ကျာ်မြဟ်၊ မေ ၉
ဟိုတ်နူပေါဲဗ္တိုက်တုဲ ညးဍုၚ်ကွာန်ပါဲဒဴဘဲပၞာန် နူဒေသၜဳဂြာၚ် ပယျဵုတွဵုရးဍုၚ်မန်ကဵု တွဵုရးကရေၚ် ဒးဂြိပ်ဒဴပါဲဒလေတ်ဒၟံၚ်ဒၞါဲဗၠးဘဲတံဂှ်ဝွံ ဟိုတ်နူအကာဲအရာပရေၚ်ဂီုကၠီုတုဲ ဒဵုကဵုအခိၚ်လၟုဟ် ဟွံဂံၚ်စဴဌာန်ဒၟံၚ်အိုတ်ဏီပုဟ်ဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တုဲကၠုၚ် ပ္ဍဲဂိတုဨပရဴ စၟတ်တ္ၚဲ ၂၂ ကဵု စၟတ်တ္ၚဲ ၂၅ တံဂှ် နကဵုဇြဟတ်လၟိဟ်ဗွဲမဂၠိုၚ်ဂၠေၚ် ဒပ်ကံၚ်ဇြဳပၞာန် ကြဴနူကလေၚ်ထိၚ်ဒက်ဂွံ ကွာန်ဓမ္မသ၊ ကွာန်ကအ်ဗိန်တုဲဂှ် ပ္ဍဲဂိတုဨပရဴ ၂၇ ဂှ် စန်ဒက်လဝ် ညးဍုၚ်ကွာန်ဒေသထောံလသာသ္ၚိဌာန်တံ သွက်ဂွံကလေၚ်စဴသ္ၚိအိုတ်ရ။
ကြဴနူဂှ်တုဲ ပ္ဍဲကဵုကွာန်ကြေဝ်ဏာ၊ ကွာန်ဓမ္မသ၊ ကွာန်ကအ်ဗိန်တံဂှ် ကောန်ဒပ်ကံၚ်ဇြဳပၞာန်တံ ကေတ်လဝ်ဒၞါဲတုဲ သွက်ပရေၚ်ဂီုကၠီုဂးတုဲ ပ္ဍဲဂၠံၚ်လုပ်တိတ်ကွာန်တံဂှ် စၟဳတ်ဒၟံၚ်တံ နွံဒၟံၚ်ဂှ်ရ ညးဍုၚ်ကွာန်ဗွဲမဂၠိုၚ် ဟွံဂံၚ်စဴဌာန်ဒၟံၚ်အိုတ်ပုဟ်ဂှ် ညးဒေသတံ သ္ဂးအိုတ်ရ။
ညးဒေသကွာန်ကအ်ဗိန် ဒးထောံလသာလဝ်ကွာန်မွဲတၠဂှ် ကောန်ဒပ်ကံၚ်ဇြဳပၞာန်တံ နွံဒၟံၚ်ပ္ဍဲကွာန်တုဲ ညးဗြဴ ကေုာံ ကောန်ၚာ်သၟတ်တံဂှ်တှ်ေ ဟွံဂံၚ်စဴအိုတ်တုဲ ၜိုတ်မၞိဟ်တြုံညိညဓဝ်ရ စဴကၠုၚ်ညးသ္ကအ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“မၞိဟ်လ္ၚဵုတံဂှ်တှ်ေ ဟီုဒၟံၚ်ဗီုဏံ။ စကစ နွံမံၚ်ပ္ဍဲကွာန်တုဲ ညးတံ ဟွံဂံၚ်စဴသ္ၚိပုဟ်။ ဆ္ဂး မၞိဟ်တြုံလ္ၚဵုတံဂှ်တှ်ေ စဴ။ မၞိဟ်ဗြဴ၊ ကောန်ၚာ်တံဂှ်တှ်ေ ဟွံဂံၚ်စဴပုဟ်။ ဗွဲမဂၠိုၚ် ဂွံစဴကွာန်ဂှ် အောန်ဒၟံၚ်ဏီ။ အခိၚ်လၟုဟ် မၞိဟ်တြုံစဴဂှ်တှ်ေ ၜိုတ် ၁ တၟံကၠံရနွံဏောၚ်။ မုဒှ်ရောဟီုတှ်ေ မွဲအရာပ်တှ်ေ ၜိုတ်မွဲၜါတၠရ နွံ” သာ်ဝွံ သ္ဂးရ။
မွဲလ္ပာ်ဂှ်ပၠန် ကွာန်ကအ်ဗိန်၊ ကွာန်ကအ်ပံက် ကေုာံ ကွာန်မၞုံဗ္ဒါဲဗ္ဒါဲတံဂှ် ပေါဲဗ္တိုက်က္တဵုဒှ် ဟွံမွဲမွဲသာ် ကံၚ်ဇြဳပၞာန် ပန်ပှော်လွဟ်ဇၞော် ကြာန်န်တံ နွံဒၟံၚ်တုဲ ညးဍုၚ်ကွာန်ဂမၠိုၚ် ဂွံစဴသ္ၚိဌာန်ဂှ် သာတုဲဒှ်ဒၟံၚ်အခက်အခုဲရ။
တုဲကၠုၚ် ပ္ဍဲဂိတုမေ ၄ တေံဂှ်လေဝ် ဟိုတ်နူပရိုၚ် ဒပ်ပၠန်ဂတးရပ်လွဟ်တံ လုပ်စိုပ်ချဳဒရာၚ် လ္ပာ်ကွာန်ကအ်ဒုန်၊ ကအ်ပၞဟ် မၞုံပွိုၚ်ဍုၚ်ကျာ်မြဟ်တံဂှ်တုဲ ဒပ်ကံၚ်ဇြဳပၞာန် စကာပၞာန်ကျာတုဲ ကၠုၚ်စိုပ်ပန်ပှော်လဝ် နကဵုသေနာတ်စက်ရ။
ဟိုတ်နူပရေၚ်ဗ္တိုက်ပန်ပှော်ဏံတုဲ သ္ၚိဒၟံၚ်ညးဒေသ ဟွံအောန်နူကဵု ၃ မ ဇီုကပိုက်လီုလာ်အာလဝ်တုဲ ညးဍုၚ်ကွာန်ကောန်အရာပ်တံ ဇီုကပိုက်ကလိဂွံဝပ် ဟွံမွဲပုဟ်ဂှ် ညးဒေသတံ ဟီုရ။
ညးဒေသကွာန်ဓမ္မသမွဲတၠဂှ်လေဝ် ဒပ်ကံၚ်ဇြဳပၞာန်တံ နွံဒၟံၚ် ပ္ဍဲကွာနတုဲ စဴကေတ် ကပေါတ်သှ်ေဒၟံၚ်ပ္ဍဲသ္ၚိတံဂှ်တုဲ ဆက်နွံဒၟံၚ် ပ္ဍဲဒၞါဲပါဲဒလေတ်ဒၟံၚ်တံဖိုဟ်တုဲ လ္ၚဵုတံဂှ်တှ်ေ ရဲစိုပ်အာလ္ပာ်ဍုၚ်သေံလေဝ် နွံဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ဆက်နွံဒၟံၚ် ဒၞါဲဂှ် ( ဒၞါဲပါဲဒဴဘဲပၞာန်) ဖိုဟ်ရ။ လ္ၚဵုတံဂှ်တှ်ေ မၞိဟ်ဂြိပ်အာလ္ပာ်ဍုၚ်သေံဂှ်ဂြိပ်။ နွံဒၟံၚ်အဂှ်ဖအိုတ်ရ။ မုဒှ်ရောဟီုတှ်ေ တ္ၚဲတေံရ စဴတုဲ အာကေတ်ကပေါတ်။ ဍေံတံ စကစ နွံဒၟံၚ်တုဲ ညးမွဲမှ ဟွံစဴပုဟ်။ ရဲကွာန်တံဂှ်တှ်ေ ကၠုၚ်ကေတ်ကပေါတ်။ လ္ၚဵုတံဂှ်တှ်ေ စဴသ္ၚိ စဴကျောဝ်အကာဲအရာသ္ၚိ။ အေ ဇှ်ဂှ် ဒးထ္ပက်စၟတ်တဲ လုပ်တိတ်ကွာန်ရ” သာ်ဝွံ သ္ဂးရ။
တုဲကၠုၚ် ပ္ဍဲဂိတုမာတ် ၂၇ တေံ ပေါဲဗ္တိုက်က္တဵုဒှ်ဟွံမွဲမွဲသာ် ဒပ်ကံၚ်ဇြဳပၞာန် ပန်ပှော်ဗ္တိုက်လဝ် ကွာန်ဓမ္မသ နကဵုဒပ်ဍာ်၊ ဒပ်တိုက်၊ ဒပ်ကျာတုဲ သ္ၚိဒၟံၚ်ကောန်အရာပ် ၃၀၀ ပြၚ် ပၟတ်တူဒှ်အာဆောံရ။
ကြဴနူဂှ်တုဲ လ္ပာ်မ္ၚးကွာန်ဓမ္မသ၊ ကွာန်သၚ်ကၠံ ကေုာံ ကွာန်ကြေဝ်ဏာတံဂှ် ပေါဲဗ္တိုက် အကြာဒပ်မဟာမိတ်ပၠန်ဂတးတံကဵု ဒပ်ကံၚ်ဇြဳပၞာန်တံ သ္ကာတ်မြဟ်လဝ်တုဲ ဒပ်ကံၚ်ဇြဳပၞာန် ဟိုတ်နူထောံမခတိုဟ် နကဵုက္ၜၚ်ကျာတုဲ သ္ၚိဒၟံၚ်ကောန်အရာပ် ကဵုစှော် ကေုာံ ဗ္ဒမ်ဘာကျာ်ဂမၠိုၚ်လေဝ် ဒးလီုလာ်အာလဝ်ရ။
သ္ကိုပ်ဝန်ဇၞော် တွဵုရးဍုၚ်မန်ဂှ် ကွာန်ဓမ္မသ ၜိုတ်သြိုဟ်ဒၟံၚ်ယျဂှ်ရ ညးဍုၚ်ကွာန်ထောံလသာသ္ၚိဌာန်ဂမၠိုၚ် သွက်ဂွံကလေၚ်ဖျေံသ္ဇိုၚ် မံၚ်တန်တဴ ပ္ဍဲသ္ၚိဌာန်ဇကုတံမာန်ဂှ် ရေၚ်တၠုၚ်ကဵုဒၟံၚ် ကမၠောန်ကလေၚ်ပ္တန်ပ္တူတံ ဗွဲမပြဟ်ရောၚ် ဟီုလဝ် ပ္ဍဲကောံဓရီု မကၠောန်ဗဒှ်လဝ် ပ္ဍဲဂိတုမေ ၇ တေံရ။
ပ္ဍဲကမၠောန်ကလေၚ်ပ္တန်ပ္တူတံဂှ် သီုကဵုစမြိုၚ်သ္ၚိဒၟံၚ် လီုလာ်အာတံ မပါလုပ် ကွးဘာဂမၠိုၚ် ညံၚ်ဂွံဆက်ကတ်ဗ္တောန်ပညာမာန်၊ ပရေၚ်မၚ်မွဲ ပရေၚ်ထတ်ယုက်၊ သွက်သ္ဂောံဂွံဍာ်သုၚ်၊ ပၟတ် မနွံပၟိက်တံဏံ ပါလုပ်ရ။
နူပေါဲဗ္တိုက်သီဗ္ဒိုပ်ဗၠာဲသၟိၚ်ကအ်ဗိန် စဵုကဵုအပ္ဍဲပေါဲဗ္တိုက်ဒေသၜဳဂြာၚ် ကွာန်မၞုံမွဲဒမြိပ်ဂၠံၚ်ကွဳစက်ရမ္မာဝတဳ ၁၀ ကွာန်ဟွံက နူကဵုကွာန်တံဏံဂှ် ညးဒေသမွဲကိုဋ်ပြၚ် ဒးထောံလသာဌာန်ဒၟံၚ်တုဲ ဟိုတ်နူပရေၚ်ဗ္တိုက်ပန်ပှော် ကောန်ဒပ်ကံၚ်ဇြဳပၞာန်တံတုဲ ကောန်အရာပ် ဟွံအောန်နူကဵုလၟိဟ် (၃၀ တၠဟွံက ဒးချိုတ်အာလဝ်ရ။
ပရိုၚ်−သြၚ်လောန်တိုၚ်(မ်)
ဗီု− CJ