ရေဝ်၊ မေ ၇
ကွဳစက်ကံၚ်ဇြဳပၞာန်ပိဖ္ဍိုက် ကၠုၚ်ကဵုပၞာန်အရီု ဇရေၚ်သၞေဟ်ဂဒေါအ် ဂကောံကွာန်ကအ်ဍောတ် ပွိုၚ်ဍုၚ်ရေဝ် တွဵုရးဍုၚ်မန်ဂှ် ဒးဒုၚ်ပလီုလဝ်တုဲ ဒပ်ကံၚ်ဇြဳပၞာန် အာတ်မိက်ဒၟံၚ်သြန်လေဲ ဇရေၚ်ညးဒေသတံ ၂၀၀ ကိုဋ်ဒ္ကေဝ်ရောၚ် သြၚ်လောန်တိုၚ်(မ်) ဂၠိုက်ဂၠါဲဂွံတီကေတ်ရ။
တုဲကၠုၚ် ပ္ဍဲဂိတုမေ ၃ တေံ သွက်ပေါဲဗ္တိုက်တကအ်သကုတ်ဂှ် ကောန်ဒပ်ကံၚ်ဇြဳပၞာန် ကၠုၚ်ကဵုပၞာန်အရီု နူဍုၚ်လၟိုၚ် နကဵုကွဳစက်သ္ၚိပိဖ္ဍိုက်ဂှ်ဝွံ ဒေါအ်လဝ်ကွဳစက် ပ္ဍဲသၞေဟ်ဂဒေါအ် ကွာန်ကအ်ဍောတ်ဂှ်တုဲ အာစိုပ်ကဵုလဝ်ပၞာန်အရီု ဇရေၚ်တ္ကအ်သ္ကုတ် နကဵုဂၠုၚ်စက်ရ။
ကြဴနူဂှ်တုဲ နူဒပ်ပံၚ်ကောံ ဂကောံဇြဟတ်ပၠန်ဂတးတံ စဝ်ကၠေၚ်ဓာတ် စံၚ်ပလီုလဝ် ကွဳစက်ကံၚ်ဇြဳပၞာန် ပိဖ္ဍိုက်ဂှ်တုဲ သီုကွဳစက်ပိမ ပၟတ်တူလီုလာ်အာလဝ်ရ။
ဒပ်ကံၚ်ဇြဳပၞာန် ဒးဒုၚ်စံၚ်ပလီုထောံလဝ် ကွဳစက်ကဵုအရီုဗၚ်ပၞာန်တံဂှ်ဝွံ သွက်ကွဳစက်ဒးဒုၚ်စံၚ်ပလီုလဝ်တံဂှ် အာတ်မိက်ဒၟံၚ်သြန်လေဲ နူကဵုကွာန်ဂမၠိုၚ် ၂၀၀ ကိုဋ်ဒ္ကေဝ် နူကဵုသ္ကိုပ်အုပ်ဓုပ်ကွာန်ကအ်ဍောတ်မွဲကဆံၚ်ရောၚ် ညးဒေသတံ ဟီုရ။
ဒပ်ကံၚ်ဇြဳပၞာန် အာတ်မိက်ဒၟံၚ်သြန်လေဲတံဂှ် သ္ကိုပ်အုပ်ဓုပ်ကွာန်ကအ်ဍောတ် ကဵုသမ္တီ ကဵုလဝ်ပရိုၚ် ဇရေၚ်ညးဒေသတံတုဲ ညးဒေသဗွဲမဂၠိုၚ်ဂှ်တှ်ေ ဂွိၚ်ဖေက်သ္ၚိ ဒးဒုၚ်စံၚ်ပလီုတုဲ ဖန်ဇန်ဒၟံၚ် သွက်ဂွံကဵုသြန်လေဲတံရောၚ် ဂွံတီကေတ်ရ။
ဒပ်ကံၚ်ဇြဳပၞာန် အာတ်မိက်ဒၟံၚ်သြန်လေဲ ဇရေၚ်ညးဒေသတံဝွံ သီုကဵုဒှ်တမ်ဒပ် ခမရ ၅၈၈ ကဵု တမ်ဒပ်ခလရ ၁၀၆ မဒှ်တမ်ဒပ်ဖျေံသ္ဇိုၚ်လ္တူဍုၚ်လၟိုၚ်တံရောၚ်ဂှ် သြၚ်လောန်တိုၚ်(မ်) ဂၠိုက်ဂၠါဲဂွံတီကေတ်ရ။
ကွဳစက်ကံၚ်ဇြဳပၞာန်ပိဖ္ဍိုက် ဒးဒုၚ်စံၚ်ပလီုလဝ်ဂှ်ဝွံ ဟောန်ဒါဝှေတ် ၂ ဖ္ဍိုက်ကဵု ပရိုဝ်ဗံက် ၁ ဖ္ဍိုက် မဒှ်တုဲ ဒှ်ကွဳစက်လာၚ်ဇြေန်ဟွံမွဲတံရောၚ် ဂွံတီကေတ်ရ။
ပ္ဍဲပေါဲဗ္တိုက်တ္ကအ်သကုတ်ဂှ် လ္ပာ်ကံၚ်ဇြဳပၞာန် ၉ တၠ ချိုတ်တုဲ ၂ တၠ ရပ်ဂွံလဝ်ဂျိုၚ်ၚ်တုဲ လွဟ်လက်နက်မကမ်တံဂှ်လေဝ် နူဒပ်ပံၚ်ကောံ ဂကောံဇြဟတ်ပၠန်ဂတးတံ သီဂွံလဝ်ရ။
အပ္ဍဲပေါဲဗ္တိုက်ဏံ ဟိုတ်နူပရေၚ်ဗ္တိုက်တရဴကျာ ကံၚ်ဇြဳပၞာန်တုဲ သ္ၚိဒၟံၚ်ညးဍုၚ်ကွာန်ဒေသတံ မပါလုပ် သီုကဵုကၠအ်ထၜိုတ်တံလေဝ် ပၟတ်တူလီုလာ်အာလဝ်တံ နွံလဝ်ရောၚ် ဂွံတီကေတ် အတိုၚ်ဂလာန်ညးဒေသတံရ။
ပရိုၚ်−သြၚ်လောန်တိုၚ်(မ်)
ဗီု−CJ