မတ်မလီု၊ မေ ၈
ဟိုတ်နူသၞောဝ်ယိုက်ဂၠေၚ်လျိုၚ်ပၞာန် ကံၚ်ဇြဳပၞာန် ပၠောပ်လဝ်လမျီုဂှ်တုဲ ညးသၟတ်မၞုံအပ္ဍဲတွဵုရးဍုၚ်မန်ဂမၠိုၚ် တိတ်စ္ဍးအာ ဍုၚ်သ္အာၚ် နကဵုလၟိဟ်ဗွဲမဂၠိုၚ်ဂၠေၚ်တုဲ အပ္ဍဲဒေသ ဒးဆေၚ်ဒၟံၚ်မုက်ကဵု အကြေပ်အဂြတ် ကောန်ကလောန်အောန်တံယျဂှ် တၠကမၠောန်ဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဟိုတ်နူသၞောဝ်ယိုက်ဂၠေၚ်လျိုၚ်ပၞာန်တုဲ ညးသၟတ်ဂမၠိုၚ် တိတ်ကၠုၚ်ဍုၚ်သ္အာၚ် နကဵုဇြဟတ်လၟိဟ် ဗွဲမဂၠိုၚ်ဂၠေၚ် နွံကၠုၚ်ဂှ်ရ ကမၠောန်သိုၚ်ခၞံ အပ္ဍဲဒေသတံ၊ ရုၚ်ကလောန်ရုၚ်စက်တံ၊ ကမၠောန် SME တံသၟးဟွံက စနူကဵုကမၠောန်ပရေၚ်တဵုလွဳတံကဵု ကမၠောန်လွဳတိရစ္ဆာန်တံဂှ် ဒးဂဗဒၟံၚ်ကဵု ကောန်ကလောန်အောန်တံရ။
ပ္ဍဲကဵုဏံ ကမၠောန်သိုၚ်ခၞံတံဝွံ ဒးဆေၚ်ဒၟံၚ်မုက်ကဵု ပြသၞာကောန်ကလောန်ကျာတ်ဝါတ် ဇၞော်ကဵုဇြဟတ်တုဲ မ္ၚးနူကဵုရုၚ်ကလောန်ရုၚ်စက်၊ ဆေၚ်စသုၚ်၊ ကမၠောန်ဟဝ်တေဝ် ကေုာံ ကမၠောန်အာတရဴတံဂှ် ပ္ဍဲကဵုကမၠောန်တဵုလွဳဝါဗ္ၚတံဂှ်လေဝ် ကောန်ကလောန်ယအ်စှ်ေအာ ဗ္ဒါဲကဝက်ယျဂှ် ဂွံတီကေတ် အတိုၚ်ဂလာန် တၠကမၠောန်တံရ။
တၠကမၠောန်လွဳတိရစ္ဆာန်မွဲတၠဂှ် ဟိုတ်နူသၞောဝ်ယိုက်ဂၠေၚ်လျိုၚ်ပၞာန်တုဲ အပ္ဍဲဒေသ ကမၠောန်ဒုၚ်သ္ဇိုၚ်ကဵု ကောန်ကလောန်တုဲ ဒးကၠောန်ၜိုတ်ဒၟံၚ်တံဂှ် အသိၚ်အလိုန်ကောန်ကလောန်အောန်တံ ဇီုကပိုက်ကၠုၚ်တုဲ ညံၚ်ကမၠောန်ဂွံဂေတ်ဂြိပ် ဒးရုန်ဂ္စါန်ဒၟံၚ်တၟာလှ်ေရောၚ် ဟီုရ။
“ပ္ဍဲကမၠောန် ဒုၚ်သ္ဇိုၚ်ကဵုကောန်ကလောန်တံတုဲ ဒးကၠောန်တံဂှ်တှ်ေ ချဳဇတဝ်ကၠုၚ်ညိညဂှ် ဂွံဆဵုကေတ်ရ။ ကမၠောန်ဒၞါဲသွံရာန်ဗၞိက်တံ နွံဏောၚ်။ ကမၠောန်ရုၚ်စက်တံဂှ်တှ်ေ ကောန်ကလောန်သ္ဇိုၚ်တံရဏောၚ်။ လ္ၚဵုတံဂှ်လေဝ် ဖေက်တုဲ ပါဲဒလေတ်အာတံ ဂၠိုၚ်ဒၟံၚ်ဏောၚ်လေဝ်။ ဂၠိုၚ်တိုန်တုဲ ကောန်ကလောန်အောန်ကၠုၚ်တုဲ ကမၠောန်ဂွံဂေတ်ဂြိပ်ဂှ် လဇုဲလဇကၠုၚ်ညိညဂှ် ဂွံဆဵုကေတ်ရ” သာ်ဝွံ သ္ဂးရ။
သ္အာၚ်နူဂှ်ပၠန် ဟိုတ်နူသၞောဝ်ယိုက်ဂၠေၚ်လျိုၚ်ပၞာန်တုဲ ကမၠောန်အပ္ဍဲဒေသ ဗွဲမဂၠိုၚ်ဂှ်လေဝ် သၟတ်ကၠောန်ၜိုတ်မာန်တံ အောန်စှ်ေကၠုၚ်တုဲ မၞိဟ်အဝဲခိုဟ်ဟ်သာ်ဏံ ဟွံမွဲရဂှ်တုဲ ပရေၚ်ကၠောန်ပ္တိတ်တံလေဝ် ယအ်စှ်ေကၠုၚ်ဂှ် ညးဆက်ဟီုရ။
တၠကမၠောန် SME မွဲတၠဂှ်လေဝ် ကမၠောန်ဗွဲမဂၠိုၚ်ဂှ် ကောန်ကလောန်စိုန်သ္ကီုတံ ကောန်ကလောန် မဂဗ မကၠောန်တံ အောန်စှ်ေကၠုၚ်ကွေံကွေံဂှ်တုဲ ဒးဆေၚ်ဒၟံၚ်မုက်ကဵု အကာဲအရာ ပရေၚ်ကၠောန်ပ္တိတ်ဗၞိက် စှ်ေကၠုၚ် တီတီတံဂှ်ဏောၚ် ဟီုရ။
“ပရေၚ်သိုၚ်ခၞံတံ မုတံဂှ်တှ်ေ ဇီုကပိုက်ဇၞော်ကဵုဇြဟတ်ရ။ အရာတံဏံဂှ် ဒှ်ဒၞါဲဒးကေတ်ကောန်ကလောန်တံ ကွေံကွေံဏောၚ်။ ကောန်ကလောန်စိုန်သ္ကီုတံကီု၊ ရဲကၠောန်သ္ဇိုၚ်တံကီုဂှ် နွံပၟိက်ဒၟံၚ်ဖအိုတ်ဏောၚ်။ တုဲပၠန် ကောန်ကလောန် ဒးစကာတွဵုဏောၚ်ဏံဂှ် ကောန်ကလောန်ဖျေံပ္တိုန်ကပေါတ်တံရဏောၚ်။ မတံဏံဂှ်တှ်ေ ကၠေံအာဟဂှ်ရ။ ဗီုတံဏံ ကေတ်ဟွံဂွံဟဂှ် ဒှ်အာရ။ ပြသၞာဏံဂှ်တှ်ေ အောန်ကဵုဂၠိုၚ် အာဇီုကပိုက်ဒၟံၚ် လ္တူပရေၚ်ကၠောန်ပ္တိတ်ဗၞိက်တံရ” သာ်ဝွံ သ္ဂးရ။
ဟိုတ်နူသၞောဝ်ယိုက်ဂၠေၚ်လျိုၚ်ပၞာန် ကံၚ်ဇြဳပၞာန်တုဲ ကောန်ကလောန်ဍောတ်တ်သွတ်တ်တံ ဟွံမွဲရဂှ်တုဲ ကမၠောန်ဗွဲမဂၠိုၚ် သၠဲပ္တိုန်ဟွံမာန်ရတုဲ ပရေၚ်ကၠောန်ပ္တိတ်တံလေဝ် စှ်ေကၠုၚ်ဂှ်ရ ဇီုကပိုက်ကၠုၚ် သီု GDP ကၟိန်ဍုၚ်ဏောၚ်ဂှ် တၠကမၠောန်တံ သ္ၚဳဂၠိပ်လဝ်ရ။
အတိုၚ်သၞောဝ်ယိုက်ဂၠေၚ်လျိုၚ်ပၞာန် က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် ဂယိုၚ်ပ္တိုန်လဝ်ဂှ်မ္ဂး ဇၟာပ်ကောန်ဍုၚ် အကြာအာယုက် ၁၈ စဵုကဵု ၃၅ ဟွံဒေါအ်ဟွံဂွံ ဒးယိုက်ဂၠေၚ်လျိုၚ်ပၞာန် အောန်အိုတ် နူ ၂ သၞာံ စဵုကဵု ၅ သၞာံရောၚ် စၞောန်ပျးလဝ်ရ။
ညးသၟတ်ဂမၠိုၚ် တိတ်စ္ဍးအာဍုၚ်သ္အာၚ် နကဵုလၟိဟ်ဗွဲမဂၠိုၚ်ဂၠေၚ် နွံဒၟံၚ်တုဲ ကံၚ်ဇြဳပၞာန် ကၟာတ်ထောံ မၞိဟ်တြုံဂမၠိုၚ် အခေါၚ်တိတ်ကၠောန်ကလောန်ဍုၚ်သ္အာၚ် ယာယဳဂှ် လလောၚ်တြးကၠုၚ် ပ္ဍဲဂိတုမေ ၁ တေံရ။
ဆ္ဂး ဟိုတ်နူကၟာတ်လဒဵုထောံ မၞိဟ်တြုံဂမၠိုၚ် အခေါၚ်တိတ်ကၠောန်ကလောန်ဍုၚ်သ္အာၚ်တံဂှ်တုဲ ဒမြိပ်တိတ်ဍုၚ်သ္အာၚ် ဟွံလုပ်သၞောဝ်တံ သၠုၚ်တိုန်ကၠုၚ်မာန်ရောၚ် ဂကောံသၟာကမၠောန်တံကဵု ညးရီုဗၚ်ရေၚ်တၠုၚ်ဒၟံၚ်တံ သ္ၚဳဂၠိပ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−CJ