ဝါန်ဟိုၚ်၊ မေ ၅
နကဵုဗော်တောတက်ရးသေံ SSPP/SSA မဒှ်ဗော်ရပ်လွဟ်ကောန်ဍုၚ်အရၚ်ဂှ် ပ္ဍဲပရေၚ်ပလှ်ဖျေံသၞောတ်တၠအဝဵုပၞာန် မက္တဵုဒှ်ဒၟံၚ်လၟုဟ်ဏံ ကဆံၚ်ဂွံလုပ်ပေါဲဗ္တိုက်ပၠန်ဂတးအာ ကုကံၚ်ဇြဳပၞာန်ဂှ် သ္ဂုတ်သွာတ်လဝ်ဟွံမွဲဏီရောၚ် သ္ကိုပ်ဗိုလ်ဇၞော် သာၚ်သု ညးမၞုံအခေါၚ်ဟီုဂးဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲဂိတုမေ ၃ အခိၚ်ဗ္တံ ၜိုတ် ၇ နာဍဳ နူကဵုမုက်လိက်ဇာဇၞိက်ဝှေတ်ဗော် ဗော်တောတက်ရးသေံ SSPP Info ပ္တိုန်ထ္ၜးလဝ် နကဵုဘာသာဗၟာ ဒဒှ်ရ ဒုဥက္ကဌ SSPP/SSA ဟီုလဝ် ဂၠါဲသွဟ်ကုနဲကဲပရေၚ်ဍုၚ်ကွာန်ဟွံဂွံမ္ဂး ဒးဂၠါဲအာသွဟ် ကုနဲကဲပရေၚ်ပၞာန်ဏောၚ် မဒှ်ရ။
သွက်သ္ဂောံကလိဂွံ ဒဳမဝ်ကရေဇြဳ ကၟိန်ဍုၚ်ပံၚ်ကောံ ဇေတ်တ်မာန် နဲကဲဂၠါဲသွဟ် ပ္ဍဲဝိုၚ်တက်ကျာပရေၚ်ဍုၚ်ကွာန်ဂှ် ဟွံမွဲရတုဲ ဒးဒှ်ပေါဲဗ္တိုက်ရဏောၚ်ဂှ် ဒုဥက္ကဌ SSPP/SSA ဒုသ္ကိုပ်ဗိုလ်ဇၞော် စဝ်ခွန်ဆိုၚ် ဟီုပ္တိတ်လဝ် ပ္ဍဲအသေအဟာန် တ္ၚဲဒက်ပ္တန်ဒပ်ပၞာန်ရးသေံ SSA ပေၚ် ၆၀ သၞာံဂှ်ရ။
သ္အာၚ်နူဂှ်ပၠန် ကြဴနူကံၚ်ဇြဳပၞာန်တံ သီအဝဵုတုဲဂှ် အကာဲအရာပရေၚ်ဍုၚ်ကွာန် ဍုၚ်ဗၟာဝွံ နဲကဲ ပ္ညဳပ္ညပ်သဳကၠဳ ဂွံဂၠါဲသွဟ် လ္တူဝိုၚ်တက်ကျာဂှ် ဒှ်ဒၟံၚ်အကာဲအရာ ဒှ်ဟွံမာန်ရပုဟ်ဂှ် SSPP Info ထ္မံက်ထ္ၜးလဝ်ရ။
စပ်ကဵုဂလာန် ဒုဥက္ကဌဂှ်တုဲ သ္ကိုပ်ဗိုလ်ဇၞော် သာၚ်သု သောၚ်ကလးဏာလဝ် ပရူဝၚ် ပ္ဍဲအသေအဟာန် SSA ပေၚ် ၆၀ သၞာံ နကဵုဘာသာသေံတုဲ ပလေဝ်ပလေတ်ပရေၚ်ပၞာန်တုဲ ကဆံၚ်ဗ္တိုက် ဟွံစိုပ်ဏီပုဟ်ဂှ် ဟီုရ။
“ပၠန်ဂတးဏောၚ်၊ လုပ်ပေါဲဗ္တိုက်ဏောၚ်တံဂှ်တှ်ေ ဂကောံအာက္ဍိုပ်ပရေၚ်ဍုၚ်ကွာန်ပိုယ်တံ သ္ဂုတ်သွာတ်လဝ် ဟွံမွဲပုဟ်။ ဒၞါဲဟီုဏာဂလာန်ဂှ်လေဝ် သဳကၠဳသောၚ်ကလးဏာ၊ ဟီုဏာဂလာန် ပရူဝၚ် ဒပ်ပၞာန်ရးသေံ ပေၚ် ၆၀ သၞာံရ။ အရာတၞဟ်ဟ် ပလေဝ်ပလေတ်ပရေၚ်ပၞာန်တံတုဲ ဗ္တိုက်ဏောၚ် ကဆံၚ်ဗီုဏံ ဟွံမွဲဏီပုဟ်ဂှ် အဲမိက်ဂွံဟီုရ။ ဒဵုကဆံၚ်ဗီုဏံ သ္ဂုတ်သွာတ်လဝ်ဟွံမွဲပုဟ်” သာ်ဝွံ သ္ဂးရ။
အသေအဟာန်တ္ၚဲဒက်ပ္တန် ဒပ်ပၞာန်ရးသေံ SSA ပေၚ် ၆၀ သၞာံဂှ် ပ္ဍဲဂိတုဨပရဴ ၂၄ တေံ ကၠောန်လဝ် ပ္ဍဲဌာန်ဂအုပ်ဗဟဵု SSPP/SSA တုဲ ဒုဥက္ကဌဂှ်တှ်ေ ဒးကၠောန်ပၠန်ဂတး နကဵုဂၠံၚ်ဍာန်ရပ်လွဟ်ဂှ်ကီု၊ ပရေၚ်ဒက်ပ္တန်ဒပ်ပၞာန်ရးသေံတံကီုဂှ် ဟီုဏာလဝ်ရောၚ် သ္ကိုပ်ဗိုလ်ဇၞော် သာၚ်သု ဆက်ဟီုရ။
SSPP/SSA ဝွံ ပ္ဍဲသၞာံ ၂၀၁၂ လက်ထက်အလဵုအသဳဥူတုၚ်ဇြုၚ်ဂှ် ထ္ပက်လဝ်လိက်ကသုက်ဒေါအ်ပန်ပှော် ပဏာမ ကဆံၚ်တွဵုရးကဵု ကဆံၚ်ကၟိန်ဍုၚ်တုဲ နူသၞာံ ၂၀၁၅ ဒဵုကဵုသၞာံ ၂၀၁၇ ဟိုတ်နူဒပ်ပၞာန်ဗၟာ ထ္ပက်လဝ်ပၞာန် ဒေသဝါန်ဟိုၚ် ဒၞါဲဌာန်ဂအုပ်နွံဂှ်တုဲ ပေါဲဗ္တိုက်ဇၞော်ကဵုဇြဟတ်လေဝ် က္တဵုဒှ်လဝ်ရ။
ပ္ဍဲကာလပၞာန်သီအဝဵုဏံ ညံၚ်ရဴဂကောံရပ်လွဟ်ကောန်ဍုၚ်အရၚ်တၞဟ်ဟ်တံဂှ် လုပ်ပၠန်ဂတး ကုဒပ်ကံၚ်ဇြဳပၞာန် ဟွံမွဲတုဲ ပ္တိတ်ကၠုၚ်ဇြဟတ် သွက်ဂွံဂၠါဲသွဟ် ပြသၞာပရေၚ်ဍုၚ်ကွာန် နကဵုနဲကဲဆဵုဂဗသဳကၠဳ လ္တူဝိုၚ်တက်ကျာပရေၚ်ဍုၚ်ကွာန်ရ။
ပ္ဍဲအရာပ္တိတ်ဇြဟတ်သာ်ဏံဂှ် ညးစၞး နူဗော်တောတက်ရးသေံ SSPP/SSA တံ တိုန်စိုပ်သဳကၠဳလဝ် ပေါဲသဳကၠဳပရေၚ်ၜိုဟ်လလမ် က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် ကော်ဘိက်လဝ်ဂှ် ဟွံအောန်နူကဵုပိဝါရ။
ပရိုၚ်−သြၚ်လောန်တိုၚ်(မ်)
ဗီု−SSPP