ရေဝ်၊ မေ ၈
တွဵုရးဍုၚ်မန် လလောၚ်ပ္တိတ်လဝ်အမိၚ်အုပ်ဓုပ်ပၞာန် ပ္ဍဲပွိုၚ်ဍုၚ်ရေဝ် မွဲပွိုၚ်ဍုၚ်ဓဝ်ဂှ်တှ်ေ ပ္ဍဲဗ္ဒိုပ်ဒပ်ကံၚ်ဇြဳပၞာန်လ္ၚဵုတံဂှ် သၠဲပ္တိုန်လဝ်ဇြဟတ်ဒပ် ကေုာံ လွဟ်ဇၞော်တံ
ရောၚ် ဂွံတီကေတ် နူကဵုဒပ်ပၠန်ဂတးဍုၚ်မန် MSRF ရ။
တုဲကၠုၚ် နူဂိတုဨပရဴတေံရ ခလရ ၃၁ ဖျေံသ္ဇိုၚ်ဍုၚ်ခေါဇာ၊ ခလရ ၂၉၉ ဖျေံသ္ဇိုၚ်ဒ္စိတ်မိုၚ် ကေုာံ ပ္ဍဲဗ္ဒိုပ်သၞေဟ်ကၚ်ဒဵုဟလဲ မၞုံလ္တူစေဝ်ပယျဵု မန်−တၞၚ်သဳဂှ် သၠဲပ္တိုန်လဝ်ဇြဟတ်ဒပ်တုဲ နူဍုၚ်ရေဝ် ဒဵုစိုပ်ကွာန်အစေန် သၠဲပ္တိုန်ဇြဟတ်ဒပ်တုဲ ချဳဒရာၚ်ဒၟံၚ်ရ။
ညးမၞုံအခေါၚ်ဟီုဂး ဒပ်ပၠန်ဂတးဍုၚ်မန် MSRF နာဲနဂါဂှ်တှ်ေ စပ်ကဵုဒပ်မဟာမိတ် မွဲဒမြိပ်ပွိုၚ်ဍုၚ်ရေဝ်တံ ချဳဒရာၚ်ဂၠိုၚ်ကၠုၚ်ဂှ်တုဲ ကံၚ်ဇြဳပၞာန် ပလေဝ်ပလေတ်ကၠုၚ်ဒၟံၚ် ပၞာန်ဒုၚ်ကဵု ပၞာန်ထ္ပက်တံ နွံဒၟံၚ်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ဒပ်မဟာမိတ် မၞုံမွဲဒမြိပ်ရေဝ်ပိုယ်တံဂှ်လေဝ် ချဳဒရာၚ်ဂၠိုၚ်ကၠုၚ်တုဲ ဒှ်ကၠုၚ်ဓဝိၚ်တုဲ ပလေဝ်ပလေတ်ကၠုၚ် သွက်ပၞာန်ဒုၚ်ဂှ် ဟီုဂွံရ။ ဆ္ဂး ပၞာန်ဒုၚ်သၟးဟွံက ဒပ်(စကစ) ထ္ပက်ကၠုၚ်ပၞာန် မွဲနဲမွဲဗီုလေဝ် ဒှ်မာန်ဂှ် မိက်ဂွံဟီုရ။ ဍေံတံ ဟွံထ္ပက်ပၞာန်ဂှ်တှ်ေ နူဂိတုအံက်တဝ်ဗာ (သၞာံတုဲကၠုၚ်တေံ) မဒှ်တုဲ လ္ပာ်သၞတံ ၚးတးတိဍာ် ချဳဒရာၚ်တံဂှ်တှ်ေ ဟွံမွဲဟဂှ်ရ” သာ်ဝွံ သ္ဂးရ။
ကၠာတေံ ဒပ်ခလရ ၃၁ ကဵု ဒပ်ခလရ ၂၉၉ တံဝွံ ၜိုတ်ကဝက်မွဲဒပ်စြေက်ဂှ် စွံလဝ် နဒဒှ်သ္ဂောံမၚ်ဗ္ဒိုပ်တံတုဲ ပ္ဍဲပေါဲဗ္တိုက် ဒေသတၞဟ်ဟ်တံဂှ် ကောန်ဒပ်ဍောၚ်ဒၟံၚ်ပၞာန် ဇၟာပ်ဗ္တိုက် ကျဒၟံၚ်ဂှ် ပလံၚ်လဝ်ပၞောန်လက္ကရဴတုဲ ကဵုဇူလဝ်မွဲအံၚ်လေဝ် ဒှ်မာန်ရောၚ် ညးထံက်ထ္ၜးရ။
နကဵုကံၚ်ဇြဳပၞာန် အလုံဍုၚ်မွဲ ဒးဂဗဒၟံၚ်ကဵု ပၞာန်ထ္ပက်ကဵု ပရေၚ်ကျဗြံတံ အဆက်က်ဂှ် ဗပေၚ်ကၠုၚ်ဇြဟတ် ကောန်ဒပ်ဂမၠိုၚ် လ္ပာ်လက္ကရဴဏံဂှ်ဝွံ ပ္ဍဲပွိုၚ်ဍုၚ်ရေဝ်မွဲသၟးဟွံသေၚ်တုဲ နူတွဵုရးဍုၚ်မန် ပွိုၚ်ဍုၚ်သှ်ေတံကဵု တွဵုရးကရေၚ်တံဂှ်လေဝ် ထပ်ဗပေၚ်ကၠုၚ်ဒၟံၚ်ဇြဟတ်ရောၚ် နာဲနဂါ လဴထ္ၜးရ။
မွဲလ္ပာ်ဂှ်ပၠန် ဒပ်ကံၚ်ဇြဳပၞာန် မၞုံပွဳပွူဗ္ဒါဲကွာန်ဘာဂှ်ကီု ဒပ်အမၠံက် ဖျေံသ္ဇိုၚ်ကွာန်ကလအ်ဂှ်လေဝ် ဗပေၚ်လဝ် ဟံၚ်ဝှေတ်ဇြာ လွဟ်ဇၞော်ပန်ခြာဇမ္ၚောဲကဵု ၁၂၀ မမ တံရောၚ် ဂွံတီကေတ် ဇရေၚ်ဒပ်ပံၚ်ကောံပၠန်ဂတးတံရ။
ဒပ်ကံၚ်ဇြဳပၞာန် ဗပေၚ်လွဟ်ဇၞော်ပန်ခြာဇမ္ၚောဲသာ်ဏံတုဲ အခိၚ်ဗ္တံတံဂှ်တှ်ေ ပန်စမ်ဒၟံၚ်တုဲ မွဲဒမြိပ်ဗ္ဒါဲဗ္ဒိုပ်ဒပ် ဒးဒုၚ်ဗ္တိုက်တံဂှ်လေဝ် ပန်ပှော်ဒၟံၚ်ကြာန်န်တံ နွံဒၟံၚ်ပၠန်ရ။
“ပြဟ်ဟ်ဏံ ပ္ဍဲဍုၚ်လၟိုၚ် ပိုယ်ဏံမ္ဂး လွဟ်ဇၞော်ဂှ်တှ်ေ နူဒပ်ညးတံ ပန်ပ္တိတ်ဒၟံၚ် အခိၚ်ဗ္တံ နွံရ။ အရိုဟ်ဗ္တံဂှ်ဟွံသေၚ်။ ပရေၚ်ကွာန်တ္ကအ်သကုတ်တုဲဂှ် ပိဗ္တံအဆက်က်ရဏောၚ်။ လွဟ်ဇၞော် ပိပန်မ ၜိုတ်ဏံရ။ အခိၚ်ဗ္တံတှ်ေ ရန်ကဵုပရေၚ်ဂီုကၠီုတုဲ ဍေံတံ လုပ်တိတ်ဒၟံၚ် ဍုၚ်လၟိုၚ် နွံဒၟံၚ်ရ” သာ်ဝွံ ညးဒေသဍုၚ်လၟိုၚ်မွဲတၠ ဟီုရ။
ပ္ဍဲဂိတုမေ ၂ အခိၚ်ဗ္တံ ၜိုတ် ၁၀ နာဍဳဂှ် ဒပ်ပံၚ်ကောံပၠန်ဂတးတံ လုပ်စိုပ်ဍိုက်ဗ္တိုက်လဝ် ဗ္ဒိုပ်ဒပ်ဍာ်ကံၚ်ဇြဳပၞာန် ပ္ဍဲကွာန်တ္ကအ်သကုတ်ဂှ်တုဲ ပေါဲဗ္တိုက်ၜါလ္ပာ် သ္ကာတ်မြဟ်လဝ် စဵုကဵုပယျာံဂယး တ္ၚဲယးဂတဂှ်ရ။
ကြဴနူဂှ်တုဲ ပ္ဍဲကဵုကွာန်၊ အရာပ် ဒၞါဲဒပ်ပၠန်ဂတးတံ လုပ်စိုပ်ချဳဒရာၚ်မာန်တံဂှ် ဒပ်ကံၚ်ဇြဳပၞာန် လုပ်စိုပ်ဖျေံဗ္ဒိုပ်ကီု၊ ချဳဒရာၚ်ကၠုၚ်ပရေၚ်ပၞာန် အခိၚ်ဗ္တံ ဂၠိုၚ်ကၠုၚ်တုဲ အကြာညးဍုၚ်ကွာန်ဒေသတံ ဒှ်ဓဝိၚ် သၠုၚ်တိုန်ဒၟံၚ်ရ။
ပွိုၚ်ဍုၚ်ရေဝ် မၞုံတွဵုရးဍုၚ်မန်ဂှ်ဝွံ ကြဴနူဒပ်ပၞာန်သီအဝဵုတုဲ ဒှ်ဒေသ ဒပ်ပၠန်ဂတးရပ်လွဟ်တံ ချဳဒရာၚ်ဇြဟတ်ခိုဟ်မွဲတုဲ ဒေသ ဂကောံရပ်လွဟ်ကောန်ဍုၚ်အရၚ် မန်ကဵု ကရေၚ်တံ ထိၚ်ဒဝ်လဝ် မွဲဒကုတ်မွဲဒကဴလေဝ် ပါလုပ်ဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီု−AFP