ဘာပန်၊ မေ ၇
ဗ္ဒိုပ်ဒပ်ကံၚ်ဇြဳပၞာန် ၅ ဗ္ဒိုပ် ကၠုၚ်စိုပ်ဖျေံလဝ်သ္ဇိုၚ် ပ္ဍဲတိဍာ်ဒပ်မဟာ ၅ ခရိုၚ်ဘာပန် ဗော်သွးကောန်ဂကူကရေၚ် KNU ထပ်ထောံလသာဂြိပ်ဒဴအာလဝ်ရောၚ် ပ္ဍဲဂိတုမေ ၆ တေံ ဒပ်မဟာ ၅ KNU လလောၚ်ပ္တိတ်လဝ်ရ။
ဗ္ဒိုပ်ဒပ်ဏံဝွံ ဒှ်ဗ္ဒိုပ်နူအပ္ဍဲခရိုၚ်ဘာပန်ဂမၠိုၚ် မပ္တံကဵုဗ္ဒိုပ် (သူးမွဲထာ၊ ကောကော်ထာ၊ ညာတဃိုကျိုး၊ ဟော်မုဒဲ ကေုာံ မယ်ဝေဘလယ်ကျိုး ) တံတုဲ အပ္ဍဲဂိတုဨပရဴ တုဲကၠုၚ်တေံဂှ်လေဝ် ကောန်ဒပ်ကံၚ်ဇြဳပၞာန်တံ ထောံလသာဗ္ဒိုပ် ဂြိပ်ဒဴအာလဝ်ရ။
ပ္ဍဲဗ္ဒိုပ်ဒပ် ဒပ်ကံၚ်ဇြဳပၞာန် ထောံလသာအာတံဂှ် ဗ္ဒိုပ်ကောကော်ထာ မၞုံပြၚ်ၜဳသၚ်လောန် ပယျဵုသေံ−ဗၟာ ကေုာံ ဗ္ဒိုပ်ဒပ် သူးမွဲထာ ဒၞါဲၜဳသၚ်လောန်ကဵု ၜဳ(သောၚ်ရၚ်း) ဂဗတံလေဝ် ပါလုပ်ဒၟံၚ်ရ။
ဗ္ဒိုပ်ဒပ်ကံၚ်ဇြဳပၞာန် မၞုံအပ္ဍဲခရိုၚ်ဘာပန် KNU တံဂှ် ဟိုတ်နူဒပ်ပံၚ်ကောံပၠန်ဂတး သၟဝ်ပၠတရဴ ဒပ်မဟာ ၅ ဒပ်ပၞာန်ဗၠးၜးကောန်ဂကူကရေၚ် KNLA တံ ဗိုၚ်ကၟာတ်လဒဵု ကြတ်ဗ္တိုက်ဒၟံၚ် ကြပ်အရိုဟ်တ္ၚဲဂှ်တုဲ ထောံလသာဂြိပ်ဒဴအာအိုတ်ရ။
ဟိုတ်နူဒပ်ပံၚ်ကောံ ဒပ်မဟာ ၅ KNLA တံ ဗိုၚ်ကၟာတ်လဒဵု ဗ္တိုက်လဝ်တုဲ သၞာံဏံ နူဂိတုဂျာန္နဝါရဳ စဵုကဵုဂိတုဨပရဴဂှ် သီုကဵုဗ္ဒိုပ်ဗျူဟာမဝ်ဖူ ဒပ်ကံၚ်ဇြဳပၞာန် မပါလုပ် ဗ္ဒိုပ် ၈ ဗ္ဒိုပ်ဟွံက ထောံလသာဂြိပ်ဒဴအာအိုတ်ဂှ် ဂွံတီကေတ် အတိုၚ်တၚ်လလောၚ်တြး ဒပ်မဟာ ၅ KNLA ရ။
ပြဟ်ဟ်ဏံ သီုကဵုကုန်ဗျူဟာ ဒပ်ကံၚ်ဇြဳပၞာန် မၞုံဗ္ဒါဲဍုၚ်ဘာပန် တိဍာ်ဒပ်မဟာ ၅ KNU ဂှ် မပါလုပ် ဌာန်ဂအုပ်တမ်ဒပ် သှ်ေဒၟံၚ်တံဂှ် ဒပ်ပံၚ်ကောံ ဒပ်မဟာ ၅ KNLA တံ ဆက်ဗိုၚ်ကၟာတ်လဒဵု ကြတ်ဗ္တိုက်လဝ်တုဲ ဒပ်ကံၚ်ဇြဳပၞာန်လေဝ် တဝ်စၞေဟ်စဵုဒၞါပန်ပှော်ဒၟံၚ် နကဵုတရဴကျာရောၚ် ဂွံတီကေတ်ရ။
ဒပ်ပံၚ်ကောံပၠန်ဂတး ဒပ်မဟာ ၅ KNLA တံဂှ် သီဂွံလဝ် တမ်ဒပ်ကံၚ်ဇြဳပၞာန် ခမရ ၄၃၄၊ ခလရ ၁၉ မၞုံဗ္ဒါဲဍုၚ်ဘာပန်တံဂှ်တုဲ ဍုၚ်ဘာပန်ဂှ်လေဝ် ဒပ်ပံၚ်ကောံပၠန်ဂတးတံ စထိၚ်ဂွံလဝ် ပ္ဍဲဂိတုမာတ်တုဲကၠုၚ်တေံရ။
ပရိုၚ်−သြၚ်လောန်တိုၚ်(မ်)
ဗီု−NUG