မတ်မလီု၊ မေ ၉
ဟိုတ်နူရာသဳဥတုအေဝ်နဳညဵုတုဲ အကြာဗ္ၜတ်ဂမ္တဴသၠုၚ်တိုန်ကၠုၚ်ဂှ် နူတွဵုရးဍုၚ်မန် ပ္ဍဲပွိုၚ်ဍုၚ်ပိဍုၚ်ဂှ် ဒၟါနူဂမ္တဴတုဲ မၞိဟ်ပိတၠ ချိုတ်အာလဝ်ရောၚ် ညးတာလျိုၚ်ဟံၚ်ပြာ်မှာဇန်အပ္ဍဲဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အပ္ဍဲဂိတုဨပရဴကဵု ဂိတုမေ လၟုဟ်ဏံ ဟိုတ်နူဂမ္တဴတုဲ ဒးချိုတ်အာဂှ်တှ်ေ နူဍုၚ်မတ်မလီု မၞိဟ်တြုံအယဲလဒေါဝ်မွဲတၠ၊ နူဍုၚ်သဓီုဂှ် ညးသၟတ်အာယုက် ၁၉ သၞာံမွဲတၠ၊ နူပွိုၚ်ဍုၚ်ရေဝ်ဂှ် မၞိဟ်တြုံအာယုက် ၃၀ သၞာံမွဲတၠတံ မဒှ်ရောၚ် ဂွံတီကေတ်ရ။
ညးဒးချိုတ်အာဂမၠိုၚ်ဝွံ တိတ်မ္ၚးသ္ၚိအာကၠုၚ်မ္ဂး ဒေါမ်စှ်ေ ချိုတ်အာလွာဲဂှ်ကီု၊ အခိၚ်တိုန်ဒဵု ဂမ္တဴလုပ် ဝိုတ်အာတုဲ ချိုတ်အာတံ နွံလဝ်ရောၚ် ဂွံတီကေတ် အတိုၚ်ဂလာန် ညးတာလျိုၚ် ဂကောံဟံၚ်ပြာ်မှာဇန်တံရ။
သ္အာၚ်နူဂှ်ပၠန် ဟိုတ်နူဗ္ၜတ်ဂမ္တဴတုဲ ဂမ္တဴလုပ်တုဲ လောတ်စှ်ေကီု၊ စိပ်အာကီုတံတုဲ ဒးပလံၚ်ပ္တိုန် ရုၚ်ဂဥုဲ ဗ္ဒမ်ဂဥုဲတံ နွံဒၟံၚ် ဗွဲမဂၠိုၚ်ဂၠေၚ်တုဲ ဂမ္တဴဂှ်တှ်ေ မၞိဟ်အာယုက်ဇၞော်ဇၞော်တံ ဒးဒုၚ်စသိုၚ်ဒၟံၚ် ဂၠိုၚ်အိုတ်ရောၚ် သ္ဂးရ။
အပ္ဍဲတွဵုရးဂှ် အပ္ဍဲတ္ၚဲတုဲကၠုၚ်တေံ ဗ္ၜတ်ဂမ္တဴ သၠုၚ်တိုန်ကၠုၚ်လဝ် စဵုကဵု ၄၀ ဒဳဂြဳသေန်ဒဳဂြုက်တုဲ ကြဴနူဂှ်တုဲ ပ္ဍဲဒေသလ္ၚဵုတံဂှ်တှ်ေ ဗြဲဂူတုဲ ဗ္ၜတ်ဂမ္တဴ ကလေၚ်ယအ်စှ်ေအာညိညရ။
အတိုၚ်ဌာန်ပရိုၚ် Radio Free Asia RFA ထ္မံက်ထ္ၜးလဝ်ဂှ်မ္ဂး အပ္ဍဲဂိတုဨပရဴတုဲကၠုၚ်တေံ ပ္ဍဲဍုၚ်ဗၟာ ဟိုတ်နူဂမ္တဴတုဲ အပံၚ်မၞိဟ် ၁၇၀၀ ပြၚ် ချိုတ်အာလဝ်တုဲ ပ္ဍဲကဵုဏံ ရးမာန္တလေဝ် ပါလုပ်ဂၠိုၚ်အိုတ်ဂှ် ဂွံတီကေတ်ရ။
ဟိုတ်နူဗ္ၜတ်ဂမ္တဴတုဲ လၟိဟ်မၞိဟ်ဒးချိုတ်အာဂှ် ဌာနဝန်ဇၞော်ပရေၚ်ထတ်ယုက်ကံၚ်ဇြဳပၞာန် ဒဵုကဵုအခိၚ်လၟုဟ် လလောၚ်ပ္တိတ်ကၠုၚ်ပရိုၚ်ဂှ် ဟွံဂွံဆဵုကေတ်ဏီရ။
ပရိုၚ်−သြၚ်လောန်တိုၚ်(မ်)
ဗီု− ဂကောံဟံၚ်ပြာ်မှာဇန်