မတ်မလီု၊ မေ ၅
ပ္ဍဲတွဵုရးဍုၚ်မန် ညးသၟတ်ၜိုတ် ၅၀ တၠ ကံၚ်ဇြဳပၞာန် ပ္ကောံလဝ်နဒဒှ်ကောန်ပၞာန် ဗွဲအနိၚ်အပိုၚ်ဂှ် ထပ်ပလံၚ်ဏာလဝ် ဒၞါဲဍုၚ်ဒပ်ဇြပ်ဗု ဒၞါဲကဵုကွတ်ပၞာန်တံဂှ်ရောၚ် ဂွံတီကေတ် ဇရေၚ်ညးမစုက်လုက်ကဵု ကံၚ်ဇြဳပၞာန်တံရ။
ညးသၟတ် ဒးဒုၚ်ပကောံလဝ် နဒဒှ်ကောန်ပၞာန် ပ္ဍဲကဵုဘာပရေၚ်ပညာ (ပၞာန်တိုက်) စၟတ် (၆) မၞုံဗ္ဒါဲဌာန်ဂအုပ်ပၞာန်ရးအဂၞဲ ဍုၚ်မတ်မလီုဂှ် ပ္ဍဲဂိတုမေ ၃ တေံ ထပ်ပလံၚ်ဏာလဝ် ဘာတန်ဗ္တောန်ကဆံၚ်သၠုၚ်ဒပ်ပၞာန် တကက−၄ ဖျေံသ္ဇိုၚ်ကွာန်ဝါကလိ ပွိုၚ်ဍုၚ်ဇြပ်ဗုရ။
အတိုၚ်ဂလာန် ညးမစုက်လုက်ကဵု ကံၚ်ဇြဳပၞာန်တံ ဟီုလဝ်ဂှ်မ္ဂး ပ္ဍဲတွဵုရးဍုၚ်မန် သွက်ဘာကွတ်ဗ္တောန်ပၞာန် ပံက်အာ အလန်ဒုတိယဂှ် ၜိုတ်လၟိဟ်မၞိဟ် စၟတ်လဝ်ဂှ် ပ္ကောံဟွံဂွံတုဲ ၜိုတ်ဂွံဂှ် ပလံၚ်လဝ်ကၠာရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ညးသၟတ် ပလံၚ်ဏာလဝ် ဇရေၚ်ဍုၚ်ဒပ်ဇြပ်ဗုတံဂှ် ဂကောံဥူအံၚ်ကျဳတုၚ် သ္ကိုပ်ဝန်ဇၞော် တွဵုရးဍုၚ်မန် ကံၚ်ဇြဳပၞာန်ခါန်ကၞက်ပ္တိုန်လဝ်တံ သ္ကိုပ်သ္ကဂှ် အာစိုပ်ဆက်လဝ်မိတ်တုဲ ပအပ်ကဵုလဝ် သြန်ထံက်ပၚ်တံရောၚ် ဂွံတီကေတ် အတိုၚ်တၚ်လလောၚ်တြး ကံၚ်ဇြဳပၞာန်ရ။
အခိၚ်လၟုဟ်လေဝ် ကံၚ်ဇြဳပၞာန်ဝွံ သွက်ဂွံယိုက်ဂၠေၚ်လျိုၚ်ပၞာန်ဂှ် အာတ်ကၠုၚ်စရၚ်ညးသၟတ် နူသ္ကိုပ်အုပ်ဓုပ်ကွာန်အရာပ်တံဂှ်တုဲ ကောန်ဒပ်ကံၚ်ဇြဳပၞာန်တံဂှ်တှ်ေ ရပ်ဒက်အတေၚ်အဓမ္မတုဲ ပကောံကၠုၚ်ကောန်ပၞာန်တံ နွံကၠုၚ်ဂှ် ညးဒေသတံ ဟီုရ။
အတိုၚ်လိက်ဒုၚ်စဳရေၚ် ဂကောံလ္ၚတ်ပဋိပက္ခ ကေုာံ ကေၚ်ကာဗၟာ BACS ဂှ်မ္ဂး ပ္ဍဲဘာကွတ်ဗ္တောန်ပၞာန် လၟေၚ် (၁) ဂှ် နူအလုံဍုၚ်မွဲ ကံၚ်ဇြဳပၞာန် ပ္ကောံလဝ်ညးသၟတ်တံ နဒဒှ်ကောန်ပၞာန်ဂှ် ၄၃၀၀ ပြၚ်တုဲ ပလံၚ်ဏာလဝ် ပ္ဍဲဘာတန်ဗ္တောန် ၁၅ ဘာရောၚ် တုဲကၠုၚ် ပ္ဍဲဂိတုဨပရဴ ၁၃ တုဲကၠုၚ်တေံ လလောၚ်ပ္တိတ်လဝ်ရ။
ပ္ဍဲကဵုဏံ ပ္ဍဲဘာတန်ဗ္တောန်ကဆံၚ်သၠုၚ်ဒပ်ပၞာန် တကက−၄ ဖျေံသ္ဇိုၚ်ကွာန်ဝါကလိ ပွိုၚ်ဍုၚ်ဇြပ်ဗု တွဵုရးဍုၚ်မန်ဂှ် ကောန်တန်ဗ္တောန် ဒးဒုၚ်ပကောံလဝ် နဒဒှ်ကောန်ပၞာန် ၂၀၀ ပြၚ် နွံဒၟံၚ်ရောၚ်ဂှ်လေဝ် ဂွံတီကေတ် နူကဵုတၚ်နၚ် BACS ရ။
ပရိုၚ်−သြၚ်လောန်တိုၚ်(မ်)
ဗီု−SAC Telegram