မတ်မလီု၊ မေ ၄
ကြဴနူဒပ်ပၞာန်သီအဝဵုတုဲ ပ္ဍဲထံၚ်စာတ်ကံၚ်ဇြဳပၞာန်တံဂှ် ကောန်ထံၚ် LGBTQ+ ဒးဒၟံၚ်ထံၚ်တံဝွံ ကြပ်ဇၟာပ်ဂိတု ဒးဂဗဒၟံၚ်ကဵု ပရေၚ်ပ္တိတ်ပရဲ စပ်ကဵုလိၚ်တံရောၚ် ဂွံတီကေတ် ဇရေၚ်ဇာဇၞိက်ကောန်ထံၚ်ပရေၚ်ဍုၚ်ကွာန် PPNM ရ။
LGBTQ+ ဒးဒုၚ်ရပ်ထိၚ်လဝ် ဟွံဗဗွဲကဵုသၞောဝ် ပ္ဍဲထံၚ်စာတ်တံဂှ် နွံဒၟံၚ် ဗွဲမဂၠိုၚ်ဂၠေၚ်တုဲ ဒးဒုၚ်ဍဵုဍိုက်ဒၟံၚ် ကုသၟိၚ်တၠအဝဵုထံၚ်တံ ညံၚ်ရဴကောန်ထံၚ်ပရေၚ်ဍုၚ်ကွာန်တံကီုတုဲ သီုကဵုဒးဆေၚ်ဒၟံၚ်မုက် ကုကောန်ထံၚ်သၞာံလအ်လအ်တံ ပ္တိတ်ပရဲစပ်ကဵုလိၚ်တံဂှ်ရ။
တုဲကၠုၚ် ပ္ဍဲသၞာံ ၂၀၂၁ ဂိတုသေပ်တေမ်ဗာဂှ် ဒးဒုၚ်ရပ်လဝ် ကုကံၚ်ဇြဳပၞာန် ဟွံဗဗွဲကဵုသၞောဝ်တုဲ ကောန်ထံၚ်ပရေၚ်ဍုၚ်ကွာန် LGBTQ+ အာယုက် ၂၄ သၞာံ မၞုံယၟု ယျေဝ်ယျေတ်ကိုဝ် (က) ယျေဝ်ယျေဝ် ဒးဒုၚ်ဖျေံလဝ်အမိၚ် ဒဏ်ထံၚ် ၉၆ သၞာံ နကဵုၝောံပိုဒ်နာနာဂှ် ပြံၚ်လဝ် နူထံၚ်အၚ်စိၚ်တုဲ ထိၚ်ဒဝ်လဝ် ပ္ဍဲတိုက် (က) ထံၚ်သာယာဝတဳ ဗွဲတၞဟ်ခြာရ။
ကြဴနူဂှ်တုဲ ကောန်ထံၚ် မၞုံယၟု (ပြူးကြီး) မံၚ်မွဲဗ္ဒမ်တုပ်ပ် ဒးဒုၚ်ဖျေံလဝ်ဒဏ်ဂစိုတ် ပ္ဍဲဂိတုဖေဖဝ်ဝါရဳ သတ္တာဟပထမ သၞာံဏံဂှ် သ္ပလဝ်အဓမ္မ ကုယျေဝ်ယျေတ်ကိုဝ် (ခ) ယျေဝ်ဝ်တုဲ ဒၟါနူဟွံဒုၚ်တဲတုဲ ၜုၚ်တက်လဝ်က္ဍိုပ် ယျေဝ်ဝ် နကဵုမကြေဟ်ဂှ်ရ ဒးတိုန်လွဳလဝ် ပ္ဍဲရုၚ်ဂဥုဲထံၚ်ဂှ် PPNM လလောၚ်ပ္တိတ်လဝ်ရ။
ကိုဝ်တိုက်ထောန်ဥူ ကမ္မတဳဇာဇၞိက်ပရေၚ်ဍုၚ်ကွာန် အလုံဍုၚ်ဗၟာဂှ် အခိၚ်လၟုဟ် ကောန်ထံၚ်ပရေၚ်ဍုၚ်ကွာန်တံဝွံ ဒးဒုၚ်သ္ပဂရု အောန်သၟးဟွံက လ္တူကောန်ထံၚ် LGBTQ+ တံဂှ်လေဝ် ညံၚ်အရာမပ္တိတ်ပရဲ စပ်ကဵုလိၚ်တံ ဂွံဗၠးၜးမာန် သွက်ဂွံဘိုၚ်အာတ်မိက်ကဵုဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
မွဲလ္ပာ်ဂှ်ပၠန် ဌာနဝန်ဇၞော်ကာအပ္ဍဲဍုၚ် ကံၚ်ဇြဳပၞာန်ဂှ် သွက်ဂွံအုပ်ဓုပ် ကောန်ထံၚ်ပရေၚ်ဍုၚ်ကွာန်တံတုဲ ခါန်ကၞက်ပ္တိုန်ထောံ ကောန်ထံၚ်ရာဇဝတ်တၞဟ်ဟ်တံဂှ် ပ္တဝ်ကၠုၚ်က္ဍိုပ် ကုကောန်ထံၚ် ဍောတ်တ်သွတ်တ်တံကဵု LGBTQ+ တံတုဲ ပ္တိတ်ကၠုၚ်ပရဲ စပ်ကဵုလိၚ်တံကဵု ပ္တိတ်ကၠုၚ်ဇြဟတ် သွက်ဂွံသ္ပအဓမ္မတံအိုတ်ရောၚ် ညးဆက်ဟီုရ။
သ္အာၚ်နူဂှ်ပၠန် နူသၟိၚ်တၠအဝဵုထံၚ် ကံၚ်ဇြဳပၞာန်တံ ကေတ်အရေဝ်ကဵုဒုဟ် ကုကောန်ထံၚ်ကလိလောန်ဒုဟ်တံ ဗွဲမစစိုပ်တရဴဟွံမွဲဂှ်ရ တုပ်တဴညံၚ်ရဴ ကဵုဒၟံၚ်ဇြဟတ် ကုသၟိၚ်တၠအဝဵုထံၚ်တံကဵု ညးကလိလောန်ဒုဟ်ဒဏ်တံရောၚ် သ္ဂးရ။
အခိၚ်လၟုဟ် ထံၚ်ကံၚ်ဇြဳပၞာန်ဝွံ ဒှ်ဒၟံၚ်ညံၚ်ရဴဗလးမုက်ပၞာန်တုဲ ကောန်ထံၚ်ပရေၚ်ဍုၚ်ကွာန်တံဝွံ ဒးအေၚ်ဒုၚ် ဒးဆေၚ်ဒၟံၚ်မုက် ကုပရေၚ်ဍဵုဍိုက်နာနာ နူသၟိၚ်တၠအဝဵုထံၚ်တံသၟးဟွံက သီုကဵုဒးဆေၚ်ဒၟံၚ်မုက် ကုပရေၚ်ဖံက်ပ္ကဝ်အခေါၚ်အရာမၞိဟ်တံရ။
တုဲကၠုၚ် ပ္ဍဲဂိတုဨပရဴ ၁၈ တေံဂှ်လေဝ် စပ်ကဵုအခေါၚ်ဗၠးနူဒုဟ်ဒဏ် ကံၚ်ဇြဳပၞာန်တုဲ ပ္ဍဲထံၚ်မျေတ်ကျဳနာ ပေါဲထ္ၜးဆန္ဒအပ္ဍဲထံၚ်ဂှ် ဟိုတ်နူသၟိၚ်တၠအဝဵုထံၚ်တံ ပန်ပှော်ထ္ကးဝိုၚ်တုဲ ကောန်ထံၚ်ပရေၚ်ဍုၚ်ကွာန် မပါလုပ် ကောန်ထံၚ် ၅ တၠ ချိုတ်အာလဝ်တုဲ ၁၀ တၠပြၚ် ဇီုကပိုက်ကလိဂွံလဝ်ဝပ်ရောၚ် ဂွံတီကေတ်ရ။
ဒပ်ပၞာန်သီအဝဵု ပိသၞာံပြၚ်ဏံ ညးဒးဒုၚ်ရပ်လဝ် ကဵုကံၚ်ဇြဳပၞာန် ဟွံဗဗွဲကဵုသၞောဝ် အပံၚ်ဖအိုတ် ၂၆၆၂၀ တၠ နွံရောၚ် ဂွံတီကေတ် အတိုၚ်တၚ်နၚ် ဂကောံမၚ်မွဲရီုဗၚ် ကောန်ထံၚ်ပရေၚ်ဍုၚ်ကွာန် AAPP ရ။
ပရိုၚ်−သြၚ်လောန်တိုၚ်(မ်)
ဗီု−Spring Diary
လိက်ဗီု− ကရောၚ်ပၞာန်ဗကပ်ဗဗေၚ် LGBTQ ထ္ၜးလဝ်ဆန္ဒ ဒဒှ်ရဒစဵုဒစး သၞောတ်တၠအဝဵုပၞာန် ပ္ဍဲဍုၚ်မာန္တလေဝ်။