ကျာ်မြဟ်၊ မေ ၅
ပ္ဍဲဂိတုမေ ၄ အခိၚ်နူဂယး ၜိုတ် ၈ နာဍဳ ပေါဲဗ္တိုက်ဟွံမွဲမွဲသာ် ဒပ်ကံၚ်ဇြဳပၞာန် စကာပၞာန်ကျာတုဲ ဗ္တိုက်လဝ် ကွာန်ကအ်ဒုန်၊ ကွာန်ကအ်ပၞဟ် ပွိုၚ်ဍုၚ်ကျာ်မြဟ် တွဵုရးဍုၚ်မန်ဂှ်ရောၚ် ဂွံတီကေတ် ဇရေၚ်ညးဒေသတံရ။
က္ၜၚ်ကျာသၞေၚ်ဝဲပၞာန် တိုန်ကၠုၚ် နူကဵုဌာန်ဂအုပ်ပၞာန်ဒိုဟ်အဂၞဲ ဖျေံသ္ဇိုၚ်ဍုၚ်မတ်မလီုဂှ်ဝွံ ဒၟါနူပရိုၚ် ဒပ်ပၠန်ဂတးရပ်လွဟ်တံ လုပ်စိုပ်ချဳဒရာၚ်ဒၟံၚ် ပ္ဍဲကွာန်ကအ်ပၞဟ်ကဵု ကွာန်ကအ်ဒုန်ဂှ်တုဲ ကၠုၚ်စိုပ်ဗ္တိုက်လဝ် နကဵုသေနာတ်ပၞာန်ရ။
ဟိုတ်နူပရေၚ်ဗ္တိုက် ကံၚ်ဇြဳပၞာန် ရပ်စပ်ပၞာန်ကျာဂှ်တုဲ သ္ၚိဒၟံၚ်ညးဒေသ ဟွံအောန်နူကဵု ၃ မ ဇီုကပိုက်လီုလာ်အာလဝ်တုဲ ညးဍုၚ်ကွာန်ကောန်အရာပ်ဂမၠိုၚ် ဇီုကပိုက်ကလိဂွံဝပ်တံ ဟွံမွဲပုဟ်ဂှ် ညးဒေသတံ ဟီုရ။
ပေါဲဗ္တိုက်ဟွံမွဲမွဲသာ် ဟိုတ်နူကံၚ်ဇြဳပၞာန် ဗ္တိုက်ကဵုပၞာန်ကျာတုဲ အကြာညးဍုၚ်ကွာန်ဒေသတံဂှ် ပရေၚ်ဒှ်ဓဝိၚ်ဂွိၚ်ဂွါဲတံ သၠုၚ်တိုန်ဒၟံၚ်တုဲ ပၟတ်ပၞာန် ထပ်ကၠောံထၞာန်ကၠုၚ် ဒဵုကဵုဒေသဒဵုသာဲဂှ် ဂွိၚ်ဒၟံၚ်အိုတ်ရောၚ် သ္ဂးရ။
စပ်ကဵုပရေၚ်ဗ္တိုက်တရဴကျာ ကံၚ်ဇြဳပၞာန်ဂှ်တုဲ နူကဵုသြၚ်လောန်တိုၚ်(မ်) ပလံၚ်လိက်သၟာန်လဝ် ဇရေၚ်ဗော်ဍုၚ်မန်တၟိ ဗ္တိုက်သရိုဟ်တၠအဝဵုပၞာန် NMSP AD ဂှ်ကီုလေဝ် ဒဵုကဵုအခိၚ်လၟုဟ် ကလေၚ်ကၠုၚ်ပရိုၚ် ဟွံမွဲဏီရ။
တုဲကၠုၚ် ပ္ဍဲဂိတုမာတ် ၂၅ တေံ ဒပ်ကံၚ်ဇြဳပၞာန် ဒးဒုၚ်သီလဝ် ဗ္ဒိုပ်ဗၠာဲသၟိၚ်ကအ်ဗိန် ပွိုၚ်ဍုၚ်ကအ်ကြိက် တွဵုရးဍုၚ်မန်ဂှ်ဝွံ မွဲဒမြိပ်ဒေသၜဳဂြာၚ်ဂှ် ထ္ပက်ကရောၚ်ပၞာန် နကဵုဇြဟတ်လၟိဟ်ဗွဲမဂၠိုၚ်ဂၠေၚ်တုဲ လုပ်စိုပ်ဖျေံလဝ်ဒပ်ရ။
ဒပ်ကံၚ်ဇြဳပၞာန် လုပ်စိုပ်ဖျေံလဝ်ဒပ် အပ္ဍဲဒေသၜဳဂြာၚ်ဂှ်ဝွံ လုပ်စိုပ်ကၠတ်ဂၠံက်လဝ် ပ္ဍဲသ္ၚိညးဒေသတံ ၁၀၀၀ ပြၚ် နူကဵုကွာန်မၞုံပ္ဍဲပွိုၚ်ဍုၚ်ကျာ်မြဟ်တံ ၁၀ ကွာန်ဟွံက မပ္တံကဵုကွာန်ဓမ္မသ၊ ကွာန်ကြေဝ်ဏာ၊ ကွာန်သၚ်ကၠံ၊ ကအ်ဆုကၠတံ မဒှ်တုဲ ကၠတ်ကေတ်ဏာလဝ် သီုကွဳလိုန်ဓာတ် သီုကပေါတ်ၚုဟ်မးမၞုံတံရောၚ်ဂှ် ဂွံတီကေတ် အတိုၚ်ဂလာန်ညးဒေသတံရ။
အပ္ဍဲပဋိပက္ခပရေၚ်ပၞာန် ၜဳဂြာၚ်ဂှ် ဟိုတ်နူပရေၚ်ဗ္တိုက်ကံၚ်ဇြဳပၞာန် နကဵုပၞာန်တိုက်၊ ပၞာန်ဍာ်၊ ပၞာန်ကျာတံဂှ်တုဲ သ္ၚိဒၟံၚ်ညးဒေသ နူကဵုကွာန်ဓမ္မသ ၜိုတ် ၄၀၀ ပၟတ်တူလီုလာ်အာလဝ်တုဲ ဟိုတ်နူကောန်ဒပ်ကံၚ်ဇြဳပၞာန်တံ ပန်ပှော်ပြိုက်ဂစိုတ်လဝ်တုဲ ကောန်အရာပ် ဟွံအောန်နူကဵု ၃၀ ချိုတ်အာလဝ်ရ။
အတိုၚ်တၚ်နၚ် ကံၚ်ဇြဳဖေဝ်ဒရာဍုၚ်မန် MSFC ဂှ်မ္ဂး ညးဍုၚ်ကွာန်ကောန်အရာပ် နူဒေသၜဳဂြာၚ် ၜိုတ်ပွဳပွူမွဲကိုဋ် ထောံလသာသ္ၚိဌာန် ဒးဂြိပ်ဒဴပါဲဒလေတ်ဒၟံၚ်တုဲ နွံပၟိက်ဒၟံၚ်ကဵု အရီုဗၚ်ပရေၚ်ဗ္စာရဏာမၞိဟ်တံရောၚ် ဂွံတီကေတ်ရ။
ညးဒေသပါဲဒဴဘဲပၞာန် ဒးထောံလသာသ္ၚိဌာန် ဒးဂြိပ်ဒဴပါဲဒလေတ်ဒၟံၚ်တံဂှ် သွက်ဂွံစဴဌာန်ဒၟံၚ် လ္ပာ်ကံၚ်ဇြဳပၞာန် ကဵုဒၟံၚ်ဇြဟတ်ဂရိုဟ်တံ နွံဒၟံၚ်တုဲ ဗွဲမဂၠိုၚ်ဂှ်တှ်ေ ဟွံဂံၚ်စဴဌာန်ဒၟံၚ်အိုတ်ဏီပုဟ်ဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−NMSP-AD