မတ်မလီု၊ မေ ၇
ပ္ဍဲပွိုၚ်ဍုၚ် နူအပ္ဍဲတွဵုရးဍုၚ်မန်ဂမၠိုၚ် ကရောံဍာ်ကျာတ်ဂှ် ပၟတ်ပိုတ်လေဝ် သာပရေံကၠုၚ်ဂှ်ရ ဒးဆေၚ်ဒၟံၚ်မုက် ဒးဂဗဒၟံၚ်ကဵု အခက်အခုဲဒဒိုက်ပရေၚ်မၞိဟ်နာနာသာ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဟိုတ်နူရာသဳဥတုအေဝ်နဳညဵုတုဲ အပ္ဍဲတွဵုရး ပ္ဍဲကဵုပွိုၚ်ဍုၚ်မတ်မလီု၊ ၜါသွာၚ်၊ ပံၚ်၊ ကျာ်မြဟ် ကေုာံ ပွိုၚ်ဍုၚ်ၜဳကလေၚ်တံဂှ်တှ်ေ ဟိုတ်နူဗ္ၜတ်ဂမ္တဴတုဲ ဍာ်ပလိုၚ်၊ ဍာ်ကၟာ ကှ်ဇတ်အာတုဲ ဒးဆေၚ်ဒၟံၚ်မုက်ကဵု ပြသၞာဍာ်ကျာတ်ဝါတ် ဇၞော်ကဵုဇြဟတ်ရ။
ဍာ်ကျာတ်ဂှ်ဝွံ ဒးဂဗဒၟံၚ် စနူဂိတုမာတ်တုဲကၠုၚ်တေံကီုလေဝ် အတးလောန်တုဲဂှ် အကြာဗ္ၜတ်ဂမ္တဴ သၠုၚ်တိုန်ကၠုၚ်ဂှ် ပြသၞာဍာ်ကျာတ်ဝါတ်ဂှ်လေဝ် ညးဍုၚ်ကွာန်ဒေသတံ ဒးဒုၚ်စသိုၚ်ကၠုၚ် ဗွဲမဂတးဂတန်ရ။
ညးဒေသၜဳကလေၚ်မွဲတၠဂှ်တှ်ေ ပြသၞာဍာ်ကျာတ်ဝါတ်ဂှ်ဝွံ သၞာံဏံ ဟိုတ်နူက္တဵုဒှ်ဒၟံၚ် ပရေံပရေံဂှ်ရ ဂွံဂွံဍာ်သုၚ်ရဂှ် ဒးဂၠါဲရပ်ဒၟံၚ် တၟာဂလှ်ေရောၚ် ဟီုရ။
“ဍာ်ဂှ်တှ်ေ ဒှ်ဒဒိုက်ကွေံကွေံဏောၚ်။ ဍာ်ပလိုၚ် သၞာံဏံဂှ်တှ်ေ ဇတ်အာအိုတ်။ စၟအ်အ်ဒၞါဲ ကြပ်အလုံဍုၚ်မွဲဂှ် ဍာ်ကျာတ်ဝါတ်အာအိုတ်ရ။ အဓိကဂှ်တှ်ေ ရာသဳဥတုရဏောၚ်။ လ္ပာ်ဇိုၚ်ၜဳတံဂှ်တှ်ေ သာပရေံဏီရ။ လ္ပာ်တံဏံမ္ဂး မွဲသ္ၚိ ဍာ်မွဲ(ပုံး)၊ ညးတံဂှ် ဍာ်ဟုမ် ဟွံမွဲမံၚ်ပုဟ်။ ညးတံ ဂွံအရၚ်သုၚ်ကဵု အရၚ်ဍုန်ပုၚ်တှ်ေတုဲရ။ ညးတံဂှ်တှ်ေ မွဲတ္ၚဲ ဍာ်ၜါ(ပုံး) ညံၚ်ဂွံရုမ်ဂပ် ဒးသုၚ်စောဲဒၟံၚ်ဏောၚ် သာ်ဏံနွံရ” သာ်ဝွံ သ္ဂးရ။
အပ္ဍဲဒေသ ဍာ်ကၟာဍာ်ပလိုၚ်တံ ကှ်ဇတ်အာအိုတ်ဂှ်ရ တၠဒါန်တံ ကၠုၚ်စိုပ်ကဵုဒါန်မှဟေၚ် ဂွံရပ်စပ်ဒၟံၚ်တုဲ တ္ၚဲလ္ၚဵုတံဂှ်တှ်ေ မၞိဟ်ကၠုၚ်စိုပ်ကဵုဒါန်ဟွံမွဲတုဲ ဒးပကေဝ်ထောံဍာ်ၜဳတုဲ ဒးရပ်စပ်ဒၟံၚ်ရောၚ် ညး ဆက်ဟီုရ။
ညးတာလျိုၚ် ဂကောံဟံၚ်ပြာ်မှာဇန်မွဲတၠဂှ်လေဝ် ကၠာတေံ အပ္ဍဲဒေသ ဍာ်ကျာတ်မ္ဂး ရဲကဵုဒါန်ဍာ်တံ ကဵုဒါန်ဂၠိုၚ်ကီုလေဝ် ပ္ဍဲလက်ထက်ကံၚ်ဇြဳပၞာန်ဏံ ၚုဟ်ကၠေၚ်စက် က္ဍၚ်ကီု၊ ခရိတ်ပလံၚ်ဗစိုပ်တံ သၠုၚ်တိုန်ကၠုၚ်ကီု၊ အာကၠုၚ် ကျာတ်ဝါတ်တံဂှ်တုဲ တၠဒါန်တံ ဟွံမွဲစအှ်ေရပုဟ်ဂှ် ဟီုရ။
“ကၠာတေံဂှ်တှ်ေ ပိုယ်တံကောံတုဲ ကဵုဒၟံၚ်ဒါန် ဗီုဏံရဏောၚ်။ ကွာန်ဍာ်နွံဂှ်တှ်ေ ဗက်ကဵုဒါန် ကွာန်ဍာ်ဟွံမွဲဂှ်။ ကဵုဒါန်ဟီုဂှ်လေဝ် ဠတေံဂှ် ၚုဟ်ကၠေၚ်ဒးမံၚ်။ တံၚ်ပ္တိုန်ဍာ်ပလိုၚ် နကဵုစက်။ ဇြောတ်ဍာ်တုဲ အာကဵုဒါန်ကဵုကာ။ လၟုဟ်ဂှ် ၚုဟ်ကၠေၚ်ဂှ်လေဝ် သၠုၚ်၊ ဂွံပလံၚ်ဗစိုပ်ဂှ်လေဝ် ခရိတ်အိုတ်သီုဖအိုတ်ဂှ် သၠုၚ်၊ ပရေၚ်အာကၠုၚ်ဂှ်လေဝ် အခက်အခုဲနွံဒၟံၚ်။ ဟိုတ်နူဟိုတ်နာနာသာ်တုဲ တၠဒါန်တံလေဝ် ဟွံအာအိုတ်ရ” သာဝွံ သ္ဂးရ။
အခိၚ်ကာလၟုဟ် ဗ္ၜတ်ဂမ္တဴသ္ကာတ်မြဟ်တုဲ တၠဒါန် အောန်ကၠုၚ်ဂှ်ရ ဍာ်သုၚ်ဂှ် နွံပၟိက်ဂၠိုၚ်ကၠုၚ်ဒၟံၚ်တုဲ မွဲလ္ပာ်ဂှ်ပၠန်လေဝ် ပၟတ်ပိုတ်သ္ကုတ် ဂၠိုၚ်ကၠုၚ်ဂှ်ရ ပပ္တံနူကဵုပရေၚ်စသုၚ်မံၚ်စံၚ် ညးဍုၚ်ကွာန်တံဂှ် ဒှ်ဒၟံၚ်အခက်အခုဲရ။
ညးဒေသမတ်မလီုမွဲတၠဂှ် ပၟတ်ပိုတ်သ္ကုတ် က္တဵုဒှ်ဒၟံၚ် ပရေံပရေံဂှ်ရ အခိၚ်ဗ္တံတှ်ေ ဒှ်ဒၟံၚ်သီုကဵုအကာဲအရာ တိက်ဟွံဂွံတံရဂှ် ဟီုရ။
“ပၟတ်ပိုတ်ဂှ်တှ်ေ ကၠိုဟ်ဗ္တံ လၟုဟ် ကၠုၚ်နူ ၈ နာဍဳမ္ဂး ၁၀ နာဍဳတှ်ေ ကလေၚ်ပိုတ်ယျ။ တုဲပၠန် လၟုဟ်ဗ္တံ ၈ နာဍဳကၠုၚ်မ္ဂး ၁၀ နာဍဳဗ္တံတှ်ေ ပိုတ်တုဲ ပယျာံဂယး ၜိုတ် ၄ နာဍဳတေံမှ ကလေၚ်ကၠုၚ်ပၠန်၊ ၄ နာဍဳကၠုၚ်တုဲမ္ဂး ၆ နာဍဳကလေၚ်ပိုတ်ယျ။ ၂ နာဍဳတှ်ေ ကဵုမံၚ်မွဲအလန်၊ ဒှ်ဒၟံၚ်ဒဒိုက်အိုတ်ရ။ လၟုဟ်မ္ဂး ဗ္တံတှ်ေ ဟွံဂွံတိက်ပုဟ်” သာ်ဝွံ သ္ဂးရ။
ကံၚ်ဇြဳပၞာန်ဂှ်တှ်ေ တြးကဵုဒၟံၚ် သၞောတ်ဓာတ်ဍာ်အလုံဍုၚ် ကုဒေသ အပ္ဍဲကၟိန်ဍုၚ်တံဂှ်တုဲ ပ္ဍဲရုၚ်စက်ဇြဟတ်ဓာတ်ဍာ် ( ရဲရွာ) ကၠာစက် လုပ်ဟွံဂွံဏီ ဒးတြးဒၟံၚ်ဇြဟတ်ဓာတ် နူကဵုရုၚ်စက်ဇြဟတ်ဓာတ်ဍာ်ယှိုဲလဳ နကဵုစက်တုဲ ဖအောန်ဖျေံအာ ဇြဟတ်ဝန်ဏောၚ်ဂှ် ပ္ဍဲဂိတုဨပရဴ ၂၁ တေံ လလောၚ်ပ္တိတ်လဝ်ရ။
ဖအောန်ဖျေံအာဇြဟတ်ဝန် နူကဵုဓမ္မတာဏောၚ်ဂှ်ရ ဒေသသ္ကုတ်သၠုၚ်ကျာ ကၟိန်ဍုၚ်ဗၟာ တွဵုရးဍုၚ်မန် မပါလုပ် ရးလ္ဂုၚ်၊ ဨရာဝတဳ ကေုာံ ရးဒေသဇၞော်ဗဂေါတံဂှ် ပၟတ်ပိုတ်သ္ကုတ်အာ ဂၠိုၚ်နူကဵုဓမ္မတာဏောၚ်ဂှ် သ္ဂးလဝ်ရ။
ပ္ဍဲတွဵုရးဍုၚ်မန်ဂှ် အပ္ဍဲကာလရာသဳဥတုက္ညၚ် ဒပ်ပၞာန်သီလဝ်အဝဵုဏံ သီုဍာ်ကျာတ်ဝါတ်၊ သီုပၟတ်ပိုတ်သ္ကုတ်ကၠုၚ် ပရေံပရေံဂှ်ရ အရာမဇီုကပိုက် လ္တူဘဝပရေၚ်ပိုန်ဒြပ် ပရေၚ်မၞိဟ်တံ ဇၞော်ဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီု−ချောင်းဆုံကြက်ခြေနီအသင်း/ဘိုဘိုဝင်း