မတ်မလီု၊ မေ ၈
ဟိုတ်နူပၞာန်သီအဝဵုတုဲ ပ္ဍဲဍုင်ဗၟာ ပဋိပက္ခရပ်လွဟ်က္တဵုဒှ်ကၠုၚ်တုဲ ညးဒဒိုက်ဘဲပၞာန် ဒးဂြိပ်ဒဴပါဲဒလေတ် ထောံလသာဒၟံၚ်သ္ၚိဌာန်တံ သၠုၚ်တိုန်ကၠုၚ် စဵုကဵု ၃ ပြကောဋိကိုဋ်ရောၚ် ဂွံတီကေတ် အတိုၚ်လိက်ဒုၚ်စဳရေၚ် UN Myanmar ရ။
အတိုၚ်လိက်ဒုၚ်စဳရေၚ် UN Myanmar လလောၚ်ပ္တိတ်လဝ် နကဵုစၟတ်တ္ၚဲ ဂိတုမေ ၅ တေံဂှ်မ္ဂး ဟိုတ်နူပဋိပက္ခ သ္ကာတ်မြဟ်ကၠုၚ်ဂှ်တုဲ ညးဒဒိုက်ဘဲပၞာန် သၠုၚ်တိုန်ကၠုၚ် စဵုကဵု ၃ ပြဋိကိုဋ်ပြၚ်တုဲ လၟိဟ်ဏံဝွံ အပ္ဍဲပွိုၚ် ၆ ဂိတုဂှ်တှ်ေ ထ္ပက်တိုန်ကၠုၚ် ၅၀ တၟံကၠံရောၚ် သ္ဂးရ။
ပၞောဝ်ကဵုညးဒဒိုက်ဘဲပၞာန် ၃ ပြကောဋိကိုဋ်ဂှ် ၂ ဒဿမ ၇ ပြကောဋိကိုဋ်ဂှ်ဝွံ ဟိုတ်နူပဋိပက္ခ ကေုာံ ပရေၚ်ဟွံဂီုကၠီုတံတုဲ ဒးထောံလသာသ္ၚိဌာန် ဒးဂြိပ်ဒဴဒၟံၚ်တုဲ ပ္ဍဲကဵုဏံ ကောန်ၚာ်သၟတ် ပါလုပ်ဒၟံၚ် ပိဂအုံမွဲဂအုံရောၚ် ထ္မံက်ထ္ၜးပါလုပ် ပ္ဍဲလိက်ဒုၚ်စဳရေၚ်ဂှ်ရ။
ညးဒဒိုက်ဘဲပၞာန် ထောံလသာသ္ၚိဌာန် ဒးဂြိပ်ဒဴပါဲဒလေတ်ဒၟံၚ်တံဝွံ စနူဂိတုအံက်တဝ်ဗာ ၂၀၂၃ သၞာံတုဲကၠုၚ်တေံတုဲ ကံၚ်ဇြဳပၞာန် သာဗ္တိုက်ကၠုၚ်ကဵု ပၞာန်ကျာ မသ္ကာတ်မြဟ်တံဂှ်တုဲ သၠုၚ်တိုန်ကၠုၚ် တီတီရောၚ် သ္ဂးရ။
ပ္ဍဲကဵုဏံ ပ္ဍဲရးချေၚ်၊ မဂွဵု ကေုာံ ရးသက်ကိုၚ်တံဂှ် လၟိဟ်မၞိဟ် ၜိုတ် ၁ ဒဿမ ၅ ပြကောဋိကိုဋ် ဒှ်အာသ္ၚိဌာန်ဟွံမွဲ ဂၠိုၚ်အိုတ်တုဲ ပ္ဍဲတွဵုရးရခေၚ် ပေါဲဗ္တိုက်သ္ကာတ်မြဟ်ဒၟံၚ်ဂှ်လေဝ် လၟိဟ်မၞိဟ် ၃၅၆၀၀၀ ဒးဒှ်လဝ်သ္ၚိဌာန်ဟွံမွဲရောၚ် ထ္မံက်ထ္ၜးလဝ် ပ္ဍဲလိက်ဒုၚ်စဳရေၚ်ဂှ်ရ။
သ္အာၚ်နူဂှ်ပၠန် ပ္ဍဲဒေသဗဂေါ၊ တွဵုရးကရေၚ်၊ ရးသေံသ္ကုတ်သၠုၚ်ကျာ၊ တွဵုရးဍုၚ်မန် ကေုာံ ရးတၞၚ်သဳ ဒေသသ္ကုတ်အဂၞဲတံဂှ်လေဝ် လၟိဟ်မၞိဟ် ၉ ကိုဋ်ပြၚ် ထောံလသာသ္ၚိဌာန် ဒးဂြိပ်ဒဴပါဲဒလေတ်ဒၟံၚ်ရောၚ် ဂွံတီကေတ် အတိုၚ်တၚ်နၚ် UN Myanmar ရ။
ပရိုၚ်−သြၚ်လောန်တိုၚ်(မ်)
ဗီု−MSFC