မတ်မလီု၊ မေ ၄
အခိၚ်ဂ္စါန်ကံက်ဒၟံၚ်စရၚ်ကောန်တန်ဗ္တောန် သွက်တန်ဗ္တောန်ကွတ်ပၞာန် လၟေၚ် (၂) ဂှ် ကၟာတ်ထောံလဝ် မၞိဟ်တြုံမၞုံအပ္ဍဲဍုၚ်တံ အခေါၚ်တိတ်ကၠောန်ကလောန်ဍုၚ်မ္ၚး ယာယဳရောၚ် ဌာနဝန်ဇၞော်သၟာကမၠောန် ကံၚ်ဇြဳပၞာန် ဟီုပ္တိတ်ကၠုၚ်ရ။
ဥူညောအ်ဝေန် ဝန်အပ္ဍဲလၟိုန် ဌာနဝန်ဇၞော်သၟာကမၠောန်ဂှ် စဵုကဵုဂိတုဨပရဴအိုတ်ဏံ စရၚ်မၞိဟ်တြုံ ပ္တိုန်လဝ်အခေါၚ်ကၠောန်ကလောန်ဍုၚ်မ္ၚး နကဵု MOU တံ ဟွံပါကီုလေဝ် ပပ္တံနူဂိတုမေ ၁ တုဲ မၞိဟ်တြုံ ပ္တိုန်လဝ်စရၚ်တံဂှ် ဟွံကဵုအခေါၚ်ရပုဟ်ဂှ် သ္ဂးရ။
မွဲလ္ပာ်ဂှ်ပၠန် ညးတိတ်အာကၠောန်ကမၠောန် နူကဵုအေဂျေန်ဇြဳကမၠောန်ကၟိတ်အလဵုအသဳ လၟိဟ်အောန်တံ ဟွံပါလုပ်ပုဟ်ဂှ် ညး သှ်လဝ်ကဵု ဌာန်ပရိုၚ် RFA ဗမာရ။
ညးတာလျိုၚ်မွဲတၠ နူအေဂျေန်ဇြဳဂၠါဲကမၠောန်ဍုၚ်သ္အာၚ် ဖျေံသ္ဇိုၚ်ဍုၚ်လ္ဂုၚ်မွဲဂှ် ကော်ကမၠောန်သွက်မၞိဟ်တြုံတံဂှ် ကၟာတ်ကီုလေဝ် ရဲကလိဂွံလဝ်အခေါၚ်တုဲတုဲ ကဵု COE တံဂှ်တှ်ေ အခေါၚ်တိတ်နွံတုဲ သၟေဟ်ဂှ်တှ်ေ စၞောန်ကၠုၚ်လဝ် တၟေၚ်ၚ်တၟဟ်ဟ်ဟွံမွဲပုဟ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
လ္ပာ်ရုၚ်ကံၚ်ဇြဳပၞာန်ဂှ်တှ်ေ တၚ်လလောၚ်ပၟိၚ် သောဲသောဲဗြောဲဗြောဲဂှ် ဟွံလလောၚ်ပ္တိတ်ကၠုၚ်ဏီတုဲ နူကဵုဝါပ်သာ် ဌာနဝန်ဇၞော်သၟာကမၠောန်ဂှ်လေဝ် လလောၚ်ပ္တိတ်လဝ်ပရိုၚ် မွဲမွဲသာ် ဟွံမွဲဏီရ။
စပ်ကဵုကၟာတ်လဒဵုထောံ မၞိဟ်တြုံ အခေါၚ်တိတ်ကၠောန်ကလောန်ဍုၚ်မ္ၚးတံ ယာယဳဂှ်တုဲ ညးတာလျိုၚ်မွဲတၠ နူအေဂျေန်ဇြဳဂၠါဲကမၠောန်ကၟိတ် ဖျေံသ္ဇိုၚ်အပ္ဍဲဍုၚ် ဟီုလဝ်ကဵု ဌာန်ပရိုၚ်သြၚ်လောန်တိုၚ်(မ်) သာ်ဏံရ။
“လၟုဟ်ဂှ်တှ်ေ ရဲအာကဵုအေဂျေန်ဇြဳတံဂှ် ဒေါအ်ထောံလဝ်မွဲလစုတ်တုဲ ရဲအာဝေၚ်သၟးတံ ဟွံပါပုဟ်ထေၚ်ရ။ ၜိုတ်အဲတီဂှ်တှ်ေလေဝ်။ ရဲအာဝေၚ် PV ကဵု ရဲအာ Visit သၟးတံဂှ်တှ်ေ ဂွံမံၚ်ဏီဏောၚ် ထေၚ်ရ” သာ်ဝွံ သ္ဂးရ။
ဆ္ဂး ဂတနူဏံ မၞိဟ်တြုံ ရပ်လဝ်ဂကူစၟတ်တဲကၠောံဍုၚ် သာ်လဵုဟွံဟီု ဟွံမွဲပၟိက်မွဲသာ် ဟွံကဵုအခေါၚ်တိတ်ဍုၚ်မ္ၚးတုဲ ကၟာတ်လဒဵုကၠုၚ်နွံကၠုၚ်မာန်ဂှ်ရ အကြာညးဍုၚ်ကွာန်တံလေဝ် ပရေၚ်ဒှ်ဓဝိၚ်တံ သၠုၚ်တိုန်ကၠုၚ်ဒၟံၚ်ရ။
စပ်ကဵုတၚ်သၟာန် ဌာန်ပရိုၚ်ဖျေံသ္ဇိုၚ်အပ္ဍဲဍုၚ် လ္ပာ်ကံၚ်ဇြဳပၞာန်တံဂှ်တုဲ ဌာနဝန်ဇၞော်သၟာကမၠောန်ဂှ်တှ်ေ ကေတ်အခိၚ်တုဲ သာတုဲသွက်ဂွံစၟဳတ်ကိစ္စအခေါၚ်တိတ်စ္ဍးတံမာန်ဂှ်ကဵု လ္ဂောံကဵုအကာဲအရာတၞဟ်သ္အာၚ်တံတုဲ ဒေါအ်ဇူလဝ်ယာယဳရောၚ် ထ္ၜးလဝ်ဟိုတ်ရ။
ဆ္ဂး ကာလဒေါအ်ဇူယာယဳဂှ်တှ်ေ ခုတ်လဝ်သာ်လဵု၊ အခိၚ်လဵုကလေၚ်ပံက်၊ ဟိုတ်နူအကာဲအရာတၞဟ်ဟ်သာ်လဵုတုဲ ကၟာတ်လဝ်ဟီုဂှ် လလောၚ်ပ္တိတ်လဝ် ဟွံမွဲရ။
ညးလ္ၚတ်သ္ၚဳဂၠိပ်ပရေၚ်ဍုၚ်ကွာန် ဥူတာန်သဵုနာၚ်ဂှ် ဒၟါနူသၞောဝ်ယိုက်ဂၠေၚ်လျိုၚ်ပၞာန် ကံၚ်ဇြဳပၞာန်တုဲ ပ္ဍဲအရာပ္ကောံကောန်တန်ဗ္တောန် ဒးဂဗဒၟံၚ် အကြေပ်အဂြတ်နာနာဂှ် ကၟာတ်လဒဵုထောံ အခေါၚ်တိတ်ဍုၚ်သ္အာၚ် သာ်ဏံရောၚ် သ္ၚဳဂၠိပ်လဝ်ရ။
“ကံၚ်ဇြဳပၞာန် စၞောန်ပျးသၞောဝ်ယိုက်ဂၠေၚ်လျိုၚ်ပၞာန်တုဲ ပ္ကောံကောန်ပၞာန်ဂှ်ဝွံ ပံက်တန်ဗ္တောန်အလန်ပထမတုဲ လၟုဟ်ဂွံပံက်တန်ဗ္တောန်အလန်ဒုတိယဂှ် ပ္ကောံမၞိဟ်ဟွံဂွံ ဒးဂဗဒၟံၚ်အကြေပ်အဂြတ်နာနာသာ်ရ။ ဟိုတ်ဂှ်ရ ကၟာတ်လဒဵုထောံ ရဲအာတ်ပ္တိုန် ဂွံတိတ်ဍုၚ်မ္ၚးတံဂှ်ရ” သာ်ဝွံ သ္ဂးရ။
ထိၚ်ဒက်ထောံ အခေါၚ်မၞိဟ်တြုံတိတ်ဍုၚ်သ္အာၚ် သာ်ဏံဂှ်ဝွံ တုပ်တဴညံၚ်ရဴ ဟီုပ္တိတ်ဒုၚ်ဝန် ဒဒှ်ရသၞောဝ်ယိုက်ဂၠေၚ်လျိုၚ်ပၞာန် ဟွံအံၚ်ဇၞးဂှ်ကီု၊ နူဂၠံၚ်ဟွံလုပ်သၞောဝ်တံ တိတ်ကၠုၚ်ဍုၚ်သ္အာၚ် ဂၠိုၚ်ကၠုၚ်မာန်ဏောၚ်ဂှ်လေဝ် ဥူတာန်သဵုနာၚ် ထံက်ထ္ၜးလဝ်ရ။
ညးသၟတ် ပလေဝ်ပလေတ်ဒၟံၚ် သ္ဂောံအာကၠောန်ကလောန် ပ္ဍဲဍုၚ်ဂျပါန်မွဲတၠဂှ် စပ်ကဵုကၟာတ်လဒဵုထောံ အခေါၚ်ကၠောန်ကလောန်ဍုၚ်သ္အာၚ်ဂှ်တုဲ နကဵုနဲကဲနာနာသာ် တိတ်ကၠုၚ် ဇရေၚ်ဍုၚ် အာကဵုဂၠံၚ်ဟွံလုပ်သၞောဝ်တံဂွံအိုတ်ဏောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“မၞိဟ်တြုံဗွဲမဂၠိုၚ်ဂှ်တှ်ေ အကာဲအရာဟွံခိုဟ်ပုဟ်။ ဗွဲမဂၠိုၚ်ဂှ် ပလေဝ်ဒၟံၚ် သွက်ဂွံတိတ်ဏောၚ်လေဝ်။ အခိၚ်ပလေဝ်ဒၟံၚ် သွက်ဂွံတိတ် ဍုၚ်တၞဟ်ဟ်တံဂှ် ကၟာတ်ထောံသာ်ဏံဟီုတှ်ေ အောန်အိုတ် ၜိုတ်ဍုၚ်သေံရ ပိုယ်တံ ရုဲဂွံဏောၚ်။ သေံ ကဵု မလေဝ်ယှာ အာကဵုဂၠံၚ်သၟဝ်ဂွံ ၜါဏံဂှ်ရ ဗီုဂွံဂှ် တိတ်ညးသ္ကအ်ဏောၚ်” သာ်ဝွံ သ္ဂးရ။
ပ္ဍဲဍုၚ်ဗၟာ ကြဴနူဒပ်ပၞာန်သီအဝဵုတုဲ သၟတ်ဗြဴ၊ သၟတ်တြုံဂမၠိုၚ်ဝွံ နကဵုဂၠံၚ်ဍာန်နာနာ အာစိုပ်ဒၟံၚ် ဍုၚ်သေံ၊ ဍုၚ်မလေဝ်ယှာ၊ သေန်ကာပေါဝ်၊ ကိုဝ်ရဳယျာ၊ ဂျပါန်၊ အိုဝ်မာန်တံ နကဵုလၟိဟ်ကဵုကိုဋ်ရ။
ဟိုတ်ဂှ်ရ ကံၚ်ဇြဳပၞာန် ကၟာတ်လဒဵုထောံ မၞိဟ်တြုံ ပလေဝ်ပလေတ်ဒၟံၚ် သွက်အခေါၚ်ကၠောန်ကလောန်ဍုၚ်မ္ၚး ဗွဲမလုပ်သၞောဝ်တံဂှ်ဝွံ ပရေၚ်ဆုဲပြံၚ်ဟွံလုပ်သၞောဝ်တံ သာဂၠိုၚ်ကၠုၚ်မာန်ရောၚ် ဥက္ကဌ ဂအုပ်ဂကောံသမဂ္ဂသၟာကမၠောန်အလေန်တေတ် ဍုၚ်ဗၟာ NLF Myanmar ဒဝ်မိုဝ်စန္ဒာမျေတ် ဟီုရ။
“ချိုတ်ပၠိုတ်ဂှ်တှ်ေ ပရေၚ်ဆုဲပြံၚ် ဟွံလုပ်သၞောဝ်တံ သာတုဲဂၠိုၚ်ကၠုၚ်မာန်ဏောၚ်တုဲ လိက်တၞးဟွံမွဲမွဲသာ် တိတ်ကၠောန်ကမၠောန်ဍုၚ်သ္အာၚ်တံ သၟာကမၠောန်တံ ပရေၚ်သွံရာန်မၞိဟ်တံ သာတုဲ သၠုၚ်တိုန်ကၠုၚ်မာန်တုဲ ဟိုတ်နူသၞောဝ် ဍုၚ်မွဲလ္ပာ်တေံတုဲ ပရေၚ်ရပ်ဒက်တံလေဝ် နွံကၠုၚ် ဗွဲမဂၠိုၚ်မာန်ဏောၚ်” သာ်ဝွံ သ္ဂးရ။
သၞာံတုဲကၠုၚ်တေံ ကြဴနူပရေၚ်ပၞာန် ၁၀၂၇ ဂကောံမဟာမိတ်ကောဒေံပိဂကောံ ဝေၚ်လဝ် ပ္ဍဲရးသေံသ္ကုတ်သၟဝ်ကျာဂှ်တုဲ နကဵုပၞာန်ထ္ပပက် အလုံဍုၚ်မွဲ ကံၚ်ဇြဳပၞာန် ဇြဟတ်ဍိုန်လျစှ်ေကၠုၚ်ဂှ် ပ္ဍဲဂိတုဖေဖဝ်ဝါရဳ ၁၀ သၞာံဏံဂှ် ပၠောပ်လဝ်လမျီု သၞောဝ်ယိုက်ဂၠေၚ်လျိုၚ်ပၞာန် ဇၟာပ်ကောန်ဍုၚ် ဒးလုပ်ပၞာန်တံဂှ်ရ။
ကြဴနူဂှ်တုဲ ညးသၟတ်အဝဲဍောတ်သွတ် မၞုံအပ္ဍဲဍုၚ် ဗွဲမဂၠိုၚ်ဝွံ စိုပ်အာ ဇရေၚ်ဂကောံဒပ်ပၠန်ဂတးရပ်လွဟ်တံအိုတ်တုဲ မွဲလ္ပာ်ဂှ်ပၠန်လေဝ် ဂ္စါန်တိတ်ကၠုၚ် ဍုၚ်သ္အာၚ် နကဵုလၟိဟ်ဗွဲမဂၠိုၚ်ဂၠေၚ်ရ။
ပရိုၚ်−သြၚ်လောန်တိုၚ်(မ်)
ဗီု−Social Media