တၞၚ်သဳ၊ မေ ၃
အကြာပ်ဒပ်ၜါတၠ ကဆံၚ်တခဳ နူဒပ်ကံၚ်ဇြဳပၞာန် ဖျေံသ္ဇိုၚ်ကွာန် (အောက်ကင်း) ပွိုၚ်ဍုၚ်တၞၚ်သဳ ရးတၞၚ်သဳဂှ်ဝွံ လုပ်စိုပ်ဖျေံကၠုၚ်လွဟ် သီုကဵုလွဟ်လက်နက်မကမ်ဂှ် ဂွံတီကေတ် ဇရေၚ်ကရောၚ်ပၞာန်ကောဒေံသ္ကုတ်သၠုၚ်ကျာတံရ။
နူတမ်ဒပ်ကံၚ်ဇြဳပၞာန် ခမရ ၅၅၇ ဖျေံသ္ဇိုၚ်ကွာန် (အောက်ကၚ်း) ဂှ် ကိုဝ်ဝ်ထိုဲ ကေုာံ မျာတ်သဵုဥူ ကဆံၚ်တဆဳ အကြာပ်ဒပ် ၜါတၠဝွံ တုဲကၠုၚ် ပ္ဍဲဂိတုဨပရဴ ၂၈ တေံ ဖျေံကၠုၚ်လွဟ် ဇရေၚ်ကရောၚ်ပၞာန်ကောဒေံသ္ကုတ်သၠုၚ်ကျာရ။
ကိုဝ်သာၚ်ညဳ ညးဒုၚ်တာလျိုၚ် ကရောၚ်ပၞာန်ကောဒေံသ္ကုတ်သၠုၚ်ကျာဂှ် အကြာပ်ဒပ် ဖျေံကၠုၚ်လွဟ်ၜါတၠဂှ်ဝွံ နူစဒပ်ပၞာန်သီအဝဵုတေံ သွက်ဂွံဖျေံလွဟ် စဳဇန်လဝ်ကီုလေဝ် ဟိုတ်နူအကာဲအရာဟွံကဵုတုဲ လၟုဟ်မှ ဂွံဖျေံလွဟ်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အကြာပ်ဒပ်ကံၚ်ဇြဳပၞာန် ၜါတၠဝွံ လုပ်စိုပ်ဖျေံကၠုၚ်လွဟ် သီုကဵုသေနာတ် MA3 မွဲဇကိုအ်၊ မကမ် ၅.၅၆ ဂှ် ၂၆၀ ဒကောၚ် ကေုာံ ဖျေဲလွဟ် ၆ ဂှ်ရ ပအပ်ပြာပ်အာကဵု သြန်ပ္တိုန်စရာဲ မထေက်ကြိုက်တံဏောၚ် သ္ဂးရ။
အကြာပ်ဒပ်ဇၞော် ဖျေံကၠုၚ်လွဟ်ၜါတၠဂှ် ပ္ဍဲတိဍာ်ထိၚ်ဒက် ဂကောံဇြဟတ်ပၠန်ဂတးတံဂှ် ကဵုလဝ်အခေါၚ်အာကၠုၚ် ဗၠးဗၠးၜးၜးတုဲ မၚ်မွဲရံၚ်စံၚ်ကဵုလဝ် ခိုဟ်ဟ်ရောၚ် ဂွံတီကေတ်ရ။
တုဲကၠုၚ် ပ္ဍဲဂိတုဨပရဴ ၁၄ တေံဂှ်လေဝ် ကောန်ဒပ်ကံၚ်ဇြဳပၞာန် ၃ တၠ ဒးဒၟံၚ်တာလျိုၚ် နူဗ္ဒိုပ်ဗၠာဲသၟိၚ်ဝေန်ဝ ပွိုၚ်ဍုၚ်တယိတ်ချံၚ်ဂှ်ဝွံ လုပ်စိုပ်ဖျေံလွဟ် သီုကဵုလွဟ်လက်နက်မကမ် ဇရေၚ်ဒပ်ဒမၠုက် (ပုတီးတစ်လုံး) ရ။
ပရိုၚ်−သြၚ်လောန်တိုၚ်(မ်)
ဗီု−SBA