လ္ဂုၚ်၊ မေ ၇
ဇြဟတ်ဗ္တိုက် ဒပ်ကံၚ်ဇြဳပၞာန် ဗ္ဒါဲပိဂအုံၜါဂအုံ ဇြဟတ်ဍိုန်လျ ဆောံလေၚ်အာယျဂှ်ရ ဂွံခၞံဗဒှ်အကာဲအရာပၞာန်ဂှ်ဝွံ စိုပ်ဒၟံၚ်တဲ ဂကောံဇြဟတ်ပၠန်ဂတးတံ ပေၚ်ၚ်ယျဂှ် ဌာနဝန်ဇၞော်ကာစဵုဒၞါ NUG ဟီုရ။
ဟိုတ်နူပရေၚ်ပၞာန် ဂကောံဇြဟတ်ပၠန်ဂတးတံတုဲ အခါလၟုဟ် စပ်ကဵုဇြဟတ်ဗ္တိုက်ဒပ်ကံၚ်ဇြဳပၞာန် မဒက်ပ္တန်လဝ် နကဵုၝောံဒပ် ၁၀၊ စကခ ၂၀ ဆောံလေၚ်အာဂှ်တုဲ ထ္မံက်ထ္ၜးလဝ် ပ္ဍဲလိက်ဒုၚ်စဳရေၚ်ဇရေၚ်ညးဍုၚ်ကွာန် တ္ၚဲဒက်ပ္တန်ဒပ်ပၞာန်စဵုဒၞါညးဍုၚ်ကွာန် PDF ပေၚ်ပိသၞာံဂှ်ရ။
လလောၚ်ပ္တိတ် သၞောဝ်ယိုက်ဂၠေၚ်လျိုၚ်ပၞာန်တုဲ ပကောံဒၟံၚ်ကောန်ပၞာန် အဓမ္မဂှ်ဝွံ ထ္မံက်ထ္ၜးဒၟံၚ် ဒဒှ်ရဇြဟတ်ဒပ်ကံၚ်ဇြဳပၞာန် ဍိုန်လျစှ်ေဒၟံၚ်ဂှ်တုဲ ပြံၚ်လှာဲဒၟံၚ်ဒၞါဲ သၞာဲဒဴဒပ်ပၞာန် ကဆံၚ်ဇၞော်ဇၞော်တံ မွဲဏှမွဲဏှဂှ်လေဝ် ဒဒှ်ရကျဒၟံၚ်ပရေၚ်ပၞာန်ဂှ်ကဵု ပရေၚ်ကောပ်ကာဲဒှ်ဒၟံၚ်ဆဆဵုတံဂှ် သ္ကဵုပြာကတ်တဴရောၚ် သ္ဂးရ။
ဂကောံဇြဟတ်ပၠန်ဂတးညးဍုၚ်ကွာန်တံဂှ် ရပ်စပ်စကာပရိယာဲနဲဒမၠုက်တုဲ အခိၚ်လုပ်ဒၟံၚ်ပၞာန်ပၠန်ဂတးတဝ်စၞေဟ် ပွိုၚ် ၂ သၞာံ ဟွံပိုတ်သ္ကုတ်ဂှ် ပ္ဍဲဒေသသေံသ္ကုတ်သၟဝ်ကျာကဵု ဒေသရခေၚ်ဂှ် ပရေၚ်ပၞာန် ၁၀၂၇ ကဵု ပရေၚ်ပၞာန်ဒေသကချေၚ်တံ မံက်တိတ်ကၠုၚ် အဆက်က်ရ။
သ္အာၚ်နူဂှ်ပၠန် ပ္ဍဲဒေသပၞာန် စၟတ် (၁) ၊ ဒေသပၞာန်သ္ကုတ်သၠုၚ်ကျာတံဂှ်လေဝ် စနူဂိတုနဝ်ဝေမ်ဗာ သၞာံ ၂၀၂၃ မံက်တေံတုဲ သၠုၚ်ပ္တိုန်အသိၚ် ရေၚ်တၠုၚ်လဝ် ပရေၚ်ပၞာန်မာန်ရောၚ် ထ္မံက်ထ္ၜးပါလုပ်လဝ် ပ္ဍဲလိက်ဒုၚ်စဳရေၚ်ဂှ်ရ။
ပရေၚ်ပၞာန် ဗွဲမညဳသၟဟ် သာ်ဏံဂှ်ဝွံ ဒေသဍေံကဵုဍေံ ၚးတးပသောၚ်ထောံလဝ် ယန္တယာပရေၚ်ပၞာန် ကေုာံ ပရေၚ်အုပ်ဓုပ်ကံၚ်ဇြဳပၞာန်တံမာန်သၟးဟွံက သၞတံဇြဟတ်ဍိုန်လျ သီုစိုတ်၊သီုကာယတံဂှ်လေဝ် ကၟာတ်လဒဵုဟွံမာန်ဒှ်လဝ်ရောၚ် ဌာနဝန်ဇၞော်ကာစဵုဒၞါ NUG သ္ဂးရ။
ပ္ဍဲပရေၚ်ပၞာန်တံဏံဂှ် ကောန်သ္ဂံၚ် ဒပ်ပၞာန် PDF ဂမၠိုၚ်ဝွံ ပံၚ်တောဲကဵု ဂကောံပၠန်ဂတးကောန်ဍုၚ်အရၚ် မဆက်စပ်တံတုဲ လုပ်ဒၟံၚ်ပေါဲဗ္တိုက် ဇၟာပ်ဒေသတုဲ ပ္ဍဲပရေၚ်ပၞာန် ပြဟ်ဟ်ဏံဂှ် ပလီုကၠေံ ယန္တယာပၞာန်သၞတံမာန်သၟးဟွံက သီဂွံလဝ် သီုလွဟ်ဇၞော်၊ လွဟ်ဍောတ် ဗွဲမဂၠိုၚ်ဂၠေၚ်ရ။
လွဟ်သၞဂှ် သ္ပကၠေံ ညံၚ်ဂွံဒှ်လွဟ်ဇကု သာ်ဏံမာန်ဂှ်ဝွံ ဒှ်ပရေၚ်ပၞာန်ပၟိက်ဇၞော်တံ တောတက်အံၚ်ဇၞးတုဲ နကဵုလွဟ်သၞတံဂှ် ဗပေၚ်အာဇြဟတ် ဒပ်ပၞာန် PDF တံဏောၚ် NUG သ္ဂးရ။
မွဲလ္ပာ်ဂှ်ပၠန် အစောန်စရာဲ ကောန်သ္ဂံၚ် PDF တံ ရပ်စပ်လွဟ်ဇၞော်ဂှ်လေဝ် သၠုၚ်တိုန်ကၠုၚ်ဏောၚ်တုဲ ဒပ်ဒရုၚ် PDF ဂှ်လေဝ် သၠဲပ္တိုန်ဒၟံၚ်ဇြဟတ်တုဲ တၚ်ရန်တၟံဂှ်တှ်ေ သွက်ဂွံထ္ပက်ပၞာန် မဟာဗျူဟာ မဒှ်ရ။
ဟိုတ်ဂှ်ရ အခါလၟုဟ် ဒေသပၞာန်ညးကဵုညး ဇြဟတ်ဂၠိုၚ်ကဵုလ္ၚီ ပါလုပ်တုဲ ဒက်ပ္တန်ဒၟံၚ်ဇြဟတ် နကဵုပွပ္ကတ်ပ္ကေၚ်၊ ပအပ်ဗ္ဂပ်လွဟ်၊ ဒက်ပ္တန်ပရေၚ်ကောပ်ကာဲတံရောၚ်ဂှ် ဌာနဝန်ဇၞော်ကာစဵုဒၞါ NUG ဟီုပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−ကောန်ဒပ်ကံၚ်ဇြဳပၞာန် ဂြိပ်တိတ်အာ လ္ပာ်ဗေန်ဂလာန်ဒေတ်