် သ္ၚိဒၟံၚ်လ္ၚဵု လီုလာ်အာလဝ်တုဲ ပ္ဍဲဂကောံကွာန်သၞေဟ်ခြေၚ် လ္ပာ်သၞေဟ်ကာဂှ်လေဝ် သ္ၚိဒၟံၚ်ညးဒေသတံကဵု ကၠအ်ထၜိုတ်ဂမၠိုၚ် ပၟတ်တူလီုလာ်ဒၟံၚ်တံ နွံဒၟံၚ်ရောၚ် ဂွံတီကေတ်ရ။
ဟိုတ်နူပေါဲဗ္တိုက်တ္ကအ်သကုတ်တုဲ ညးဒေသတံဝွံ ဒးဂြိပ်ဒဴပါဲဒလေတ်ဒၟံၚ် ပ္ဍဲဘာလကျာ်တံကဵု ဒၞါဲဗၠးဘဲတံတုဲ ဒဵုကဵုအခိၚ်လၟုဟ် ဟွံဂံၚ်စဴဌာန်ဒၟံၚ်အိုတ်ရ။
တ္ကအ်သကုတ် ပေါဲဗ္တိုက်က္တဵုဒှ်လဝ်ဂှ် နူလၟိုၚ် ဒးပလံၚ်ဗစိုပ်ဒၟံၚ် အရီုဗၚ်ပၞာန် ဇြဟတ်ဒပ်ကံၚ်ဇြဳပၞာန် ၁၀၀ ပြၚ်တုဲ ဒပ်ဍာ်မောရဝတဳဂှ်လေဝ် ဗိုၚ်လဝ်တ္ကအ်ဂှ်တုဲ ဇၟာပ်ပ်ဂၠုၚ် အာကၠုၚ်ဒၟံၚ် အပ္ဍဲၜဳဂှ် ပန်ပှော်ဒၟံၚ်ကြာန်န်ရောၚ် ဂွံတီကေတ် ဇရေၚ်ညးဒေသတံရ။
လၟေၚ်ဒဒှ်ပေါဲဗ္တိုက် တ္ကအ်သကုတ် ဗွဲလစှ်ေဂှ် ခြာဟွံလအ် လလောၚ်ပ္တိတ်ကဵုဏောၚ် ကိုဝ်ယာန်နာၚ် သ္ကိုပ်ပြုပြေၚ်ပၞာန် ကရောၚ်ပၞာန်ဒဝ်ဏ ပါလုပ်လဝ် ပ္ဍဲပရေၚ်ပၞာန်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဒပ်ပံၚ်ကောံ ဂကောံဇြဟတ်ပၠန်ဂတးတံဝွံ တုဲကၠုၚ် ပ္ဍဲဂိတုဨပရဴတေံဂှ်လေဝ် လုပ်စိုပ်ဗ္တိုက်လဝ် တမ်ဒပ်ကံၚ်ဇြဳပၞာန် ခလရ ၂၉၉ ဖျေံသ္ဇိုၚ်ကွာန်ဒ္စိတ်မိုၚ် ပွိုၚ်ဍုၚ်ရေဝ်ဂှ်တုဲ အပ္ဍဲပေါဲဗ္တိုက်ဂှ် ၜါလ္ပာ်ဇီုကပိုက်ချိုတ်အာတံလေဝ် နွံလဝ်ရ။
ပရိုၚ်−သြၚ်လောန်တိုၚ်(မ်)
ဗီု−CJ