တၞၚ်သဳ၊ မေ ၈
ဟိုတ်နူပေါဲဗ္တိုက်ၜါလ္ပာ်တုဲ သ္ကုတ်ဂၠံၚ်ပျဳထံၚ်သု ဘုတ်ပြင်း−တၞၚ်သဳ မၞုံရးတၞၚ်သဳ ကၟာတ်လဒဵုလဝ် အခေါၚ်တတ်ကၠောံအာကၠုၚ် ဗ္ဒါဲပွိုၚ် ၁၀ တ္ၚဲဂှ်ရ သီုပလံၚ်ပ္တိုန်ကပေါတ်ဗၞိက်တံ မပါလုပ် စနူကဵုပရေၚ်အာကၠုၚ်တံဒှ်တမ် ဒှ်ကၠုၚ်အခက်အခုဲဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
စနူဂိတုဨပရဴ ၂၉ တုဲကၠုၚ်တေံတုဲ ဒပ်ပံၚ်ကောံ ဂကောံဇြဟတ်ပၠန်ဂတးတံ လုပ်စိုပ်ဗ္တိုက်လဝ် ဒၞါဲ(ပွိုင့်ကုန်း) ကံၚ်ဇြဳပၞာန် ၁၀၂၀ မၞုံပယျဵုတၞၚ်သဳကဵု ဘုတ်ပြၚ်းဂှ်တုဲ ပေါဲဗ္တိုက်ၜါလ္ပာ် သ္ကာတ်မြဟ်လဝ် စဵုကဵုဂိတုမေ ၇ တေံရ။
ဟိုတ်နူပေါဲဗ္တိုက်ဏံတုဲ က္ၜဳစက်ဖ္ဍိုက်ဗၞိက်ဂမၠိုၚ် ကၟာတ်ဒးဒၟံၚ် အပ္ဍဲပွိုၚ်ဍုၚ်တၞၚ်သဳတုဲ ညးဍုၚ်ကွာန်ဒေသတံဂှ်လေဝ် သွက်ပရေၚ်ပလံၚ်ဗစိုပ်တံဂှ် ဒးရပ်စပ်ဒၟံၚ် ဂၠံၚ်ဍာ်အဓိကရောၚ် ညးဒေသတံ ဟီုရ။
သ္အာၚ်နူဂှ်ပၠန် ကွဳစက်ဗၞိက် နူကအ်သံၚ်၊ ဘုတ်ပြၚ်း အာလ္ပာ်ဍုၚ်ဗိက်တံဂှ်လေဝ် နွံဒၟံၚ်ဗ္ဒါဲဍုၚ် ပြည်ကြီးမဏ္ဍိုၚ် ဆက်အာဟွံဂွံဂှ်ရ ဒးဖျေံဗ္ဒိုပ် ဒးဒေါအ်ဇူဒၟံၚ် ဒၞါဲစိုပ်ဒၟံၚ်တံဂှ်ရောၚ် ဂွံတီကေတ်ရ။
ဟိုတ်နူပေါဲဗ္တိုက် သ္ကုတ်ဂၠံၚ်ဘုတ်ပြၚ်း− တၞၚ်သဳတုဲ ညးဍုၚ်ကွာန်ဒေသတံဝွံ ဂွံအာစိုပ်ဍုၚ်ဗိက်ဂှ် မၞိဟ်မွဲတၠမ္ဂး ဒးကဵုဒၟံၚ်ၚုဟ်ဂၠုၚ် ၃ ဠက်ဒ္ကေဝ်ရောၚ် ဂွံတီကေတ် အတိုၚ်ဂလာန် ညးဒေသဘုတ်ပြၚ်းတံရ။
လအာတုပ်သာ်ဂှ်ကီု ဗ္ဒါဲကွာန် (ပဲဒက်) ပွိုၚ်ဍုၚ်တယိတ်ချံၚ် ဒၞါဲဂၠံၚ်ပျဳထံၚ်သု ဗိက်−ထဝါဲနွံဂှ် ဒပ်ကံၚ်ဇြဳပၞာန်ကဵု ဒပ်ပံၚ်ကောံ ဂကောံဇြဟတ်ပၠန်ဂတးတံ က္တဵုဒှ်လဝ်ပေါဲဗ္တိုက် သ္ကာတ်မြဟ်တုဲ ကၟာတ်လဒဵုလဝ် အခေါၚ်တတ်ကၠောံအာကၠုၚ်ရ။
ပ္ဍဲရးတၞၚ်သဳဂှ်တှ်ေ စနူဂိတုဨပရဴ တုဲကၠုၚ်တေံတုဲ ပ္ဍဲပွိုၚ်ဍုၚ်ဘုတ်ပြၚ်း၊ တၞၚ်သဳ၊ ပဠဝ်၊ တယိတ်ချံၚ် ကေုာံ ပွိုၚ်ဍုၚ်ထဝါဲတံဂှ် ပေါဲဗ္တိုက်ၜါလ္ပာ်တံ သာသ္ကာတ်မြဟ်ကၠုၚ်တုဲ လ္ပာ်ကံၚ်ဇြဳပၞာန် သုၚ်စောဲပၞာန်ကျာတုဲ ဗ္တိုက်ကၠုၚ်ဂၠိုၚ်ဂှ် ဂွံတီကေတ် ဇရေၚ်ဒပ်ပံၚ်ကောံပၠန်ဂတးတံရ။
ပရိုၚ်−သြၚ်လောန်တိုၚ်(မ်)
ဗီု−CJ